Dee soni dee Maikusi sikifi
5 Di de dou a woto së banda u di ze, hën de go a di pisiwata u dee Galasëni sëmbë. 2 Wantewante dë di Jesosi kumutu a di boto, hën wan womi waka kumutu a di geebi ko miti ën. Di womi aki bi abi taku soni nëën liba. 3 Di womi aki bi ta libi a geebi, nöö na wan sëmbë bi sa kisi ën tai, na ku këti seei. 4 Sömëni pasi de bi pooba u bui ën nëën maun ku ën futu tuu, ma a bi ta koti dee këti. Na wan sëmbë bi abi kaakiti tjika u hoi ën. 5 Nöö ndeti ku didia di womi aki bi ta dë a dee geebi mindi, söseei a dee kuun kamian ta bai ta kai wolo, ta koti hënseei ku sitonu pisi. 6 Ma di a si Jesosi ta ko, hën a kule go miti ën, hën a tjökö kini nëën fesi. 7 Hën a bai piki ën taa: „Andi mi ku i abi, Jesosi, ju di Womi Mii u di Möön Hei Gadu u mundu dë? Soi a Gadu fesi taa ja o du hogi ku mi!” 8 A bi taki sö, u di Jesosi bi piki di taku soni taa: ’Kumutu a di womi liba.’ 9 Hën Jesosi hakisi ën taa: „Unfa de ta kaai?” Hën a piki taa: „Mi de ta kai Te-A-Hia, biga u dë seei te a hia.” 10 Nöö hën a ta begi Jesosi nöömö fu an jaka de puu a di köndë.
11 Nöö di juu dë wanlö hia hagu bi dë a wan kuun ta njan. 12 Hën dee taku soni begi Jesosi taa: „Da u pasi fuu go a dee hagu ala baa.” 13 Hën Jesosi da de pasi u de go. Hën dee taku soni kumutu a di womi liba go a dee hagu. Hën dee hagu kule ku baai gbulululu go kai a ze dëdë tuu fiaa. De bi dë söwan 2000 hagu. 14 Hën dee sëmbë dee bi ta luku dee hagu kule go konda hii soni di de bi si da dee sëmbë u di köndë, söseei da dee sëmbë dee bi ta libi zuntu ku di köndë. Hën dee sëmbë ko luku andi bi pasa. 15 Fa de ko dou a Jesosi, hën de si di womi di bi dë ku dee hia taku soni nëën liba sindosindo piii ku koosu a sinkii, ku bumbuu fusutan seei, nöö de bi ko ta fëëë te na soni. 16 Dee sëmbë dee bi si dee soni dee bi pasa, bi konda da dee sëmbë dee bi ko dë, unfa soni bi pasa ku di womi ku dee hagu. 17 Nöö hën dee sëmbë u di köndë begi Jesosi faa kumutu a di pisiwata u de.
18 Di Jesosi bi ta subi a boto, hën di womi di a bi jaka dee taku soni puu nëën liba begi ën faa go makandi ku ën. 19 Ma Jesosi an dëën pasi faa ko ku ën. A taki dëën taa: „Go a dee sëmbë fii e, nöö i go konda da de un bunu Jehoufa du da i, ku di fa a lei taa a abi tjalihati fii tjika.” 20 Hën di womi aki go, hën a bigi ta konda di soni di Jesosi bi du dëën a hii di pisiwata de kai Dekapolisi*. Nöö di soni aki bi foondo dee sëmbë gaanfa seei.
21 Hën Jesosi toona tei boto haba go a di woto së banda. Nöö fa a go dou a lampeesi, hën gaan hia sëmbë ko lomboto ën. 22 Wan womi de kai Jailusi ko dou. Di womi aki bi dë wan u dee hedima u di wosu ka dee Dju nango dini Gadu. Di a si Jesosi, hën a tjökö kini a Jesosi fesi. 23 Hën a ta begi ën nöömö taa: „Di piki mujëë mii u mi suwaki gaanfa seei. Mi begi i fii ko buta maun nëën liba, sö taa a sa ko bëtë, nöö a libi.” 24 Di Jesosi jei sö kaa, hën a go ku ën. Nöö wanlö gaan hia sëmbë bi ta waka nëën baka ta pusa ko nëën.
25 Wan mujëë di bi ta lasi buuu 12 jaa longi bi sai dë tu. 26 A bi go a sömëni data, nöö de bi kulëën te de wei. Na piki pena de penëën. Hii möni fëën tuu kaba këëë, ma ka u di siki bëtë, awaa a ko möön hogi. 27 Nöö hën di mujëë ko jei soni u Jesosi, nöö hën a ta tuusi hënseei a dee sëmbë mindi dë tefa a ko nama maun a di koosu u Jesosi. 28 A bi ta taki taa: „Ee mi nama tjë sö seei a di koosu fëën, nöö mi o bëtë.” 29 Nöö di a nama nëën, hën wantewante dë a fii taa a ko bëtë djeee, an ta lasi buuu möön. A ko böö u di taku siki.
30 Nöö wantewante dë Jesosi fii taa kaakiti kumutu nëën sinkii, hën a bia hakisi dee hia sëmbë naandë taa: „Ambë panjan di koosu u mi?” 31 Nöö hën dee bakama fëën piki taa: „Wë gaan hia sëmbë ta pusa ko a i, nöö hën i ta hakisi ee ambë nama a i nö?” 32 Ma Jesosi bi ta tuwë wojo a dee hia sëmbë dendu naandë, faa si ee ambë bi panjëën. 33 Di mujëë bi ko fusutan taa a bi ko bëtë, nöö a bi ko ta fëëë te sinkii fëën ta tëëmë tjatjatjatja. Hën a ko tjökö kini a goon a Jesosi fesi, hën a konda hii soni dëën te a kaba, leti kumafa a bi waka. 34 Hën a piki di mujëë taa: „Mujëë o, di biibi fii, hën mbei i ko bëtë. Go fii e, i böö u di siki di bi ta sitaafu i dë.”
35 An bi kaba u fan ku di mujëë seei, nöö hën wanlö womi ko dou dë. De bi kumutu a di wosu u Jailusi. Nöö hën de fan ku Jailusi taa: „Mati o, an dë fii toobi di Mësitë möön e, biga di mujëë mii fii lasi libi kaa.” 36 Jesosi jei fa de fan dë, hën a piki Jailusi taa: „Na fëëë e, biibi nöö i musu biibi.” 37 Di Jesosi nango a di wosu u Jailusi, nöö an bi mbei dee hia sëmbë go ku ën. Petuisi, ku Jakobosi, ku hën baaa Johanisi nöö a bi mbei go ku ën.
38 Di de dou a di wosu u Jailusi, hën Jesosi si taa sëmbë bi sai dë ta bai ta këë ta kai wolo te a bigi. 39 Di a denda go a di wosu, hën a hakisi dee sëmbë taa: „Faandi mbei un ta këë ta kai wolo sö? Di mii an dëdë e, duumi a ta duumi.” 40 Di de jei di soni dë, hën de bigi ta lafu ën ta mbei ën fa. Hën a manda dee sëmbë naandë tuu go a döö, nöö hën a kai di tata ku di mama u di mujëë mii, ku dee dii bakama fëën, nöö hën de go a di kamba ka di mii bi dë. 41 Hën Jesosi panjan di mii a maun, hën a piki ën taa: „Talita kumi.” Di soni dë kë taki: „Mujëë mii, mi taki e, hopo!” 42 Hën wantewante dë di mujëë mii hopo taanpu, hën a bigi ta waka. A bi abi tuwalufu jaa. Di mama ku di tata u di mii bi wai te na soni. 43 Ma Jesosi piki de sömëni pasi taa de an musu konda di woto da na wan sëmbë. A bi piki de tu taa de musu da di mii soni u njan.