Dee soni dee Maikusi sikifi

10 Nöö hën Jesosi kumutu naandë, hën a go a di së u Judea di dë a di woto së banda u di Joodan lio. Nöö hën wanlö gaan hia sëmbë ko nëën. Hën a bigi ta lei de soni leti kumafa a bi guwenti du. 2 Hën dee Faliseima ko nëën u de poobëën luku. De hakisi ën ee wan womi sa booko tööu ku hën mujëë. 3 Hën a piki de taa: „Andi Mosesi bi piki unu fuun du?” 4 Hën de taa: „Mosesi bi da pasi taa wan womi bi sa da hën mujëë wan pampia di ta lei taa an këën möön, söseei taa a booko di tööu.” 5 Hën Jesosi piki de taa: „U di un abi taangajesi mbei a da unu di wëti dë. 6 Ma a di bigi ’Gadu mbei wan womi ku wan mujëë. 7 Fëën mbei wan womi o go disa hën mama ku hën tata, 8 nöö hën ku hën mujëë o ko dë wan sinkii. De an o dë tu sinkii möön, ma de o dë wan sinkii’. 9 Fëën mbei na wan sëmbë musu paati di soni di Gadu tja ko a wan.” 10 Di Jesosi ku dee bakama fëën toona go a wosu, hën de bigi ta hakisi ën soni u di soni di a bi taki naandë. 11 Hën a piki de taa: „Ee wan womi booko tööu ku hën mujëë, hën di womi go tööu ku wan woto mujëë, nöö waka di womi dë waka da hën mujëë. 12 Söseei ee wan mujëë booko tööu ku hën manu, hën a go tööu ku wan woto womi, nöö waka di mujëë dë waka dëën manu.”

13 Sëmbë bi ta tja miii go a Jesosi faa buta maun a de hedi u begi da de. Ma dee bakama fëën bi ta gandji da dee sëmbë. 14 Di Jesosi si sö, hën a toobi ën seei, hën a taa: „Un disa dee mii be de ko a mi, wan tapa de. Biga di Tii u Gadu dë da dee sëmbë dee dë kuma dee mii aki. 15 Mi taki e, ee wan sëmbë ja ta biibi di Tii u Gadu kumafa piki mii ta biibi soni, nöö ja o sa denda go nëën.” 16 Hën a baasa dee mii, hën a buta maun a dee mii hedi, hën a begi da de.

17 Di a bi dë a pasi nango, hën wan womi kule ko nëën, hën a tjökö kini nëën fesi, hën a hakisi Jesosi taa: „Di bumbuu Mësitë aki, andi mi musu du u mi sa feni di libi u teego?” 18 Hën Jesosi piki ën taa: „Faandi mbei i ta kai mi bumbuu Mësitë? Na wan sëmbë bumbuu boiti Gadu. 19 Wë i sabi dee Wëti: ’Ja musu kii sëmbë, ja musu waka da di sëmbë di i ku ën tööu, ja musu fufuu, ja musu ta mindi soni, ja musu ganjan sëmbë, i musu ta kai i mama ku i tata gaan soni.’” 20 Hën di womi piki ën taa: „Mësitë o, hii dee wëti dë tuu mi ta hoi kaa sensi di mi dë miii.” 21 Hën Jesosi luku di womi te a kaba, hën a ko lobi ën seei. Hën a taki dëën taa: „Wan soni dë di i musu du jeti. Go sei hii dee gudu dee i abi, nöö i da dee pootima di möni. Te i du sö, nöö joo abi gudu a Gadu a liba ala. Te i kaba, nöö i ko dë wan bakama u mi.” 22 Di di womi jei di soni aki, hën a bia go ku tjali nëën hati, biga a bi abi hia gudu.

23 Hën Jesosi bia piki dee bakama fëën taa: „A o taanga da dee guduma u de go a di Tii u Gadu dendu.” 24 Di soni di a bi taki aki bi bigi da dee bakama fëën. Hën Jesosi taa: „Dee mii, a taanga u wan guduma go a di Tii u Gadu dendu! 25 A möön fukë da di gaan mbeti de kai kamëli faa pasa a wan aguja baaku möön leki fu wan guduma denda go a di Tii u Gadu.” 26 Di soni di a taki dë bigi da de te na soni. Hën de hakisi Jesosi* taa: „Nöö ambë seei sa feni di libi u teego?” 27 Hën a luku de diiin, hën a piki de taa: „Da libisëmbë di soni aki an kan, ma Gadu sa du hii soni.” 28 Hën Petuisi piki ën taa: „Wë u bi disa hii soni seei ko ta waka a i baka.” 29 Hën Jesosi taa: „Mi taki da unu taa, hiniwan sëmbë di go disa hën wosu, hën baaa nasö hën sisa, hën tata nasö hën mama, hën mii, nasö dee goon fëën u mi në hedi, söseei u di bunu buka hedi, 30 o toona feni hii soni 100 toon baka. Ee wosu, ee baaa, ee sisa, mama, miii, ku goon tuu seei a o feni a di ten u dë aki, ma nöö a o kisi sitaafu tu. Ma nöö a di ten di ta ko,* nöö a o feni di libi u teego. 31 Sömëni sëmbë dee bi dë fosuwan, o ko dë lasitiwan, nöö sömëni u dee lasitiwan o ko dë dee fosuwan.”

32 Di de bi dë a pasi nango a Jelusalën, nöö dee bakama u Jesosi bi ta waka nëën baka, ma de an bi dë ku wai. De bi dë fëëëfëëë pantapanta. Dee woto sëmbë dee bi ta waka ku de seei bi dë fëëëfëëë tu. Hën Jesosi kai dee tuwalufu apösutu fëën go a wan së, hën a piki de andi bi o pasa ku ën abiti möön. A taa: 33 „Un haika e, woo go a Jelusalën, nöö de o tja di sëmbë di ko dë Libisëmbë Miii go leifi da dee fesima u dee begima, ku dee sabima u Wëti. Nöö de o kuutu ën taa a musu dëdë. Nöö de o toona leifi ën da dee woto köndë sëmbë, 34 nöö de o mbei ën fa, de o tunta nëën, de o fon mën, söseei de o kii ën. Ma nöö baka dii daka, a o toona weki ko a libi baka.”

35 Hën Jakobosi ku hën baaa Johanisi, dee womi mii u Zebedeosi, ko a Jesosi hën de taa: „Mësitë o, u ko begi i a wan soni aki.” 36 Hën a piki de taa: „Andi un kë u mi du da unu?” 37 Hën de taa: „U kë begi i taa te joo sindo a di könu bangi fii, nöö boo sindo a i bandja, wan fuu a i letisë maun, nöö di wotowan a i töötösë maun.” 38 Hën Jesosi piki de taa: „Un saandi un ta hakisi mi ö? Di soni di de lai da mi u mi bebe aki, woon sa bebëën tu ö? Di sitaafu mi o tja aki, woon sa tjëën u?”* 39 Hën de taa: „Aai, woo sa.” Hën Jesosi piki de taa: „A dë sö tuu taa woon bebe di soni di de lai da mi u mi bebe aki, söseei taa woon tja di sitaafu di mi o tja aki. 40 Ma na mi ta taki ambë o sindo a mi letisë maun, nasö a mi töötösë maun. Biga dee sëmbë dee o sindo a dee lö kamian dë, da dee sëmbë dee mi Tata seei o buta.”

41 Di dee teni wotowan ko jei andi Jakobosi ku Johanisi bi hakisi Jesosi, hën hati u de boonu ku de te na soni. 42 Ma Jesosi kai de ko nëën, hën a piki de taa: „Un sabi taa dee tiima u dee woto köndë sëmbë ta masa dee sëmbë u di köndë, söseei taa dee heihei sëmbë ta masa dee sëmbë dee dë a de basu. 43 Ma wan musu dë sö e. Di sëmbë di kë dë di möön heiwan musu ko dë kuma wan wookoma da unu. 44 Ee wan sëmbë kë ko dë di fosuwan a unu mindi, nöö a musu du soni da hii unu tuu kuma wan saafu. 45 Biga fa i si di sëmbë di ko dë Libisëmbë Miii ko a goonliba aki, nöö an ko u sëmbë musu du soni dëën e, ma a ko fu hënseei musu du soni da sëmbë. A ko faa lasi hën libi paka paima da sömëni sëmbë.”

46 Nöö hën Jesosi ku dee bakama fëën ko a wan köndë de kai Jelikou. Nöö di de ta kumutu a di köndë, hën wanlö hia sëmbë nango ku de. Di juu dë, nöö wan bookowojoma bi dë leti a bandja pasi sindosindo ta pidi möni. Di womi aki de kai Balitimeosi, di kë taki di mii u Timeosi. 47 Di a jei taa Jesosi, di womi u Nazalëti ta pasa naandë, hën a bigi ta bai taa: „Jesosi o, Womi Mii* u Dafiti, abi tjalihati u mi baa!” 48 Di a taki sö, hën sömëni sëmbë bigi gandji dëën faa kabuka dë. Ma awaa a ta bai taa: „Womi Mii u Dafiti, abi tjalihati u mi baa!” 49 Hën Jesosi taanpu piii, hën a taa: „Un kai ën da mi.” Nöö hën de go a di womi, hën de piki ën taa: „Womi, na fëëë e! A ta kaai. Hopo go nëën.” 50 Nöö di a jei sö kaa, hën a puu di liba koosu fëën tuwë go a wan së, hën a hopo vu taanpu, hën a go a Jesosi. 51 Hën Jesosi hakisi ën taa: „Andi i kë u mi du da i?” Hën di bookowojoma piki ën taa: „Laboni,* mbei mi ko ta si soni baka baa.” 52 Hën Jesosi piki ën taa: „Go fii e. Di biibi fii hën heepi i.” Hën wantewante dë a ko ta si soni baka, hën a bigi ta waka a Jesosi baka.