Di hogihati mujëë könu Iseibëili

BAKA DI Könu Jelobiam dëdë, nöö hii dee könu dee bi ta tii di 10-lö könuköndë u Isaëli bi dë sösö hogihati könu. Könu Akab bi dë di möön hogihati wan u hii de tuu. I sabi faandi mbei ö? Wan u dee soni bi dë di mujëë fëën, di hogihati mujëë könu Iseibëli.

Iseibëli an dë wan Isaëli mujëë. A dë di mujëë mii u di könu u Sidon. A ta dini di taku gadu Baali, nöö a mbei Akab ku sömëni woto Isaëli sëmbë go dini Baali tu. Iseibëli buuse Jehovah, nöö a kii sömëni u dee tjabukama fëën. So u de musu go tjubi a baaku a sitonu mindi fu an feni de kii. Te Iseibëli kë wan soni, nöö a sa kii wan sëmbë faa feni di soni dë.

Wan daka, Könu Akab tjali seei. Hën Iseibëli hakisi ën taa: ’Faandi mbei i dë tjalitjali tide sö?’

Akab piki ën taa: ’Di soni Nabotu piki mi wë mbei. Mi bi kë bai di doloifi goon fëën. Ma a piki mi taa më o sa feni ën.’

Iseibëli piki ën taa: ’Na booko i hedi, mi o feni ën da i.’

Hën Iseibëli sikifi biifi manda da dee hei sëmbë u di foto ka Nabotu ta libi. A taa: ’Un mbei wan tu kaba-a-sösö womi go konda taa Nabotu siba Gadu ku di könu. Nöö un tjëën go a döösë u di foto go naki ku sitonu kii.’

Di Iseibëli jei taa Nabotu dëdë, hën wantewante dë a piki Akab taa: ’Nöunöu i sa go tei di doloifi goon fëën.’ Ja feni taa Iseibëli musu kisi sitaafu u di hogihati soni a du dë u?

Fëën mbei baka wan pisiten Jehovah manda Jehu u go sitaafu ën. Di Iseibëli jei taa Jehu ta ko, a feifi ën wojo, hën a pooba u mbei hënseei ko möön hanse. Ma di Jehu ko dou, hën a si Iseibëli a di fënsë buka, hën a bai piki dee womi u di könu wosu taa: ’Un tuwëën ko a goon ooo!’ Dee womi haikëën, kumafa i ta si a di peentje aki. De tuwëën go a goon, hën a dëdë. A sö wan fasi soni u di hogihati mujëë könu Iseibëli, ko kaba.