Josafati buta futoou a Jehovah

I SABI ambë da dee womi aki ö, nöö i saandi de ta du ö? De nango a feti, nöö dee womi dee dë a fesi, ta kanda. Ma sonte i ta hakisi i seei taa: ’Faandi mbei dee kandama an dë ku ufangi ku lanza u feti di feti?’ Boo go luku faandi mbei.

Josafati da di könu u di tu-lö könuköndë u Isaëli. A bi ta libi a di seei pisiten u Könu Akab ku Iseibëli u di bausë 10-lö könuköndë. Ma Josafati da wan bunu könu, nöö hën tata Asa bi dë wan bumbuu könu tu. Fëën mbei soni bi nango bunu ku dee sëmbë u di libasë tu-lö könuköndë.

Ma wan soni pasa di mbei dee sëmbë ko fëëë. Bosikopuma ko konda da Josafati taa: ’Wan lö gaan hia sodati u di köndë Moab, Amon ku di kuun köndë Seili ta ko feti ku i.’ Sömëni u dee Isaëli sëmbë ko makandi a Jelusalen u suku heepi a Jehovah. De go a di Wosu u Gadu, nöö naandë Josafati begi taa: ’Ke Jehovah Gadu o, wa sabi andi u musu du. Wa sa du soni u dee hia sodati aki. Ju nöö sa heepi u baa.’

Jehovah haika di begi, hën a manda wan futuboi fëën u piki dee sëmbë taa: ’Na unu a’ di feti, Gadu hën abi ën. Wan o feti seei. Tan fuunu piii luku, nöö woon si fa Jehovah o heepi unu.’

Debooko fëën Josafati piki dee sëmbë taa: ’Un buta futoou a Jehovah!’ Hën a mbei kandama waka a dee sodati fëën fesi. Nöö hii fa de ta waka, de ta kanda ta gafa Jehovah. I saandi pasa di de dou zuntu ka di feti o feti ö? Jehovah mbei dee sodati dee dë felantima u de, feti ku de seei. Di dee Isaëli sëmbë ko dou, hii dee sodati dee dë felantima u de dëdë!

Na wan köni soni Josafati du di a buta futoou a Jehovah u? Woo ko köni ee u seei buta futoou nëën tu.