Wan mujëë mii heepi wan makiti womi

I SABI andi di piki mujëë mii aki ta taki ö? A ta taki soni u Elisa, di tjabukama u Jehovah, da di mujëë. Söseei a ta konda dee foombo soni Jehovah ta heepi Elisa u du. Di mujëë an sabi soni u Jehovah biga an dë wan Isaëli sëmbë. Wë boo go luku faandi mbei di mujëë mii dë a di mujëë wosu.

Di mujëë da wan Silia sëmbë. Hën manu da Naaman, di hedima u dee sodati u Silia. Dee Silia sëmbë bi kisi di piki Isaëli mujëë mii aki tei, hën de tjëën go da Naaman mujëë faa toon futuboi fëën.

Naaman a’ wan taku siki de ta kai kököbë. Di siki aki sa njan so u dee pisi u wan sëmbë sinkii koti seei tuu. Fëën mbei di mujëë mii taki da Naaman mujëë taa: ’A bi o bunu ee mi masa bi sa go a di tjabukama u Jehovah a Isaëli. A bi o kula di kököbë fëën.’ Bakaten di mujëë konda di soni dëën manu.

Naaman kë bëtë seei. Fëën mbei a taki taa a o go a Isaëli. Di a dou ala, hën a go a Elisa wosu. Elisa piki di futuboi fëën faa go taki da Naaman be a go wasi seibi toon a Joodan Lio. Di soni dë mbei taa Naaman hati ko boonu seei. Hën a taki taa: ’Dee lio u di köndë u mi bunu möön hii dee lio u Isaëli!’ Di Naaman taki sö kaa, hën a hai go fëën.

Ma wan u dee futuboi fëën piki ën taa: ’Masa o, ee Elisa bi hakisi i fii du wan taanga soni, i bi o du ën. Wë nöö faandi mbei ja sa go wasi nöö, kumafa a taki?’ Naaman haika di futuboi fëën, hën a go doki seibi toon a Joodan Lio. Di a du sö kaa, hën di sinkii fëën ko bunu baka!

Naaman ta wai seei. A toona go a Elisa baka, hën a piki ën taa: ’Awa ufö mi dë seiki taa di Gadu u Isaëli da di wan kodo tuu Gadu u hii goonliba. Nöö gaantangi, tei di kado aki.’ Ma Elisa piki taa: ’Nönö, ma o tei ën e.’ Elisa sabi taa an bi o bunu ee a tei di kado, biga Jehovah hën bi kula Naaman. Ma Gehasi, di futuboi u Elisa, kë di kado fëën seei.

Nöö luku andi Gehasi du. Baka di Naaman go, hën Gehasi kule go kisi ën. Gehasi taki dëën taa: ’Elisa manda mi ko piki i taa a bi o kë wan tu u dee soni i bi o dëën, faa da wanlö mati di ko luku ën djunsu dë.’ Ma an dë u taki taa soni a ta mindi. Ma Naaman an sabi taa soni Gehasi ta mindi. Fëën mbei a dëën so u dee soni.

Di Gehasi toona go a wosu, nöö Elisa saandi a du kaa. Jehovah bi konda di soni dëën. Fëën mbei Elisa piki ën taa: ’U di i du di hogi aki, mbei di kököbë u Naaman o kisi i.’ Nöö sö a pasa wantewante dë!

Andi u sa lei u hii dee soni aki? Di fosu soni, hën da u musu dë kuma di piki mujëë mii, ta konda soni u Jehovah da wotowan. Sëmbë sa feni bunu ee u du sö. Di u tu, hën da wa musu a’ gaanfasi kumafa Naaman bi dë a fesi, ma u musu ta haika dee futuboi u Gadu. Di u dii, hën da wa musu mindi soni kumafa Gehasi du. Hia soni dë di u sa lei te u ta lesi di Bëibel, na sö nö?