Jona ku di gaan fisi

LUKU di womi a di wata dendu. Gaan soni ta miti ën, na sö nö? Di fisi o guli ën! I sa’ ambë da di womi dë u? Hën në da Jona. Boo go luku faandi mbei gaan soni ta miti ën sö.

Jona da wan tjabukama u Jehovah. Sati baka di di tjabukama Elisa dëdë, hën Jehovah piki Jona taa: ’Go a di gaan köndë de kai Ninifei. Dee sëmbë ta libi hogi a di köndë poi, nöö mi kë fii go bai de puu a di soni dë.’

Ma Jona an kë go. Fëën mbei a go tei wan sipi di an nango a di së u Ninifei. Jehovah an feni ën bunu taa Jona ta fusi go a wan woto köndë. Fëën mbei a manda wan gaan ventu ko. Di ventu taanga sö tee taa a fika piki möön, nöö di sipi singi. Dee botoma ko fëëë te na soni, hën de bai kai dee gadu u de u heepi de.

Te u kaba fëën Jona piki de taa: ’Mi ta dini Jehovah, di Gadu di mbei liba ku goonliba. Nöö mi ta fusi go fu ma du andi Jehovah hakisi mi u du.’ Hën dee botoma hakisi ën taa: ’Andi u musu du u tapa di gaan ventu?’

Jona piki de taa: ’Un tuwë mi go a di ze, nöö di ze o kötö piii.’ Dee botoma an kë du sö, ma di di gaan ventu ko möön taanga, hën te u kaba fëën de tuwë Jona go a di wata dubuu. Wantewante dë di ventu ko saka, hën di ze kötö piii.

Jona an kaba saka go a di wata seei, hën wan gaan fisi ko guli ën. Ma Jona an dëdë. A tan dii daka ndeti ku didia a di fisi dë bëë dendu. A ko hati Jona seei taa an haika Jehovah, nöö a ko hati ën taa an go a Ninifei tu. Nöö i saandi a du ö?

Jona begi Jehovah faa heepi ën. Hën Jehovah mbei di fisi balaki Jona puu tuwë a tela. Baka di dë, Jona go a Ninifei. Di soni aki an ta lei u taa a dë fanöudu u du hii soni Jehovah ta taki ö?