Jesosi dë ku libi

I SABI ambë da di mujëë ku dee tu womi aki ö? Di mujëë da Malia Magidaleina, a bi dë wan mati u Jesosi. Nöö dee womi dee dë ku weti bisi faan da engel. Di piki kamba ka Malia ta luku go aki da di kamian ka de bi buta di sinkii u Jesosi di a dëdë. Hën de ta kai geebi baaku. Ma di sinkii an sai naandë möön! Ambë tei ën puu dë? Wë boo go luku.

Baka di Jesosi dëdë, dee begima piki Pilati taa: ’Di Jesosi bi dë ku libi, a bi taki taa te a dëdë, nöö baka dii daka a bi o toona weki baka. Wë nöö u kë begi Gaama fuun buta sëmbë a di geebi be de watji ën. Nöö dee bakama fëën an o sa ko fufuu di sinkii fëën tja go u go piki sëmbë taa a weki baka a dëdë!’ Hën Pilati piki dee begima u de manda sodati go watji di geebi.

Ma fuukufuuku a di u dii daka baka di Jesosi dëdë, hën wan engel u Jehovah ko dou wantewante dë. A logoda di sitonu puu a di baaku buka. Dee sodati fëëë tee taa de an sa buli seei. Te u kaba fëën di de luku go a di baaku dendu, di sinkii an bi sai dë möön! Wan tu u dee sodati go a di foto go piki dee begima andi pasa. I saandi dee takuhati begima du ö? De paka dee sodati u de mindi soni. Dee begima piki dee sodati taa: ’Un musu taki taa dee bakama fëën bi ko a di ndeti di u bi ta duumi, hën de fufuu di sinkii tja go.’

A di ten dë seei wan tu u dee mujëë mati u Jesosi ko luku di baaku. De foondo seei di de si ën hooo! Hën Malia Magidaleina kule go piki Petuisi ku Johanisi. Te u de kë mëni, tu engel ku weti bisi faan ko dou a dee woto mujëë. Hën de hakisi de taa: ’Faandi mbei un ta suku Jesosi aki? A toona weki baka. Un go hesihesi go piki dee bakama fëën.’ Na piki kule dee mujëë kule e! Ma wan womi tapa de a di pasi liba. I sa’ ambë u? Jesosi wë e! Hën a piki de taa: ’Un go piki dee bakama u mi.’

Di dee mujëë piki dee bakama u Jesosi taa a dë ku libi, de si ën, nöö a bi taanga da dee bakama u biibi. Petuisi ku Johanisi kule go luku a di baaku, ma di baaku bi dë hooo! Di Petuisi ku Johanisi go, hën Malia Magidaleina di bi toona ko baka a di baaku fika a baka. A di ten dë wë a luku go a di baaku dendu, hën a si tu engel.

I saandi pasa ku di sinkii u Jesosi ö? Gadu mbei taa an dë u si möön. Gadu an bi weki Jesosi u libi ku di libisëmbë sinkii di a bi abi ufö a dëdë. A bi da Jesosi wan njunjun jeje sinkii kuma dee engel a liba. Ma kumafa woo lei, Jesosi sa tei sinkii di sëmbë sa si u lei dee bakama fëën taa a dë ku libi.