De dë a wan söötösöötö kamba

BAKA DI Petuisi ku Johanisi go kumutu a di baaku ka de bi buta di sinkii u Jesosi, hën Malia fika a baka. Malia bigi këë. Hën a bendi luku go a di baaku dendu kumafa u bi si a di lasiti peentje. Hën a si tu engel. Dee engel hakisi ën taa: ’Faandi mbei i ta këë sö?’

Malia piki taa: ’De tei di Masa u mi tja go, nöö më sabi naasë de tjëën go buta.’ Hën Malia bia luku hën a si wan womi. Di womi hakisi ën taa: ’Ambë i ta suku sö?’

Malia mëni taa di womi di ta wooko a di djai hën tei di sinkii u Jesosi tja go. Fëën mbei a taa: ’Ee ju hën tei ën tja go, piki mi ka i butëën.’ Ma di womi bi dë Jesosi tuutuu. A tei wan sinkii u Malia an sa si ën sabi. Ma di a kai Malia nëën në ufö a ko sabi taa Jesosi di dë. Hën a kule go piki dee bakama taa: ’Mi si di Masa!’

A di daka dë seei tu u dee bakama bi ta waka go a di köndë u Emausu, hën wan womi ko waka ku de. Dee bakama bi ta tjali seei u di de kii Jesosi. Ma hii fa de ta waka di womi ta konda soni u Bëibel, di bi mbei de ta fii bunu seei. Te wan pisi di de tapa u njan, ufö dee bakama ko sabi taa Jesosi hën bi da di womi. Di Jesosi an bi dë u si möön, hën dee bakama toona wantewante go a Jelusalen baka u go konda soni u Jesosi da dee apösutu.

Hii fa di soni dë ta pasa, Jesosi tjëën seei go lei Petuisi. Dee wotowan wai seei di de jei di soni aki. Tu u dee bakama go a Jelusalen hën de si dee apösutu. De konda da de unfa Jesosi ko a de di de bi dë a pasi liba. Nöö di juu ten de ta konda di soni aki, i sabi un foombo soni pasa u?

Luku di peentje. Jesosi ko a de hii fa di döö dë söötösöötö. Dee bakama bi wai seei! Na wan piizii daka disi ö? I sa konda un mëni pasi Jesosi tjëën seei go lei dee bakama fëën u? I konda feifi pasi ö?

Di apösutu Tomasi an bi dë ku de di Jesosi tjëën seei go lei de. Fëën mbei dee bakama piki ën taa: ’U si di Masa!’ Ma Tomasi taa ee hën seei an si Jesosi ku ën wojo, an o biibi. Wë aiti daka baka di dë, dee bakama bi dë a wan söötösöötö kamba, nöö Tomasi bi sai naandë tu. Wantewante Jesosi ko a di kamba dendu. Awa ufö Tomasi biibi.