Hakisi da dee sëmbë dee kë tei dopu

Pisi 3​—Di fasi fa Jehovah seti soni

Dee soni i lei u Bëibel mbei i ko sabi taa Jehovah kë u hii soni ko dë nëën basu baka, leti kumafa a bi dë a di bigi (1 Kol. 15:24-28; Ef. 1:8-10). Di i lei soni u Bëibel tee fa i dou ka i dë aki, nöö aan misi taa i kë dë a di seti u Jehovah, nöö i kë saka iseei a di tii fëën basu tu. Dee hakisi ku dee Bëibel tëkisi u di pisi aki o heepi i fii öndösuku iseei luku ee i fusutan andi a kë taki u saka iseei a di fasi fa Jehovah seti soni a di gemeente, a di wosudendu libi u Keesitu sëmbë, söseei andi a kë taki u saka iseei a dee tiima u di goonliba aki basu. Joo sa öndösuku un bigi i ta si dee soni Jehovah seti u lei dee sëmbë fëën soni, sö taa di biibi u de ko taanga. Wan tu u dee soni dë da di go i nango a dee komakandi ku di möiti i ta mbei u da piki teka maun fii langa dou.

Boiti di dë, a di pisi aki joo si faandi mbei a dë fanöudu u go nöömö a di Könuköndë pleikiwooko u heepi wotowan u ko sabi Jehovah ku dee soni di a ta du da libisëmbë (Mat. 24:14; 28:19, 20). Te u kaba fëën, a o mbei i fusutan bunu taa di buta i buta i libi a Jehovah Gadu maun ufö i tei dopu a wata, an dë wan pëëpëë soni. I sa dë seiki taa Jehovah kai ën wan gaan soni taa i lei ku hii i hati taa di bunuhati fasi di a abi da i, bigi da i seei.

1. Te i luku fa Gadu seti soni, nöö ambë da di hedima u wan mujëë di toou?

Un dee mujëë, un musu ta piki unu manu buka a soni e. Biga sö a fiti biibima u Masa Jesosi fu de musu libi.​—Kol. 3:18.

Dee mujëë, un musu ta saka da unu manu fu di un ta nama ku Masa Jesosi. Biga di womi hën da hedima fëën mujëë, leti kumafa Jesosi Keesitu dë hedima fuu dee sëmbë fëën. Hën seei da di Heepima fuu tu. Hën ku u dë leti kumafa sëmbë hedi ku ën sinkii dë, biga hën ta taki a u liba.​—Ef. 5:22, 23.

2. Unfa wan womi musu libi ku ën mujëë hii di a dë hedima fëën?

Dee womi musu ta lobi dee mujëë u de kuma deseei sinkii. . . . Te wan womi ta lobi ën mujëë, nöö hën da a ta lobi ën seei. Biga leti kumafa na wan sëmbë ta buuse hënseei sinkii ma a ta lobi ën ta dëën njanjan ta tjubi ën faa musu dë bumbuu, nöö leti sö nöö Masa Jesosi ta lobi u dee sëmbë fëën ta sölugu u fuu musu dë bumbuu.​—Ef. 5:28, 29.

Un dee womi dee abi mujëë a wosu, un musu lobi dee mujëë fuunu. Wan musu libi hogi ku de e.​—Kol. 3:19.

3. Wan mujëë di manu fëën an dë a di biibi an musu saka hënseei nëën manu basu ö?

Nöö awaa mi kë fan ku un dee mujëë dë ku manu taa be un ta saka unu seei a dee manu fuunu basu e. Nöö ee wan fuunu sai dë hën manu an piki di buka u Gadu eti, nöö a o bia piki ën söndö i fan ku ën. Biga a o si taa i ta libi wan gbelingbelin libi ku lesipeki u Gadu.​—1 Pet. 3:1, 2.

4. Ambë fosu Gadu da di wooko u lei dee mii soni, nöö a kiija de?

Un dee gaan sëmbë [dee tata, NW], wan musu ta libi ku dee mii fuunu a wan fasi di na fiti e, te de ko ta hoi unu a bëë. Ma un musu kiija de a wan leti fasi ta lei de kumafa Masa Gadu kë u de musu libi.​—Ef. 6:4.

5. Un wooko miii abi a di wosudendu kumafa a seti?

Un dee mii, un musu piki unu mama ku unu tata buka e, kumafa a fiti biibima u Masa Jesosi. Ja sabi fa a sikifi a Gadu Buku nö? A taa: I musu lesipeki i mama ku i tata. Hën da di fosu wëti di dë ku wan paamusi a dendu taa, ee i lesipeki i mama ku i tata nöö soni fii o waka bunu a di goonliba, nöö joo libi gaandi.​—Ef. 6:1-3.

Un dee mii, un musu ta piki dee gaan sëmbë fuunu buka a hii soni, biga sö Masa Jesosi kë fuun ta libi.​—Kol. 3:20.

6. Unfa a fiti u Keesitu sëmbë ta si dee tiima u di goonliba aki?

Hii sëmbë musu ta saka deseei a dee tii u lanti basu e. Biga na wan tii sa dë ee na Gadu hën dëën pasi. Gadu hën disa de be de ta tii kumafa de kë.​—Lom. 13:1, NW.

Toona mëni dee sëmbë fii dë, u de musu ta saka deseei a dee sëmbë basu dee ta tii di köndë e. De musu ta hoi dee wëti u di köndë tu.​—Tit. 3:1.

7. Keesitu sëmbë musu paka hii möni lanti hakisi de u de paka u?

Un musu ta paka de kumafa a fiti. Ee möni fuun da de, nöö un da de e. Ee a dë fuun lesipeki de, nöö un lesipeki de. Ee a dë fuun hei de, nöö un hei de.​—Lom. 13:7.

Woto Bëibel tëkisi: Luk. 20:21-25.

8. Soni dë di sa mbei taa wan Keesitu sëmbë an bi o kë haika dee tiima u di goonliba aki ö?

Di de kuutu tefa de kaba, hën de toona kai Petuisi ku Johanisi taa be de ko. Hën de ko dou. Hën de buta ku de seei taa de an musu ta kai di në u Jesosi ta lei sëmbë soni fëën möön a mundu. Nöö hën Petuisi ku Johanisi piki de taa: „Lanti, fa un taki da u aki, nöö u jei. Un bai u taa wa musu konda soni u Masa Jesosi. Ma Masa Gaangadu manda u fuu musu konda. Nöö unfa un mëni? Undi u dee buka un si kuma Masa Gaangadu o kë fuu musu piki? Wë nöö wa sa tjubi dee soni u wojo bi si ku dee u jesi bi jei. U musu konda de nöömö.”​—Tjab. 4:18-20.

Petuisi ku dee oto Tjabukama toona piki ën taa: „Aai, wë u jei, dee sëmbë. Ma Masa Gadu buka hën u musu piki möön gaanfa möön libisëmbë buka e.”​—Tjab. 5:29.

9. Lanti kë taa sëmbë musu go sikifi a lanti buku taa de toou, de pai wan mii, söseei de kë u sëmbë taki hii soni da de te de ta konda sëmbë, nasö te de musu mbei pampia da de. Ee dee wëti aki an ta pasa Gadu wëti, Keesitu sëmbë musu lesipeki de u?

A di ten dë . . . a [Këisë Aukesi] manda wan buka go a hii köndë ka a abi taki taa hii sëmbë musu go sikifi de në buta a lanti buku. . . . Nöö söseei Josëfu fu di köndë de kai Nazalëti a di pisiwata fu Galilea dë hopo tu, hën ku ën kiija mujëë Malia di bi dë ku di bëë. . . . Nöö hën de go fu de sikifi de në.​—Luk. 2:1-5.

Toona mëni dee sëmbë fii dë, u de musu ta saka deseei a dee sëmbë basu dee ta tii di köndë e. De musu ta hoi dee wëti u di köndë tu.​—Tit. 3:1.

10. Unfa soni seti a di Keesitu gemeente?

Mi kë fuun sabi wan tu soni möön eti. Nöö mi taki e, Masa Gadu hën da di hedima u Masa Jesosi Keesitu, nöö Masa Jesosi hën da di hedima u wan womi, nöö di womi hën da di hedima fëën mujëë.​—1 Kol. 11:3.

11. Ambë da di hedima u di Keesitu gemeente?

Ee i si ën, hën da i si di Gadu di wa sa si ku u wojo. Hën da di fosu soni di Gadu mbei. Biga ku di heepi fëën, Gadu mbei hii soni di dë a liba ala ku dee teeja u mundu ku dee soni a goonliba aki tuu, dee soni u sa si ku dee soni wa sa si, ee da könu sutuu nasö makiti nasö tii nasö lanti. Hii woto soni Gadu mbei ku di heepi fëën, nöö hën abi hii soni. Boiti di dë, a bi dë ufö hii woto soni, nöö ku di heepi fëën Gadu mbei hii soni. Hën da di hedi u di sinkii, di gemeente.​—Kol. 1:15-18, NW.

12. Unfa u sa ko sabi ambë da „di köni bumbuu futuboi” a di ten aki?

Ambë da di köni bumbuu futuboi di hën masa buta u luku dee woto futuboi fëën faa sa da de njanjan a di ten di fiti? Di futuboi dë musu wai seei, te hën masa dou, nöö a si taa sö a ta du! Mi ta piki unu gbelin taa a o butëën faa luku hii dee gudu fëën.​—Mat. 24:45-47, NW.

13. Un wooko dee gaanwomi dee ta tii di Keesitu gemeente a hii goonliba ta du?

Wanlö sëmbë kumutu a Judea Köndë . . . tja wan lei ko ta lei dee sëmbë fu Masa Jesosi taa ee ja koti i sinkii buta di maaka u Isaëli, nöö ja o feni di heepi u Gadu. Biga sö Gadu da Mosesi di wëti dë faa da dee sëmbë u Gadu. Sö de taki. Ma di Paulosu ku Banabasi ko jei taa sö de ta lei, hën de ta fia ku de ta taki da de taa di soni an dë sö. Nöö hën di fia ko wan gaan soni. Te wan pisi hën de ko si taa di taki musu koti. Hën de puu sëmbë u de manda go a Jelusalen go piki dee Gaan Tjabukama u Masa Jesosi ku dee oto tiima u keiki taki sö wan soni. Nöö unfa de musu du ku sö wan taki? Nöö Paulosu ku Banabasi ku wanlö oto biibima fu Antiokia dë, nöö de da dee sëmbë de puu fu go jei di taki da de.​—Tjab. 15:1, 2.

Nöö hën de ta waka nango a dee köndëköndë. Nöö hii fa de nango dë, nöö di buka di dee Gaan Tjabukama u Masa Jesosi ku dee oto tiima u keiki a Jelusalen bi da de, hën de ta tja go da dee biibima fu de musu jei, be de hoi di taki kumafa de bi kuutu buta. Nöö fa de ta du dë, nöö a ta heepi dee sëmbë u Masa Jesosi gaanfa, dee ta miti makandi a dee köndëköndë. Biga de ta kisi kaakiti nango fesi seei a di biibi, nöö hiniwan daka möön hia sëmbë ta piki di buka ta ko ta nama ku de.​—Tjab. 16:4, 5.

14. Ambë ta tei kamian da Keesitu di dë hedima u di gemeente?

Un musu buta mëni a unuseei ku dee sëmbë Gadu da unu fuun luku leti kumafa sikapuma ta luku dee sikapu fëën, biga santa jeje hën buta unu fuun luku di gemeente u Gadu di a bai ku di buuu u di Womi Mii fëën.​—Tjab. 20:28, NW.

Mi kë fan ku unu dee sëmbë dee ta dë tiima fu otowan. . . Un musu ta luku dee sëmbë u Gadu bunu, dee dë a unu maun dë. Un musu dë da de kuma wan sëmbë ta luku sikapu ta tja de buta a pasi tololoo fu de an kaba a sösö. Sö un musu ta dini de tjika. Nöö wan musu ta du ën a wan duwengi fasi e, ma be un ta du ën ku piizii, ku wai hati seei. Biga sö Gadu kë. Nöö wan musu du ën tu fu di un giii u möni hedi, ma fu di un abi wan gaan hangi a unu hati fu heepi sëmbë. Fa Gadu buta dee sëmbë a unu maun fuun ta luku de dëën dë, nöö wan musu ta pëë basi a de liba e, ma be un ta libi ku de a wan suti fasi fu de sa djeesi unu.​—1 Pet. 5:1-3.

15. Unfa dee sëmbë u di gemeente ta lei taa de ta saka deseei a Keesitu basu di dë hedima u di gemeente?

Un musu ta mëni dee fesima fuunu e, dee bi tja di buka u Gadu ko konda da unu. Un musu luku un wini de wini a di libi u de, nöö un ta djeesi de a di fa de ta biibi.​—Heb. 13:7.

Un musu ta saka unu seei a dee fesima fuunu dee ta heepi unu a di biibi e. Te de taki wan soni da unu, nöö be un ta piki de buka. Wë biga de da dee sëmbë dee ta luku unu fu hati fuunu dë a Gadu nöömö, nöö te wan daka de o piki Gadu soni fëën. Hën mbei un musu ta piki de buka a soni, be de sa dë waiwai a di wooko u de. Wan musu mbei de dë fukafuka, biga ee nasö nöö an o tja bunu ko da unu tu.​—Heb. 13:17.

16. Ambë pakisei sikifi a di Bëibel? Faandi mbei i musu ta lei soni u Gadu Wöutu hii ten?

Gadu seei wë mbei sëmbë sikifi hii dee soni dee dë a Gadu Buku. Dee soni aki bunu u lei u soni, u bai u a soni, u leti u buta a pasi, u gandji da u sö taa u sa libi tololoo. A sö wan fasi di sëmbë u Gadu sa dë kabakaba, seekaseeka u du hiniwan bumbuu wooko.​—2 Tim. 3:16, 17, NW.

A lobi di wëti u Jehovah, ndeti ku didia a ta lesi hën wëti sapisapi. Sö wan sëmbë o ko dë kuma wan pau di paandi a wata bandja, di ta da fuuta te juu fëën dou, nöö uwii fëën an ta dëë. Hii soni di sëmbë dë o du, o waka bunu.​—Ps. 1:2, 3.

Woto Bëibel tëkisi: Deto. 17:18-20; Nöng. 2:1-6.

17. Faandi mbei a bunu u go a dee komakandi di di gemeente seeka? Un möiti i ta mbei u go a de?

Miseei futu o taanpu a wan kamian di dë palalaa sö. Mi o gafa Jehovah te mi dë a hia sëmbë dendu dee ko makandi a wan kamian.​—Ps. 26:12.

Un boo buta mëni a di fa u sa du heepi u seei fuu libi bunu ta lobi u seei makandi. Wan boo disa u ta miti makandi e, kumafa so sëmbë ta disa. Ma un boo ta ko makandi ta da u seei taanga nöömö. Di soni dë, a dë gaan fanöudu soni da unu e, fa un ko ta si taa di daka ta zuntu.​—Heb. 10:24, 25.

18. Faandi mbei i musu ta da piki a dee gemeente komakandi ee i abi di okasi?

Mi o konda i në da dee baaa u mi. A dee sëmbë dee ko makandi mindi mi o gafa i.​—Ps. 22:22.

Leti kumafa felu ta maa felu, sö nöö wan womi ta mbei wan woto womi ko saapu tu.​—Nöng. 27:17.

A dë fuu ta gafa Gadu nöömö. Biga te u du sö, nöö a o dë kuma wan suti peesenti u ta tja ko dëën ta dëën tangi. Nöö di lö peesenti dë, a fiti wi dee sëmbë dee ta piki taa u ku ën nama.​—Heb. 13:15.

19. Faandi mbei u musu du bumbuu soni u lei taa u abi biibi?

Ee wan sëmbë taa a ta biibi a Gadu ma an ta libi a di fasi u sëmbë sa si taa a ta biibi, nöö di biibi dë, a dë wan sösö biibi dëën. Aan heepi. A kandë fa mi ta taki aki, sëmbë dë a unu dendu dë di o sa kë fia ku mi taa: „Wë i sabi nö? I, i ta hoi Gadu wëti ta du soni kumafa Gadu kë, ma mi, ma dë sö. Mii ta biibi a mi hati nöö a kaba.” Ma nöö ee wan sëmbë taki sö da mi, nöö i sabi fa mi o piki ën nö? Mi o piki ën taa: „Wë, i sabi nö? Fa mi dë aki, ee sëmbë luku mi libi te de kaba nöö de o si taa mi ta libi a di fasi. Mi ta biibi a Gadu tuu. Ma, fa ii sai dë, ee de luku libi fii te de kaba, nöö de o si taa ja ta libi a di fa. Nöö unfa de o du sabi taa i ta biibi a Gadu?” Biga leti kumafa wan sinkii söndö akaa [jeje, NW] aan libi, nöö söseei biibi ku buka söndö du aan na wan wojo heepi tu.​—Jak. 2:17, 18, 26.

20. Un fanöudu wooko Bëibel ta lei taa Keesitu sëmbë musu du fajafaja?

Di bunu buka u di Njunjun Tii u Gadu [könuköndë, NW] musu paaja te dou hii goonliba e, be hii föluku musu jei. Nöö baka u di dë ufö di ten u dë aki o kaba.​—Mat. 24:14.

Un musu ta waka a dee köndëköndë u goonliba ta paaja di buka u mi da hii sëmbë, be de bia ko dë bakama u mi kuma unu. Nöö un musu dopu de a di në u mi Tata ku di në u mi di Mii fëën aki ku di në u di Akaa [santa jeje, NW] fu mi Tata tu. Nöö un musu ta lei de u de piki hii dee soni tuu dee mi manda unu fuun musu ta du kaa.​—Mat. 28:19, 20.

21. I ta paaja di bunu buka u di Könuköndë da wotowan u? Unfa i ta du ën?

Ma hoi na wan soni a baka di sa heepi unu a unu libi e. Mi konda dee wöutu u Masa da unu a lanti fesi te kisi ku unu wosu dendu tuu. Sö mi bi ta lei unu tjika fuun sa fusutan. Mi bi ta bai hii sëmbë a unu dë, dee Dju sëmbë ku dee na Dju tuu, taa be de disa dee hogilibi u de bia ko a di së u Masa Gadu, be de ko biibi a u Masa Jesosi Keesitu liba.​—Tjab. 20:20, 21.

A bigi ta taki nango ta ko. . . ku dee sëmbë a bi ta miti a wojowojo kamian.​—Tjab. 17:17, NW.

22. Faandi mbei i musu si di faantiwöutu di i abi u pleiki di bunu njunsu da wotowan kuma wan gaan soni?

Mi piki unu gbelin taa di buuu fuunu an dë a mi liba. Biga ma hoi baka möönsö fu konda da unu fa Masa Gadu kë heepi libisëmbë tjika.​—Tjab. 20:26, 27.

Fa mi ta konda di Buka aki, na u di dë hedi mbei mi ta njan buka e. Biga musu mi musu u kondëën da sëmbë. Nöö helu u mi tu ee ma kondëën.​—1 Kol. 9:16.

23. A di ten aki unfa u sa heepi u mbei di Könuköndë wooko go a fesi ku dee gudu u abi?

Bigi Jehovah ku dee gudu i abi ku dee fosu fuuta u di goon fii. Nöö dee suwa fii o fuu pasa maaka, nöö njunjun win o fuu a dee baki ka i ta mbii doloifi tee taa a o ta kai.​—Nöng. 3:9, 10.

24. Unfa u sa lei dee baaa ku sisa dee abi heepi fanöudu taa u lobi de?

Ee wan oto biibima kuma i ko a i, hën a taa aan koosu faa bisi ee nasö aan soni u njan, nöö hën i taki dëën taa: „Masa Gadu musu dë ku i e, mati. Go këndë faja nöö i njan be bëë fii fuu,” ma fa i taki dë seei ja dëën wan wojo soni, nöö hën da i heepi ën nö? Nönö.​—Jak. 2:15, 16.

Woto Bëibel tëkisi: Nöng. 3:27; Jak. 1:27.

25. Unfa u musu si di da u musu da useei ku dee gudu fuu a di dini u Jehovah?

Ambë da mi, nöö ambë da dee sëmbë u mi, sö taa u sa da i dee lö soni aki? Biga i da u hii soni u abi, nöö dee soni i da u, de u ta toona da i baka.​—1 Klon. 29:14.

Ee wan sëmbë o da, nöö be a da ku piizii nëën hati, ma na ku guunjan kuma sëmbë duwengi ën. Biga di sëmbë di ta da soni ku wai nëën hati, hën Gadu ta lobi.​—2 Kol. 9:7.

26. Unfa u musu dë te sëmbë ta du ku u nasö te u ta kisi tesi?

Un dë bunu e, dee sëmbë, ee sëmbë ta suku unu a toobi fu di un ta libi bunu a Gadu wojo hedi. Biga sö wan sëmbë dë a di Tii u Masa Gadu dendu kaa. Nöö un dë bunu e, dee sëmbë, ee sëmbë ta kosi unu ta toobi unu ta mindi hii sootu pei hogi ta buta a unu hedi fu di un ta waka a mi baka hedi. Un musu ta wai da di dë e. Un musu ta piizii seei, biga a Masa Gadu Köndë ala woon feni wan gaan paima. Biga leti sö nöö wë de bi du ku dee tjabukama u Gadu dee bi dë bifö unu.​—Mat. 5:10-12.

Te soni miti unu a peipei futu nöö an musu bigi da unu poi e, ma wai un musu ta wai. Biga hën da Masa Gadu ta tesi unu ta luku ee woon biibi ën go dou. Nöö te bakaten nöö joo si bunu fëën nöömö, biga ee ja disa di biibi i ta biibi nëën, nöö joo ko a’ degihati fii hoi go dou.​—Jak. 1:2, 3.

Hën dee Tjabukama kumutu a di kuutu seei ku wai, fu di Masa Gadu bi si taa de bumbuu tjika u de tja sen fu Masa Jesosi në hedi.​—Tjab. 5:41.

27. Ambë u musu ta begi, nöö na ambë në u musu ta begi?

I da di Sëmbë di ta haika begi. A i hii pei sëmbë o ta ko suku heepi.​—Ps. 65:2.

Nöö di juu naandë, nöö wan o ta hakisi dee lö hakisi dë möön tu. Nöö mi taki e baa, taa hiniwan soni di woon begi mi Tata a mi në, nöö woon feni ën e.​—Joh. 16:23.

Woto Bëibel tëkisi: Joh. 14:6.

28. Unfa u musu begi te nöö Jehovah haika dee begi fuu?

Te joo begi nöö ja musu ta du ën kumafa dee sëmbë ta pëë deseei u bumbuu sëmbë ta du. Biga de lobi u hopo begi a keiki dendu ee nasö a ganda mindi, be hii sëmbë musu si taa sö de sabi u begi tjika. Mi taki da unu taa fa i si dee lö sëmbë sai dë, de an o kisi na wan wojo soni a Gadu e. Tuu fëën seei wë di dë kaa. Ma te joo begi, nöö be i go fii a i dendu wosu nöö i tapa i döö, nöö i begi i Tata ka i dë tapatapa döö dë te i kaba. Nöö i Tata di ta si andi ta pasa a tjubii, hën o da i di paima fii. Nöö te joo begi tu, nöö ja musu ta hai di fan nango langalanga nöömö e, kumafa dee sëmbë u di goonliba aki dee an sabi Gadu ta du. Fa de sai u de dë, de ta mëni taa te de ta begi longi sö nöö Gadu musu u jei de. Ma na sö un musu begi e. Biga ufö un go u go begi seei, nöö Gadu sabi gaanduwe kaa andi ku andi un abi fanöudu.​—Mat. 6:5-8.

29. Fu un pei soni i sa begi?

A di fasi aki un musu ta begi e: „U Tata di dë a liba ala, be di në fii ko dë santa. Be di könuköndë fii ko. Be di kë fii pasa a goonliba aki leti kumafa a ta pasa a liba ala. Da u di bëëë di u a’ fanöudu fuu pasa di daka u tide, da u paadon u dee zöndu fuu leti kumafa u ta da wotowan paadon u dee zöndu de ta du ku u. Na disa u be soni pooba u e, ma puu u a di hogi maun dendu.”​—Mat. 6:9-13, NW.

U sabi tu taa te u begi ën wan soni, nöö ee di begi kai ku di pakisei fëën, nöö a o jei.​—1 Joh. 5:14.

30. Un kaakiti di fasi fa u ta tja useei sa abi a dee begi fuu liba?

Un dee womi dee dë ku mujëë, un musu ta fii da dee mujëë fuunu e. Un musu ta lesipeki de fu di de da di möön suwaki wan. Wë biga fa un sai dë, unu ku de tuu o feni di libi u Gadu makandi di a o da unu ku ën bunuhati fu di un dë sëmbë fëën. Nöö te un ta libi bunu ku dee mujëë fuunu, nöö Gadu o piki dee begi fuunu tu. Biga Gadu ta luku dee sëmbë ta libi bunu nëën wojo faa heepi de, nöö a dë setiseti jesi faa jei dee begi u de. Ma di sëmbë di ta du hogi, hën a o bia baka da.​—1 Pet. 3:7, 12.

Woto Bëibel tëkisi: Jes. 1:15-17.

31. Faandi mbei Jehovah Kotoigi ta dopu sëmbë a wata te de tei di biibi u Keesitu?

Un musu ta waka a dee köndëköndë u goonliba ta paaja di buka u mi da hii sëmbë, be de bia ko dë bakama u mi kuma unu. Nöö un musu dopu de a di në u mi Tata ku di në u mi di Mii fëën aki ku di në u di Akaa [santa jeje, NW] fu mi Tata tu.​—Mat. 28:19.

Di juu dë, hën Masa Jesosi kumutu a di köndë de kai Nazalëti u di pisiwata de kai Galilea, nöö hën a ko a Joodan Lio naandë fu Johanisi musu dopu ën. Nöö hën Johanisi dopu ën te a kaba.​—Maik. 1:9.

32. Faandi mbei te wan sëmbë butëën libi a Jehovah maun nöö a tei dopu, a fiti u kai ën Jehovah Kotoigi?

„Unu da kotoigi u mi”, sö Jehovah taki. „Unu da dee sëmbë mi tei u dë futuboi u mi. Sö woon ko sabi mi, nöö woon biibi mi, nöö woon fusutan taa hii juu mi ta dë di wan Sëmbë. Ufö mi na wan Gadu bi dë, nöö baka mi na wan Gadu ko dë tu. Mi, awa, mi da Jehovah. Boiti mi heepima an dë. Miseei wë bi taki a fesi andi bi o pasa, mi heepi unu, nöö mi konda dee soni aki da unu di na wan woto gadu bi dë a unu mindi. Fëën mbei unu da kotoigi u mi, nöö mi da Gadu,” sö Jehovah taki.​—Jes. 43:10-12.

LASITI FAN KU DEE SËMBË DEE KË TEI DOPU

De guwenti u dopu sëmbë a dee gaan komakandi u Jehovah Kotoigi. A kaba u di dopu taki, di takima o hakisi dee sëmbë dee kë tei dopu u de hopo taanpu, nöö de piki dee tu hakisi aki be hii sëmbë jei:

I kaba ku dee zöndu fii u di i ta biibi a di lusupaima u Jesosi Keesitu, nöö i buta i libi a Jehovah maun u du di kë fëën u?

I ta fusutan taa di buta i buta i libi a Jehovah maun ku di dopu fii, ta lei wotowan taa i da wan Kotoigi u Jehovah di nama ku di ölganisaasi fëën di a ta tii ku ën santa jeje u?

Te dee sëmbë dee kë dopu piki aai a dee hakisi aki, hën da ’ku de buka de ta piki taa’ de a’ biibi a di lusupaima, söseei taa de buta de libi ku telu a Jehovah maun (Lom. 10:9, 10). Fëën mbei dee sëmbë dee kë tei dopu musu begi nöö de musu pakisei fundu u dee hakisi aki a fesi sö taa de sa piki kumafa deseei ta pakisei.

● Andi fiti fii bisi te joo tei dopu? (Joh. 15:19; 2 Kol. 6:3; Fil. 1:10; 1 Tim. 2:9)

U di di dopu da wan gaan soni, mbei dee sëmbë dee o tei dopu ta bisi koosu di fiti di okasi dë. Fëën mbei an bi o fiti u wan Keesitu sëmbë bisi sun koosu di ta puu ën sinkii a döö. Söseei an bi o fiti u bisi futjufutju koosu tu. Boiti di dë an bi o fiti ee de bisi koosu teka peipei soni sikifi nasö di ta mbei popokanda. A sö wan fasi di dopu o tan dë wan lesipeki soni, nöö a o dë gbelingbelin u si taa u tooka u di goonliba aki.

● Unfa wan sëmbë musu dë te a ta dopu? (Luk. 3:21, 22)

Di dopu u Jesosi ta lei fa Keesitu sëmbë musu dë te de ta tei dopu a di ten aki. Jesosi bi fusutan taa dopu da wan gaan soni, nöö a bi dë u si a di fasi fa a bi dë ku dee soni a bi du. Fëën mbei an bi o fiti u mbei sipootu, sun nasö du woto soni a di dopu kamian, di sa mbei sëmbë si di dopu kuma wan pëëpëë soni. Söseei an bi o fiti taa di sëmbë di dopu ta du kuma a wini wan gaan soni. Hii fa dopu da wan piizii okasi, tökuseei di piizii musu piizii a wan lesipeki fasi.

● Faandi mbei a dë taanga fanöudu u abi di guwenti u lei soni u Bëibel, nöö i nango hii ten a di pleikiwooko, baka te i tei dopu seei tu?

● Unfa di nama di joo nama ku di gemeente o heepi i fii tan hoi iseei a di buka di i mbei ku Jehovah?

● Baka di u luku hii dee soni aki, i dë seiki taa i musu tei dopu a di fosu okasi i kisi ö?

WAN TU SONI DA DEE GAANWOMI U GEMEENTE

Te wan pleikima di an dopu jeti mbei dee gaanwomi ko sabi taa a kë tei dopu, nöö de musu dëën degihati be a go luku „Hakisi da dee sëmbë dee kë tei dopu” a bladsëidë 8. Söseei de musu mbei a buta mëni a „Wan bosikopu da di pleikima di an dopu jeti”, bigi a bladsëidë 4, di ta konda fa a sa tei seeka da dee hakisi di dee gaanwomi o buta dëën. Kumafa a sikifi naandë, di sëmbë di kë tei dopu sa luku dee soni a sikifi a pampia, nöö a sa luku nëën buku tu te hën ku dee gaanwomi o fan. Ma an dë fanöudu u sëmbë luku dee hakisi makandi ku ën ufö a miti dee gaanwomi.

De musu piki di fesima u dee gaanwomi taa sö wan sëmbë kë tei dopu. Te de da di sëmbë di kë tei dopu ten tjika faa luku dee hakisi, nöö di fesima u dee gaanwomi o seeka soni sö taa wan tu u dee gaanwomi tei dee hakisi u fan ku di sëmbë. An dë fanöudu u wakiti te wan gaan komakandi o dë ufö de sa luku dee hakisi ku ën. De sa tei wan juu longi sö u luku hiniwan u dee dii pisi. Ma an dë wan föutu soni u tei möön ten u luku dee pisi aki ee a dë fanöudu. Di sëmbë di kë dopu nasö di gaanwomi di ta fan ku ën an musu biinga u kaba dee hakisi hesihesi. Ee a kan, na di wan seei gaanwomi musu luku hiniwan u dee pisi ku di sëmbë. A bi o bunu u bigi nasö kaba hiniwan pisi ku wan begi.

A möön bunu u luku dee hakisi apaiti ku hiniwan sëmbë di kë tei dopu, ma na a kulupu. Te di sëmbë di kë tei dopu piki hiniwan u dee hakisi, nöö dee gaanwomi o si gbelingbelin unfa a fusutan dee lei tjika, nöö de an o panta ee di sëmbë dë kabakaba u tei dopu. Boiti di dë, kandë di sëmbë di kë tei dopu o fan möön waiwai te a dë hën wanwan. Ma de sa fan ku wan womi ku ën mujëë makandi. Te di sëmbë di kë tei dopu da wan sisa, nöö soni musu seeka sö taa di gaanwomi ku di sisa an dë de wanwan.

So toon a bi o fiti u luku dee hakisi makandi ku möön hia sëmbë wan pasi. A bi o dë wan bunu soni u miti wan womi ku ën mujëë nasö sëmbë u di wan wosudendu, ee de bi lei soni u Bëibel makandi, nöö de kë tei dopu a di wan daka. Nasö ee di gemeente abi hia sëmbë di kë tei dopu, ma de aan gaanwomi tjika, nöö a bi sa dë fanöudu taa wan gaanwomi miti makandi ku tu nasö dii sëmbë di kë tei dopu. Dee gaanwomi musu wegi soni go ko te de o du sö wan soni.

Dee gaanwomi musu ko sabi ee di sëmbë di kë tei dopu sabi dee möön fanöudu lei u Bëibel. Söseei de musu dë seiki ee di sëmbë di kë tei dopu ta si di tuutuu lei kuma wan gaan soni ku ee a ta lesipeki di ölganisaasi u Jehovah kumafa a fiti. Ee di sëmbë an fusutan dee möön fanöudu lei u Bëibel, nöö dee gaanwomi o seeka soni u heepi ën sö taa a sa dou dee maaka u tei dopu a wan woto okasi. So sëmbë abi möön ten fanöudu u lei taa de kai di pleikiwooko gaan soni nasö taa de ta saka deseei a dee seti u di ölganisaasi. Dee gaanwomi de musu sabi unfa de o wooko ku di juu de abi u luku hiniwan pisi ku di sëmbë sö taa de fusutan bumbuu ee di sëmbë di kë tei dopu dë kabakaba u tei dopu. Hii fa möön ten sa dë fanöudu da so hakisi möön wotowan, tökuseei de musu luku hii dee hakisi.

Baka di u dii pisi, nöö dee gaanwomi dee bi fan ku di sëmbë o miti makandi u fiti buka ee di sëmbë sa tei dopu nasö ee an dou dee maaka. Dee gaanwomi o luku unfa di sëmbë dë, andi a sa du, nasö woto soni fëën. Di möön fanöudu soni di u ta luku, hën da dee sëmbë hati musu dë a Jehovah, nöö de musu fusutan andi dee möön fanöudu lei u Bëibel kë taki. Di lobihati fasi fa woon heepi dee sëmbë dee kë tei dopu, o mbei de dë seekaseeka u bigi di wooko di wan Keesitu sëmbë musu du, nöö de o sa kaba di gaan wooko aki.

Bakaten wan nasö tu u dee gaanwomi dee bi fan ku di sëmbë musu miti ku ën baka u piki ën ee a dou dee maaka u tei dopu nasö ee an dou de. Ee di sëmbë dou dee maaka, nöö dee gaanwomi musu luku di pisi „Lasiti fan ku dee sëmbë dee kë tei dopu”, di dë a bladsëidë 56, 57. Di fan dë aan fu pasa teni miniti.

Soni di i kë hoi a pakisei