WOTO 59
I sa hoi dou aluwasi sëmbë ta du ku i
Hiniwan Keesitu sëmbë musu hoi a pakisei taa abiti möön nasö a di ten di ta ko, sëmbë o kë tapa u fu wa dini Jehovah möön. Söseei de o kë du hogi ku u tu. Ma di soni dë musu mbei u fëëë u?
1. Faandi mbei u musu dë ku di mëni taa sëmbë o du ku u?
Di Bëibel ta piki u gbelingbelin taa: „Sëmbë o du ku hii dee sëmbë dee kë dini Gadu fajafaja kuma bakama u Jesosi Keesitu” (2 Timoteo 3:12). De bi ta du ku Jesosi u di an bi dë wan pisi u di goonliba u Saatan. U di useei an dë wan pisi u di goonliba aki, mbei an ta foondo u te dee tiima u di goonliba aki ku dee keiki ta du ku u.—Johanisi 15:18, 19.
2. Unfa u sa seeka a fesi da di du di sëmbë o du ku u?
Nöunöu kaa u musu du soni di o heepi u fuu ko ta möön futoou Jehovah. Buta ten a wan së fii ta begi Gadu hiniwan daka, söseei fii ta lesi di Wöutu fëën. I musu nango a dee komakandi hii juu tu. Dee soni aki o da i degihati fii sa hoi dou te sëmbë o du ku i, aluwasi famii fii seei. Sëmbë bi du ku apösutu Paulosu sömëni pasi tu, ma a bi sikifi taa: „Jehovah hën da mi Heepima. Ma o fëëë.”—Hebelejën 13:6.
U sa ko abi möön degihati tu te u ta du di peleikiwooko hii juu. Di peleikiwooko ta heepi u fuu buta futoou a Jehovah, söseei fu wa fëëë libisëmbë (Nöngö 29:25). Ee i abi degihati u ta peleiki nöunöu kaa, nöö di soni dë o heepi i fii sa peleiki go dou aluwasi lanti tapa di wooko fuu.—1 Tesalonika 2:2.
3. Un wini u ta feni te u ta hoi dou te sëmbë ta du ku u?
An dë wan piizii soni te sëmbë ta du ku u, ma te u ta hoi dou, nöö di soni dë ta mbei di biibi fuu ko möön taanga. U ta ko möön zuntu ku Jehovah, te u ta si fa a ta heepi u te u ta fii taa wa sa möön. (Lesi Jakobosi 1:2-4.) A ta hati Jehovah te a ta si fa sëmbë ta du ku u, ma a ta wai te a si fa u ta hoi dou. Di Bëibel ta taki taa: „Ee i ta hoi dou te i ta kisi sitaafu, u di i ta du bunu, nöö di soni dë ta kai ku Gadu” (1 Petuisi 2:20). Di paka di Jehovah o da dee sëmbë dee ta hoi dou, da teego libi a wan goonliba ka woo sa dini ën fiifii, söseei ka sëmbë an o ta du ku u möön.—Mateosi 24:13.
WOTO SONI DI I SA LEI
Woo si taa u sa hoi useei a Jehovah hii fa sëmbë ta du ku u, söseei woo si unfa Jehovah o paka u.
4. I sa hoi dou hii fa dee famii fii ta du ku i
Jesosi bi sabi taa so u dee famii fuu an bi o kë fuu dini Jehovah. Lesi Mateosi 10:34-36, nöö piki di hakisi aki:
Andi dee famii u wan sëmbë sa taki nasö du u di a kë dini Jehovah?
Ee i kë si woto u sëmbë di dee lö soni aki bi miti, nöö pëë di FËLÖN, nöö piki di hakisi aki.
Andi i bi o du ee wan famii fii nasö wan mati fii ta pooba u tapa i fu ja dini Jehovah?
Lesi Psalöm 27:10 ku Maikusi 10:29, 30. Baka te i lesi hiniwan u dee tëkisi aki, nöö piki di hakisi aki:
Unfa di paamusi aki sa heepi i te dee famii fii nasö dee mati fii ta pooba u tapa i fu ja dini Jehovah?
5. Dini Jehovah go dou hii fa sëmbë ta du ku i
U abi degihati fanöudu u dini Jehovah te sëmbë ta pooba u tapa u fuu dini ën. Pëë di FËLÖN, nöö piki di hakisi aki.
Unfa dee baaa ku dee sisa u di fëlön da i taanga?
Lesi Tjabukama 5:27-29 ku Hebelejën 10:24, 25. Baka te i lesi hiniwan u dee tëkisi, nöö piki di hakisi aki:
Faandi mbei u musu peleiki go dou, söseei nango a dee komakandi aluwasi lanti tapa di wooko fuu?
6. Jehovah o heepi i fii sa hoi dou
Dee Jehovah Kotoigi a hii së u goonliba, njönkuwan ku gaanwan tuu bi dini Jehovah go dou ku hii de hati, hii fa sëmbë bi du ku de. Ee i kë si andi bi heepi de, nöö pëë di FËLÖN. Baka di dë, nöö piki di hakisi aki.
Andi bi heepi dee Kotoigi a di fëlön u de bi sa hoi dou?
Lesi Loomë 8:35, 37-39 ku 1 Kolenti 10:13. Baka te i lesi hiniwan u dee tëkisi, nöö piki di hakisi aki:
Unfa di tëkisi aki ta mbei i dë seiki taa joo sa hoi dou, aluwasi un tesi ta miti i?
Lesi Mateosi 5:10-12, nöö piki di hakisi aki:
Faandi mbei i sa ta dë waiwai hii fa sëmbë ta du ku i?
Milionmilion dinima u Jehovah ta hoi dou hii fa sëmbë ta du ku de. Iseei sa hoi dou tu!
SO SËMBË TA TAKI TAA: „Ma o sa hoi dou te sëmbë ta du ku mi.”
Un tëkisi sa da de di degihati di de abi fanöudu?
ANDI I LEI?
Jehovah ta tei di möiti di u ta mbei u dini ën u bigi seei hii fa sëmbë ta du ku u. U ta hoi dou, u di Jehovah ta heepi u!
Andi i bi o piki?
Faandi mbei Keesitu sëmbë musu hoi a pakisei taa sëmbë o du ku de?
Andi i sa du nöunöu kaa fii sa dë seekaseeka te sëmbë o du ku i?
Andi sa heepi i fii sa dë seiki taa joo sa dini Jehovah go dou aluwasi un tesi ta miti i?
WOTO SONI DI I SA LUKU
Luku di fëlön aki fii si unfa Jehovah bi heepi wan njönku baaa di de bi buta a dunguwosu u di an bi kë toon sodati.
Luku di fëlön aki fii si unfa Jehovah bi heepi wan baaa ku hën mujëë u de hoi dou, di lanti bi tapa di wooko fuu sömëni jaa longi.
Lesi di woto aki fii si andi sa heepi i fii hoi dou te sëmbë ta du ku i.
„Seeka iseei nöunöu kaa da di du di sëmbë o du ku u” (Di Hei Wakitimawosu, u baimatu-liba 2019)
Lesi di woto aki fii si unfa u musu si di du di dee famii fuu ta du ku u u di biibi fuu hedi, nöö andi u sa du u hoi dou.