Wan biifi u di Tii Kulupu

Un dee lobi baaa ku sisa fuu:

„Wë nöö dee sëmbë, u kë fuun ko sabi taa hibiwanten te u ta begi nöö u ta mëni hii unu tuu a u Tata Masa Gaangadu fesi. U ta dëën tangi da unu seei. Biga u ta mëni fa un ta biinga da di wooko u Gadu fu di un ta biibi ën hedi, nöö u ta mëni tu fa un ta wooko taanga fu di di lobi u Gadu dë a unu hati. U ta mëni fa un ta tai hati a dee sitaafu dee un ta tja naandë te go dou, fu di un ta mëni dee soni Masa Jesosi Keesitu paamusi u taa de o pasa nöömö. Dee lö soni dë wë mbei u ta dëën tangi da unu e” (1 Tes. 1:2, 3). Dee wöutu aki ta lei fa u lobi unu tjika! U ta da Jehovah tangi fuunu hedi, söseei u ta dëën tangi u di taanga wooko di un ta du. Unfa sö?

A di jaa di pasa dë, u si fa un bi ta „biinga da di wooko u Gadu fu di un ta biibi ën hedi”, nöö u ta mëni tu fa un bi „wooko taanga fu di di lobi u Gadu dë a unu hati”. Un bi lei taa un ta du soni di nama ku di Könuköndë. Sömëni fuunu bi suku fasi u wooko möön taanga a di peleikiwooko. So fuunu bi foloisi go heepi a woto kamian nasö a woto köndë ka de bi abi möön hia Könuköndë peleikima fanöudu. Wan tu fuunu bi seti soni u peleiki a kamian ka hia sëmbë ta waka pasa. Sömëni fuunu bi dë kabakaba u tei di heepi pioniliwooko a di pisiten di u bi ta mëni di dëdë u Jesosi, söseei a di liba di di keling-gaanwomi bi ko a di kemeente, nasö a di pisiten di u bi ta paati di fanöudu pampia a tanvuuwata-liba a di jaa 2014. Hii fa wa abi dee seei bookohedi a di libi, tökuseei u ta si taa un ta wooko da Jehovah ku hii unu hati. Nöö fëën mbei u ta gafa unu (Kol. 3:23, 24). Di biinga di un ta „biinga da di wooko u Gadu fu di un ta biibi ën hedi” ta da u pasi fuu sa da Jehovah tangi!

Söseei u ta tei ën u bigi taa un ta „wooko taanga fu di di lobi u Gadu dë a unu hati”, nöö di soni dë bi mbei taa un bi heepi u mbei Könuköndë zali, bëikantoo ku kantoo ka de ta puu buku ko a woto töngö a hii së u goonliba. U abi dee kamian aki fanöudu seei, u di dee sëmbë u Jehovah ta ko möön hia (Jes. 60:22). Pakisei di soni aki pikisö, di jaa di pasa dë u bi dou 8.201.545 peleikima, nöö hiniwan liba u bi ta lei 9.499.933 sëmbë soni u Bëibel. U di di wooko nango a fesi, mbei sömëni u dee bëikantoo musu mbei ko möön bigi. Di soni aki kë taki taa u abi möön hia Könuköndë zali fanöudu! A di wan seei ten u abi möön kantoo fanöudu a sömëni kamian u goonliba, sö taa dee baaa ku sisa fuu dee ta puu buku ko a woto töngö, sa ta wooko, söseei u libi a di kamian ka de ta fan di töngö di de ta puu.

Fëën mbei a bi o bunu fuu hakisi useei: ’Andi mi sa du u heepi u mbei Könuköndë zali, nasö dee kantoo ka baaa ku sisa o ta puu buku?’ So fuu o sa go heepi ku dee wooko aki. Ee u sa’ u du di wooko aki nasö ee wa sabi ën seei, tökuseei hiniwan fuu abi di gaandi u tei dee gudu dee u abi u heepi u du dee fanöudu wooko aki (Nöng. 3:9, 10). Di dee Isaëli sëmbë bi ta mbei di tenti u Gadu, hën de bi ta tja soni ko tee taa de bi piki de u de an tja ko möön (Ëki. 36:5-7). A musu u dë sö taa dee woto aki ta dou u hati seei, nöö de ta da u taanga u du di seei soni tu. Di möiti di un ta mbei u du dee wooko aki da Gadu ta lei taa un ta „wooko taanga fu di di lobi u Gadu dë a unu hati”, nöö di soni aki ta da u pasi fuu sa da Jehovah tangi tu!

Di hoi di dee baaa fuu ta hoi dou, da wan u dee soni di ta mbei u ta dë waiwai seei. Luku di woto u dee baaa fuu a Zuid-Kolea. Sensi di jaa 1950, hën de ta söötö dee njönku baaa fuu a di köndë dë, u di de an kë go nama ku na wan politiki soni u di köndë. Sömëni jaa kaa dee baaa fuu ta hoi dou hii fa de ta du ku de. Di hoi di de ta hoi dou ta taanga di biibi fuu seei!

A di köndë de kai Elitelea, de söötö dii u dee baaa fuu pasa 20 jaa kaa. A woto köndë, de bi söötö so u dee sisa fuu ku dee mii u de u wan sati pisiten. U mbei sömëni möiti u lanti bi sa puu de a dunguwosu, ma soni an waka kumafa u bi kë. Dee baaa ku sisa fuu an bi bia baka da di biibi u de. De tan hoi deseei a Jehovah hii fa de ta miti dee gaan tesi dë. Wa ta fëëkëtë u begi da dee baaa ku sisa fuu aki dee ta hoi deseei a Jehovah.​—Lom. 1:8, 9.

A dë sö tuu taa de an söötö sömëni fuu u di biibi fuu hedi. Ma tökuseei sömëni fuu ta ko gaandi, ta suwaki, ta miti tesi u di di manu nasö di mujëë fuu an dë a di biibi, söseei u ta abi woto booko hedi di woto sëmbë an sabi. Ma hii fa a dë sö, tökuseei un ta dini Jehovah ku hii unu hati go dou! (Jak. 1:12). U ta gafa unu seei. Di dini di un ta dini Jehovah go dou ku hii unu hati, da wan woto soni di ta da u pasi fuu da Jehovah tangi.

Awa, di taanga wooko di un ta du, di möiti di un ta mbei, ku di fasi fa un ta hoi dou, ta mbei taa u sa „da Jehovah tangi, biga a abi bunuhati” (Ps. 106:1). U lobi hiniwan fuunu seei, nöö u ta begi Jehovah da unu faa da unu taanga, faa heepi unu, söseei faa limbo di pasi fuunu fuun sa ta dini ën u teego.

Dee baaa fuunu,