Woo bigi ku wan apaiti peleikiwooko a wajamaka-liba u bigi lei sëmbë soni u Bëibel

A wajamaka-liba woo mbei hii möiti u lei hiniwan sëmbë di u miti soni u Bëibel ku di brochure I sa dë waiwai u teego! Kandë dee peleikima sa buta u du di heepi pioniliwooko di liba dë, nöö de sa wooko 30 juu. Unfa woo du di apaiti peleikiwooko aki?

• Te i miti wan sëmbë di fosu pasi: Wooko ku di pisi di dë a baka u di brochure u hai di sëmbë pakisei, nöö pooba u lei ën unfa u ta lei sëmbë soni u Bëibel. Na fëëkëtë dee sëmbë dee i bi peleiki da di bi kë sabi möön soni. Aluwasi de an bi kë lei soni ku u a di ten di pasa, a sa dë sö taa dë sa kë ko lei soni a di njunjun fasi fa u ta lei sëmbë soni ku di njunjun brochure aki. Wa musu disa na wan brochure a baka da sëmbë di an bi kë haika u, söseei wa musu buta brochure makandi ku wan biifi manda da dee lö sëmbë dë tu. Di diniwooko komite sa seeka soni u möön peleikiwooko komakandi sa hoi di liba dë.

• A woto okasi: Ee di kemeente fii ta wooko ku di bukuwagi, nöö i sa buta di peentje u di brochure I sa dë waiwai u teego! a di bukuwagi. Ee wan sëmbë kë di brochure, nöö i sa piki ën tu taa ee a kë, nöö u sa lei ën soni ku di brochure söndö faa paka. Lei ën kölö sö unfa u ta lei sëmbë soni u Bëibel nasö i sa mbei wan buka ku ën u lei ën wan woto daka. Di diniwooko-gaanwomi sa hakisi baaa ku sisa di dou dee maaka u de go a dee kamian ka gaangaan masikapei dë, u de hakisi sëmbë ee de kë lei soni u Bëibel. I sa hakisi dee sëmbë dee i ku de ta wooko a di wan kamian ee de kë lei soni u Bëibel nasö woto sëmbë di i ta miti a woto kamian te i ta peleiki.

Jesosi bi piki u taa u musu „mbei sëmbë ko dë bakama fëën”, söseei u musu „lei de soni.” (Mt 28:19, 20) Fëën mbei, mbei di apaiti peleikiwooko aki heepi u fuu dou di maaka dë te woo wooko ku di brochure I sa dë waiwai u teego!