Na pakisei iseei nöö

SÖMËNI sëmbë u di ten aki ta suku u feni apaiti gaandi, de ta suku u feni leti a soni, nasö de ta kë u sëmbë hei de möön wotowan. Aluwasi ee de feni dee soni di de kë, tökuseei de ta pakisei taa de abi leti u feni möön soni jeti. Dee lö sëmbë dë ta pakisei deseei nöö. De an ta dë tifeedi ku dee soni di de abi. Di Bëibel bi taki taa sö sëmbë bi o ta libi a dee lasiti daka u di goonliba aki.—2 Tim. 3:2.

Tuu taa di fasi u libi aki an dë wan njunjun soni. Te u luku Adam ku Eva, nöö de bi kë taki da deseei andi bunu ku andi an bunu, nöö di soni aki mbei taa hii u tuu ta tja sitaafu. Bakaten, hën wan Könu u Juda de kai Usia bi pakisei taa a bi sa tja soni go tjuma a di Wosu Gadu, ma an abi bi leti u du di soni dë seei (2 Klon. 26:18, 19). Sö nöö dee Faliseima, ku dee Saduseima bi ta pakisei taa Gadu bi musu libi bunu ku de möön wotowan, u di de bi dë bakamii u Abahamu.—Mat. 3:9.

U ta libi a wan goonliba ka sëmbë ta pakisei deseei nöö, nöö useei sa ko ta pakisei sö tu (Gal. 5:26). U sa bigi ta pakisei taa u abi leti u kisi wan apaiti gaandi, nasö taa a fiti u sëmbë ta libi ku u a wan apaiti fasi. Andi sa heepi u fu wa pakisei sö? Wë, u musu fusutan unfa Jehovah ta si di fasi u pakisei aki. Boo luku tu mama wëti u Bëibel di o heepi u.

Jehovah hën ta taki andi u fiti u kisi. Buta pakisei a dee soni aki.

Jehovah kë taa wan womi musu fii taa hën mujëë ta lesipeki ën, söseei taa wan mujëë musu fii taa hën manu lobi ën (Ef. 5:33). Sëmbë di tööu abi leti u kai lobi ku deseei wanwan nöö. De an musu kai lobi ku woto sëmbë (1 Kol. 7:3). Mama ku tata abi di leti u kë taa dee mii u de ta piki de buka a soni. Dee mii abi di leti u kë taa dee gaansëmbë u de lobi de, söseei taa de ta sölugu de.—2 Kol. 12:14; Ef. 6:2.
Dee gaanwomi ta wooko taanga a di kemeente, nöö a fiti fuu lesipeki de (1 Tes. 5:12). Ma hii fa a dë sö, tökuseei de an abi leti u pëë basi dee baaa ku dee sisa u de.—1 Pet. 5:2, 3.
Gadu da dee tiima di leti u hakisi lantimöni, söseei a da pasi taa sëmbë sa lesipeki de.—Lom. 13:1, 6, 7.

Dee soni dee Jehovah da u hia möön dee soni dee u abi leti u feni. U da zöndu libisëmbë, nöö di wan kodo soni di u abi leti u feni da dëdë (Lom. 6:23). Ma tökuseei Jehovah da u sömëni gaan bunu u di a lobi u (Ps. 103:10, 11). U di Jehovah abi bunuhati, mbei u feni hii dee bunu soni, ku dee gaandi dee u abi.—Lom. 12:6-8; Ef. 2:8.

ANDI O HEEPI U FU WA TA PAKISEI USEEI NÖÖ, SÖSEEI FU WA FII KUMA U BUNU MÖÖN WOTOWAN

Köni fu ja ko ta pakisei kuma dee sëmbë u di goonliba u Saatan aki. Ee wa mëni, nöö u sa ko ta pakisei taa u fiti u feni möön hia soni möön wotowan. Jesosi bi lei unfa di soni aki sa pasa di a bi konda di woto u dee wookoma di de bi paka wan dinai nöö. Wantu u dee wookoma bi bigi wooko fuukufuuku mamate, hën de wooko hii di daka dë a di sonu mindi. Ma wotowan bi wooko wan kodo juu longi nöö. Dee sëmbë dee bi wooko hii di daka bi feni taa de bi abi leti u kisi möön hia möni, u di wooko di de bi du (Mat. 20:1-16). Jesosi ta lei u ku di woto aki taa, dee dinima u Jehovah musu dë tifeedi ku dee soni dee Gadu kë da de.

Wantu u dee wookoma u di woto di Jesosi bi konda, ta kaagi di Masa u de. — Dee womi dee bi wooko hii di daka bi ta mëni taa de bi o feni möön hia möni

Dë ku tangi a hati, nöö na ta pakisei taa wotowan musu du soni da i (1 Tes. 5:18). I sa djeesi Paulosu u di an bi ta hakisi dee baaa ku dee sisa u Kolenti dee soni dee a bi abi fanöudu, hii fa a bi abi leti u du sö (1 Kol. 9:11-14). U musu ta wai ku hii dee soni dee wotowan ta da u, söseei wa musu ta hakisi sëmbë u da u soni ku taanga.

Apösutu Paulosu ku tu woto womi ta mbei wan tenti makandi. — Apösutu Paulosu an bi ta dë ta hakisi dee baaa ku dee sisa fëën u de heepi ën ku möni

Abi sakafasi. Te wan sëmbë ta fii hënseei, nöö a ta si kuma a abi leti u feni möön hia soni möön dee a abi kaa. Ma ee u abi sakafasi, nöö a o heepi u fuu wa ko ta si soni sö.

Dee peentje: 1. Di tjabukama Daniëli di a ko gaandi. 2. Di awooten foto Babilon. 3. Daniëli ku dee dii Hebelejën mati fëën, di a bi möön njönku. — Jehovah bi lobi Daniëli gaanfa seei u di a bi abi sakafasi

Di tjabukama de kai Daniëli da wan sëmbë di bi lei taa a abi sakafasi. A bi kumutu a wan wosudendu di sëmbë bi ta lesipeki, a bi hanse, a bi köni, söseei a bi sa’ u du sömëni soni. Fëën mbei a bi sa si kuma a bi fiti u sëmbë libi ku ën a wan apaiti fasi, nasö taa a abi leti u feni dee apaiti gaandi dee a bi abi (Dan. 1:3, 4, 19, 20). Ma Daniëli bi abi sakafasi, nöö u di soni dë mbei Jehovah bi lobi ën gaanfa seei.—Dan. 2:30; 10:11, 12.

Be wa ta pakisei useei nöö, kumafa sömëni sëmbë u di ten aki ta du. Ma boo ta wai ku dee soni dee Jehovah ta da u, u di a abi bunuhati pasa maaka.