Faandi mbei u ta tei ën u bigi taa Jehovah ta da sëmbë paadon?

1-2. Na un futu soni dë da libisëmbë, kumafa a dë da di njönku kijoo di u taki soni fëën a palaklafu 1?

BOO taa wan njönku kijoo mama ku hën tata gudu. Wan daka hën wan gaan soni pasa. Hën mama ku hën tata ko dëdë. Di soni dë bi hebi dëën seei. Ma wan woto soni bi mbei di soni ko möön hebi dëën. A ko jei taa hën mama ku hën tata poi di gudu u di famii, nöö de bi ko abi gaan paima u paka. A ko dë taa ka u di njönku kijoo feni di gudu fëën mama ku hën tata, hën a ko abi paima u paka. Nöö dee sëmbë ta ko ta mbei toobi ku ën, u di de kë di möni u de. Ma di paima di a musu paka hia sö tee taa nöiti a o sa pakëën.

² Wë u sa taki taa soni dë da u kuma di njönku kijoo aki. Adam ku Eva da di fosu mama ku di fosu tata fuu. De an bi abi zöndu, nöö de bi ta libi a wan waiti paladëisi (Ken. 1:27; 2:7-9). De bi o sa libi u nöömö, söndö u soni makei de. Ma hii soni bi ko tooka. De lasi di kamian ka de bi ta dë, ku di libi di de bi o sa libi u teego. Wë nöö andi de disa a baka da dee mii u de? Di Bëibel ta piki u taa: „Wan womi tja zöndu ko a goonliba, nöö di zöndu tja dëdë ko. Hën mbei dëdë paaja da hii libisëmbë biga hii de tuu du zöndu” (Lom. 5:12). Di soni di Adam disa da u da zöndu, nöö di soni dë hën ta mbei u ta dëdë. Di zöndu dë, dë kuma wan gaan paima, di na wan fuu sa paka.​—Ps. 49:8.

3. Faandi mbei u sa tei zöndu maaka ku paima?

³ Jesosi bi tei zöndu maaka ku paima (Mat. 6:12; Luk. 11:4). Te u du zöndu, nöö a ta dë kuma u abi wan paima u paka Jehovah. U musu paka di paima u di zöndu di u du dë. Ee di paima dë an paka, nöö woo dëdë. Di fasi dë da di wan kodo fasi fa u sa pakëën.​—Lom. 6:7, 23.

4. (a) Andi bi o pasa ku hii zöndu libisëmbë ee wa bi feni heepi? (Psalöm 49:7-9) (b) Andi di wöutu „zöndu” kë taki a di Bëibel? (Luku di pisi „zöndu”.)

⁴ U sa toona feni hii dee soni dee Adam ku Eva lasi ö? Wë useei an sa du soni u toona feni dee soni dee Adam ku Eva lasi dë. (Lesi Psalöm 49:7-9.) Ee wa bi feni heepi, nöö wa bi o sa dë ku di mëni taa woo weki ko a libi baka te u dëdë. U bi o ta dëdë, nöö soni fuu kaba dë, leti kumafa a dë da dee mbeti.​—Peleik. 3:19; 2 Pet. 2:12.

5. Unfa di Tata fuu di lobi u heepi u paka u dee zöndu fuu? (Luku di peentje u .)

⁵ Toona buta pakisei a di njönku kijoo di u bi taki soni fëën a bigi u di woto. Unfa a bi o fii ee wan gudu womi ko piki ën taa a o paka hii dee paima fëën dëën? Wë an dë u taki taa a bi o tei ën u bigi seei taa di womi kë heepi ën, söseei a bi o dëën pasi faa heepi ën. Wë Jehovah, di Tata fuu di lobi u, du sö wan soni da u. A da u wan kado di puu u a di paima di Adam bi buta u. Jesosi bi konda di soni aki da u. A bi taki taa: „Masa Gadu lobi libisëmbë sö tee taa a da de di wan kodo Womi Mii fëën, sö taa di sëmbë di ta biibi a di mii fëën liba, an sa lasi go kaba a sösö, ma a sa feni di libi u teego” (Joh. 3:16). Böiti di dë, di kado aki ta jabi pasi da u fuu ku Jehovah ko dë mati.

6. Fuun soni woo taki a di woto aki, nöö faandi mbei woo taki soni u de?

⁶ Unfa u sa feni wini u di gaan kado di ta jabi pasi da u fuu sa feni paadon u dee zöndu fuu, nasö di ta mbei taa dee paima fuu sa paka? Wë di Bëibel ta piki di soni dë, te a ta taki u di kë di Jehovah kë fuu ku ën ko dë bunu baka, u di soni di a seeka fuu ku ën sa ko bunu baka, u di lusupaima, u dee wini dee u ta feni u di soni di a seeka da u, söseei u di si di a ta bia ko ta si u kuma sëmbë di ta libi a wan leti fasi. A di woto aki, woo taki u hiniwan u dee soni aki. Te u ta kai pakisei a dee soni dee Jehovah du faa sa da u paadon, nöö woo ko ta möön tei dee soni dë u bigi.

DI SONI DI JEHOVAH KË: A KË FUU KU ËN KO BUNU BAKA

7. (a) Un woto soni Adam ku Eva lasi? (b) Andi u musu mbei möiti u du, u di u dë bakamii u Adam ku Eva? (Loomë 5:10, 11)

⁷ Na lasi nöö Adam ku Eva lasi di okasi di de bi abi u libi u teego, ma de ku de Tata Jehovah, an bi ko dë mati möön tu. Bigibigi, Adam ku Eva bi dë sëmbë u di wosudendu u Jehovah (Luk. 3:38). Ma di de pasa hën buka, hën a puu de u de an dë sëmbë u di wosudendu fëën möön. Di soni dë pasa ufö de pai miii (Ken. 3:23, 24; 4:1). U di u dë bakamii u de, mbei a dë fanöudu fuu ku Jehovah ko dë bunu baka. (Lesi Loomë 5:10, 11.) Fuu taki ën, nöö u musu mbei möiti fuu ku Jehovah ko dë bunu. Wan buku ta taki taa di Giiki wöutu di de puu ko „ko fii ku” wan sëmbë, sa kë taki „ko dë mati ku wan sëmbë di i ku ën bi dë felantima”. A dë wan gaan soni seei, taa Jehovah seei hën hopo du wan soni fuu ku ën sa ko dë bunu baka. Unfa sö?

DI FASI FA JEHOVAH SEEKA SONI: A JABI PASI DA U FUU KU ËN SA KO DË MATI

8. Andi Jehovah seeka da u?

⁸ Jehovah seeka soni fëën ku zöndu libisëmbë sa ko dë bunu baka. A seeka soni da u fuu sa toona feni di soni di Adam bi lasi, u di a paka ku wan soni di bi dii leti kuma di soni di Adam bi lasi. Dee Giiki Buku u Bëibel seei ta taki soni u di fasi fa Jehovah jabi pasi da sëmbë u de ku ën sa ko ta dë fiifii.​—Loomë 3:25.

9. Andi Jehovah bi seti u wan pisiten, sö taa a bi sa ta da dee Isaëli sëmbë paadon u dee zöndu u de?

⁹ U di Jehovah bi kë jabi pasi da dee Isaëli sëmbë fëën ku de bi sa ko dë mati, mbei a bi seti wan soni faa bi sa ta da de paadon u dee zöndu u de. Di soni dë bi o dë u wan pisiten nöö. Dee Isaëli sëmbë bi musu ta hoi wan apaiti piizii daka hiniwan jaa. A di daka dë, di Gaan Mindima bi ta tjuma mbeti da Gadu, sö taa Gadu bi sa da dee Isaëli sëmbë paadon u dee zöndu u de. An dë u taki taa dee mbeti di de bi ta tjuma dë an bi o sa tapa dee zöndu u de te dou, u di libisëmbë bunu möön mbeti. Ma solanga dee Isaëli sëmbë bi ta tjali u dee zöndu u de, söseei solanga de bi ta tjuma mbeti da Jehovah kumafa a bi hakisi de, nöö Jehovah bi ta dë kabakaba u da de paadon (Heb. 10:1-4). Boiti di dë, di soni di Jehovah bi seti dë, söseei di tja di dee Isaëli sëmbë bi musu ta tja soni go tjuma da Jehovah faa sa da dee paadon u dee zöndu u de, bi ta heepi de u de fusutan taa de da zöndu libisëmbë. Söseei a bi ta heepi de u de fusutan taa wan woto soni bi o dë fanöudu, di bi o sa tapa dee zöndu u de te dou.

10. Andi Jehovah seeka sö taa a sa da sëmbë paadon u dee zöndu u de?

¹⁰ Jehovah bi abi wan soni a pakisei kaa di a bi o seti, sö taa a bi sa ta da sëmbë paadon u dee zöndu u de. A bi seeka soni u di lobi Womi Mii fëën bi sa „ko dëdë paka paima wan pasi nöö, faa sa tja dee zöndu u sömëni sëmbë” (Heb. 9:28). Jesosi lasi hën „libi paka paima fu sömëni hia sëmbë sa ko bunu ku Gadu” (Mat. 20:28). Andi da wan lusupaima?

DI LUSUPAIMA: DI PAIMA DI PAKA FUU KU GADU SA KO DË MATI

11. (a) Faandi mbei wan lusupaima bi musu paka? (b) Andi bi o dë fanöudu u di paima dë bi sa paka?

¹¹ Di Bëibel ta taki taa Jehovah bi buta taa wan lusupaima bi musu paka sö taa u bi sa feni paadon u dee zöndu fuu, söseei fuu ku ën bi sa ko dë mati. Andi da di paima di bi musu paka u libisëmbë bi sa toona feni di soni di Adam bi lasi? Hoi a pakisei taa Adam ku Eva bi ko dë zöndu libisëmbë, söseei taa de bi lasi di okasi di de bi abi u libi u teego. Hën da di paima di bi musu paka bi musu hei kuma di soni di bi lasi (1 Tim. 2:6). Fuu taki ën, nöö wan womi di bi abi dee dii soni aki nöö bi o sa paka di paima dë. (1) An bi musu abi zöndu, (2) a bi musu abi di okasi u libi u teego, söseei (3) a bi musu dë kabakaba u dëdë paka di paima da u. Te soni bi dë a di lö fasi aki, ufö di sëmbë dë bi o sa paka ku di libi fëën u toona bai di libi di Adam bi lasi.

12. Faandi mbei Jesosi bi sa paka di lusupaima?

¹² Boo taki u dii soni di mbei taa Jesosi bi sa paka di lusupaima. (1) An bi abi zöndu. ’An bi du zöndu wan daka’ (1 Pet. 2:22). (2) Di soni dë mbei taa a bi sa libi u teego a goonliba aki. (3) A bi dë kabakaba u dëdë da u fuu sa libi go dou nëën kamian (Heb. 10:9, 10). Jesosi an bi abi zöndu, leti kumafa di fosu womi de kai Adam an bi abi zöndu bigibigi (1 Kol. 15:45). Nöö u di Jesosi dëdë da u, mbei a bi sa paka di paima di bi dë fanöudu u toona bai di soni di Adam bi lasi (Lom. 5:19). A sö wan fasi Jesosi bi ko dë „di lasiti Adam”. An dë fanöudu möön u wan woto sëmbë di an abi zöndu ko paka u bai di soni di Adam bi lasi. Jesosi dëdë ’wan kodo pasi tö, fu nöömö’.​—Heb. 7:27; 10:12.

13. Unfa di lusupaima nama ku di da di Gadu ta da sëmbë paadon?

¹³ Wë nöö unfa di lusupaima nama ku di da di Gadu ta da sëmbë paadon? Gadu seeka soni faa sa ta da zöndu libisëmbë paadon, sö taa de ku ën sa ko bunu baka. Ma u di soni dë bi sa pasa, nöö di lusupaima bi musu paka. Di paima dë, da di libi u Jesosi di an bi abi zöndu.​—Ef. 1:7; Heb. 9:14.

DEE WINI DEE U TA FENI: JEHOVAH PUU U A ZÖNDU KU DËDË BASU, NÖÖ A KO TA SI U KUMA SËMBË DI TA LIBI A WAN LETI FASI

14. Fuun soni woo taki nöunöu, nöö faandi mbei woo taki u di soni dë?

¹⁴ Unfa u ta feni wini u di soni di Jehovah du da u? Fuu sa ko sabi di soni aki, nöö woo taki u tu soni di di Bëibel lo’ u taki, u heepi u fuu ko fusutan unfa u ta feni wini u di da di Jehovah ta da sëmbë paadon.

15-16. (a) Andi di Bëibel kë taki, te a ta taki taa u ko fii? (b) Unfa di soni dë ta mbei u fii?

¹⁵ Di Bëibel ta taki taa u di Jehovah ku Jesosi paka di lusupaima da u, mbei u ko fii. Apösutu Petuisi bi taki taa: „Wë biga an dë taa wan soni di sa poi kaba a sösö kuma möni sö a tei paka puu unu a di sösö libi di un bi lei a dee gaan sëmbë fuunu e. Ma di buuu u [Jesosi] Keesitu di dii möön hii soni, hën wë paka puu unu. Fa de kii ën dë, nöö a bi dë kuma dee sikafu mii de bi ta kii ta paka paima u hogi du nöömö naandë. Nöö leti kumafa dee sikafu mii bi musu dë gbelingbelin söndö föutu, nöö söseei Masa Jesosi bi dë tu.”​—1 Pet. 1:18, 19.

¹⁶ U di Jesosi dëdë paka paima da u, mbei u sa kumutu a zöndu ku dëdë basu (Lom. 5:21). U ta tei ën u bigi seei taa Jehovah ku Jesosi mbei u ko fii ku di buuu u Jesosi.​—1 Kol. 15:22.

17-18. (a) Andi u musu fusutan te di Bëibel ta taki taa Jehovah ta si u kuma sëmbë di ta du soni a wan leti fasi? (b) Un wini di soni dë ta tja ko da u?

¹⁷ Di Bëibel ta taki taa Jehovah ta si dee dinima fëën kuma sëmbë di ta du soni a wan leti fasi. Di soni dë kë taki taa an ta hakisi u fuu paka u dee zöndu dee u ta du. Wë hii fa Jehovah an ta hakisi u fuu paka u dee zöndu fuu, tökuseei a ta hoi hënseei a di leti fasi fa a ta du soni. Na bunu u bunu sö mbei a ta si u kuma sëmbë di ta du soni a wan leti fasi, söseei na lobi a lobi zöndu libi tu. Ma Jehovah ta dë kabakaba u da u paadon u dee zöndu fuu, u di u ta lei taa u ta biibi di soni di hën ku Jesosi du da u.​—Lom. 3:24; Gal. 2:16.

¹⁸ Un wini u ta feni te Jehovah ta si u kuma sëmbë di ta du soni a wan leti fasi? So sëmbë feni wini u di soni dë, u di Jehovah tei de u de go tii ku Jesosi a liba ala, söseei de ko dë miii u Jehovah (Tit. 3:7; 1 Joh. 3:1). Jehovah da de paadon u dee zöndu u de. A ko dë kuma nöiti de bi du zöndu wan daka, nöö a sö wan fasi pasi ko jabi da de u de sa dë a di Könuköndë u Gadu (Lom. 8:1, 2, 30). Wanlö woto sëmbë di Gadu ta si kuma sëmbë di ta du soni a wan leti fasi o libi u teego a goonliba aki. Jehovah da de paadon u dee zöndu u de, nöö de ko dë mati fëën (Jak. 2:21-23). Dee gaan hia sëmbë dee o pasa Amagedon libilibi abi di okasi u na dëdë nöiti möön (Joh. 11:26). Dee sëmbë dee dëdë, „dee bi libi bunu a Masa Gadu wojo ku dee an bi libi bunu tuu” o weki ko a libi baka (Tjab. 24:15; Joh. 5:28, 29). Te u kaba fëën, hii dee dinima u Jehovah dee o dë a goonliba aki, dee o ta piki hën buka o „ko fii. Nöö de o feni di gaan waiti u de, di dee mii u Gadu ta abi” (Lom. 8:21). U dë seei ta wakiti di ten ka woo sa ko dë miii fuu Tata Jehovah a sö wan fasi!

19. Unfa soni ko dë da u u di Jehovah ku Jesosi heepi u? (Luku di pisi „Di da di Jehovah ta da sëmbë paadon”.)

¹⁹ U sa taki taa soni bi dë da u tuutuu kuma di njönku kijoo di u bi taki soni fëën a bigi u di woto aki. A bi abi wan gaan paima u paka, di an bi o sa paka nöiti. Ma Jehovah heepi u. Soni ko dë woto fasi da u, u di Jehovah seeka soni da u fuu sa feni paadon u dee zöndu fuu, söseei u di Jesosi paka di lusupaima da u. U di u ta buta biibi a Jesosi Keesitu, mbei u sa kumutu a zöndu ku dëdë basu. Boiti di dë, te Jehovah da u paadon u dee zöndu fuu, nöö a ta dë seei kuma nöiti u bi du zöndu wan daka. Ma di möön gaan soni, hën da u ku Jehovah di Tata fuu di dë a liba ala, söseei di lobi u, sa ko dë gaan mati.

20. Fuun soni woo taki a di woto di ta ko?

²⁰ Te u ta kai pakisei a di soni di Jehovah ku Jesosi du da u, nöö möönmöön woo ta tei di soni dë u bigi (2 Kol. 5:15). Ee de an bi heepi u, nöö soni fuu bi o kaba a mundu! Ma un wini hiniwan fuu ta feni u di Jehovah ta da u paadon? Woo taki u di soni dë a di woto di ta ko.