Be Jehovah tjubi di toou libi fii sö taa soni ta waka bunu da i

1, 2. (a) Faandi mbei 24.000 Isaëli sëmbë bi lasi di gaan bunu di de bi o feni? (b) Faandi mbei u musu hoi di woto aki a pakisei?

KÖLÖ SÖ ufö dee Isaëli sëmbë go a di Paamusi Köndë, hën sömëni dusu womi go „duumi ku dee mujëë u di köndë Moab”. Te u kaba fëën Jehovah kii 24.000 u dee Isaëli sëmbë. Dee Isaëli sëmbë wakiti sömëni jaa longi u go a di Paamusi Köndë, nöö de bi dë sö zuntu u go nëën ! Ma a bi tjali taa de bi lasi di gaan bunu di de bi o feni, u di de bi go libi fanafiti a di së u manu ku mujëë.​—Nöbu 25:1-5, 9.

² Di tjali woto aki bi „pasa kuma wan wasiköi da u dee sëmbë dee ta libi a di kaba ten u di goonliba di u dë aki” (1 Kolenti 10:6-11). U ta libi a di kaba pisiten u dee „lasiti daka u di goonliba aki”, nöö u dë zuntu u di njunjun goonliba (2 Timoteo 3:1; 2 Petuisi 3:13). Ma a tjali taa so u dee dinima u Jehovah disa di fasi fa Jehovah bi lei de u libi, hën de go du fanafiti soni a di së u manu ku mujëë. Nöunöu de ko ta fii di hogi u dee soni di de du, nöö ee de an tjali u dee soni dë, de an o sa libi u teego a di Paladëisi a goonliba.

3. Faandi mbei womi ku mujëë di toou abi Jehovah fanöudu u tii de, söseei u tjubi de? (Luku di peentje a bigi u di woto.)

³ Womi ku mujëë di toou abi Jehovah fanöudu u tii de, söseei u tjubi de u di toou libi u de sa ta waka bunu, u di manu ku mujëë soni nöö dee sëmbë u di goonliba aki ta pakisei (Lesi Psalöm 127:1). A di woto aki, woo taki u soni di sa heepi womi ku mujëë di toou u soni ta waka bunu a di toou libi u de. De musu ta tjubi de hati, de musu ta ko möön zuntu ku Gadu, de musu tei di njunjun libi di Gadu da u, de musu ta fan ta fusutan deseei, söseei de musu ta da deseei andi womi ku mujëë di toou musu ta da deseei.

TJUBI I HATI

4. Faandi mbei so Keesitu sëmbë bi go du fanafiti soni a di së u manu ku mujëë?

⁴ Unfa a sa ko pasa taa wan Keesitu sëmbë go du fanafiti soni a di së u manu ku mujëë? Wë a ta bigi ku dee soni di sö wan sëmbë ta luku. Jesosi bi taki gbelin taa: „Di sëmbë di ta luku wan mujëë kuma a kë tei ën, nöö nëën hati a tei ën kaa e” (Mateosi 5:27, 28; 2 Petuisi 2:14). Sömëni Keesitu sëmbë di go du fanafiti soni a di së u manu ku mujëë, an bi ko ta si soni a wan bunu fasi möön, u di de bi luku manu ku mujëë soni di de ta kai porno, de bi lesi manu ku mujëë woto, nasö de luku soni a Internet di na fiti seepiseepi. Wotowan bi luku fëlön nasö woto soni a teefei ka manu ku mujëë soni bi dë gbelingbelin u si. Boiti di dë, wotowan bi go a bajawosu, de bi go a kamian ka sëmbë ta baja ta puu koosu a sinkii nasö de bi go a kamian ka de ta pusa sinkii u weki dee manu ku mujëë fii u de.

5. Faandi mbei u musu luku bunu ku di hati fuu?

⁵ So sëmbë di toou bi go du fanafiti soni u di de bi go nama ku wan sëmbë di an dë de mujëë nasö de manu. U ta libi a wan goonliba ka gaansë u sëmbë an ta duwengi deseei, söseei de ta piizii ku hiniwan piki soni di de feni di nama ku manu ku mujëë soni. Boiti di dë, u sa ko ta lobi wan woto sëmbë di an dë u toou mujëë nasö u toou manu u di di hati fuu sa ganjan u, söseei u di a poi seei (Lesi Jelemia 17:9, 10). Jesosi bi taki taa: „A libisëmbë hati dendu hii pei hogi ta kumutu, kuma kii sëmbë, tei otowan mujëë ku hii oto fanafiti libi a di së u manu ku mujëë.”​—Mateosi 15:19.

6, 7. (a) Andi sa pasa te i ta pakisei u du soni di na bunu?(b) Andi sa heepi u u na du zöndu a Jehovah fesi?

⁶ Te tu sëmbë di lobi deseei ta bigi pakisei u du soni di an bunu, nöö de o bigi ta taki u soni di de ku de mujëë nasö soni di de ku de manu wanwan nöö bi musu taki. Te u kaba fëën, de o ta suku fasi u de ta dë makandi hii juu. De o ta mbei buka u ta miti hesihesi, nöö de o ta du kuma de an bi sabi taa de bi o miti. Te di fii di de ta fii da deseei ta ko möön taanga, nöö a o ko möön taanga da de u hoi deseei. Möön de ta nama ku deseei, möön a ta taanga da de u kaba ku di soni di de ta du, hii fa de sabi taa di soni di de ta da du dë an bunu.​—Nöngö 7:21, 22.

⁷ Fa i si womi ku mujëë bigi ta pakisei u du soni di na fiti, söseei te de ta taki soni di na fiti, nöö te u kaba fëën de o ta panjan deseei a maun, ta bosi deseei, ta lo’ maun a de sinkii ta panjan deseei fasifasi, nöö de ta fëëkëtë hii dee wëti u Jehovah dee ta lei u andi bunu ku andi an bunu. A tjali taa de ta du soni di de ku de toou mujëë nasö di de ku de toou manu nöö musu du. De mbei dee fii u de ’manda de u du hogi’. Te u kaba fëën te dee fii dë ko ta basi de, nöö de ta du fanafiti soni a di së u manu ku mujëë (Jakobosi 1:14, 15). A dë wan tjali soni seei, u di dee tu sëmbë dë bi sa koti pasi da di hogi dë ee de bi mbei Jehovah heepi de u si di toou libi kuma wan soni di de musu ta lesipeki. Andi sa heepi wan sëmbë u ko ta si di toou libi kuma wan soni di a musu ta lesipeki?

MBEI MÖITI U TA KO MÖÖN ZUNTU KU GADU

8. Unfa di dë di u dë mati ku Jehovah sa tjubi u, u na go du fanafiti soni a di së u manu ku mujëë?

⁸ Lesi Psalöm 97:10. Te u ku Jehovah dë mati, nöö di soni dë sa tjubi u, u na go du fanafiti soni a di së u manu ku mujëë. Te u ko sabi dee gaan waiti fasi fëën, nöö woo ’mbei möiti be u ko kuma hën, kumafa wan mii kë djeesi ën tata a soni. U musu lobi useei’. Te u kaba fëën, woo abi di taanga u „kaba ku dee peipei takulibi a di së u manu ku mujëë soni” (Efeise 5:1-4). Womi ku mujëë di toou ta mbei taanga möiti u hoi deseei a di sëmbë di de ku ën toou. De ta du ën u di de sabi taa „Gadu o kuutu . . . hiniwan sëmbë di ta libi a wan fasi di na fiti di fasi di a buta fu manu ku mujëë musu libi”. Söseei de ta du ën u di de sabi taa a o kuutu ’wan womi di ta waka ku wan oto mujëë di an dë mujëë fëën a wosu, söseei wan mujëë di ta waka ku wan oto womi di an dë manu fëën’.​—Hebelejën 13:4.

9. (a) Andi bi heepi Josëfu u hoi ënseei hii fa hën basi mujëë bi kë duumi ku ën? (b) Andi u sa lei a di woto u Josëfu?

⁹ So Keesitu sëmbë disa di fasi fa Jehovah bi lei de u libi, u di baka wooko juu de bi ta nama tumisi ku sëmbë di de ku de ta wooko a di wan kamian di an dë Kotoigi. Sö Keesitu sëmbë bi miti tesi a di kamian ka de ta wooko. Di soni aki hën bi miti di njönku kijoo de kai Josëfu. Di a bi go a wooko, hën a ko si taa di mujëë fëën basi bi kë ën. Sömëni daka longi a bi ta pooba u kisi ën faa duumi ku ën. Te u kaba fëën, „hën di mujëë kisi di bisi u Josëfu gbaa hoi, hën a taa: ’Ko duumi ku mi!’” Ma Josëfu an bi kë duumi ku ën, hën a kule go. Andi bi heepi Josëfu faa hoi ënseei fu an du sö wan soni? A bi dë kabakaba u na du soni di bi o poi ën ku Gadu. De bi puu Josëfu a wooko, hën de butëën a dunguwosu, ma Jehovah bi mbei a feni gaan bunu seei (Kenesesi 39:1-12; 41:38-43). Aluwasi u dë a wooko nasö a woto kamian, u musu kule da hiniwan soni di sa mbei u pasa Gadu buka.

TEI DI NJUNJUN LIBI DI GADU DA U

10. Unfa di njunjun libi di Gadu da u ta heepi u u na mbei na wan soni poi di toou libi fuu?

¹⁰ Te u tei di njunjun libi di Gadu da u, nöö ’woo ko ta djeesi ën seei. Biga hën ta libi bunu a hii futu ku limbo hati’. Nöö di soni dë heepi womi ku mujëë di toou fu de an go du fanafiti soni a di së u manu ku mujëë (Efeise 4:24). Te u tei di njunjun libi di Gadu da u, hën da u „kaba ku dee takulibi u di goonliba aki e, kuma mötjö libi sö, fanafiti libi, dee taku hangi a di së u manu ku mujëë, langawojo u soni” (Lesi Kolosën 3:5, 6). Aki di wöutu „kaba” kë taki taa u musu mbei hii möiti u feti ku dee taku fii dee ta ko a u pakisei. U musu kule da hiniwan soni di sa weki dee manu ku mujëë fii fuu a wan fasi di na fiti (Jöpu 31:1). Te u ta libi kumafa dee wëti u Gadu ta taki, nöö woo ta buuse ’hiniwan soni di u si taa hogi, söseei ’ku bunu soni nöö woo ta nama’.​—Loomë 12:2, 9.

11. Unfa di njunjun libi di Gadu da u sa mbei soni waka bunu a di toou libi fii?

¹¹ Te u tei di njunjun libi di Gadu da u, nöö u ta djeesi Jehovah a dee fasi fëën (Kolosën 3:10). Te womi ku mujëë di toou ta lei taa de abi ’bunuhati, saka fasi, sapifasi ku pasensi’, nöö de o abi wan bunu toou libi, söseei Jehovah o mbei de feni bunu (Kolosën 3:12). Boiti di dë, de o ko sa’ u du soni makandi möön bunu te de ta mbei ’Keesitu mbei de ko dë bööböö’ (Kolosën 3:15). Te de ta „fii” da deseei, nöö hiniwan u de o ta suku fasi u dë di fosuwan di o buta mëni a di wotowan, söseei u ta lesipeki di wotowan.​—Loomë 12:10.

12. Un fasi i si kuma dë fanöudu u abi ee i kë abi wan bunu toou libi?

¹² Di de bi hakisi wan womi ku hën mujëë andi bi heepi de u abi wan bunu toou libi, hën Sid, di womi bi taki taa: „Hii juu u bi ta mbei möiti u abi di möön fanöudu fasi de kai lobi. Söseei u bi si taa a dë fanöudu u abi sapifasi. Sonja, di mujëë bi piki ku ën hën manu, hën a taa: „Sutifasi da wan u dee fanöudu fasi di u musu abi tu. Söseei u bi ta pooba u lei taa u abi sakafasi, hii fa a bi ta taanga so juu.”

UN MUSU TA FAN TA FUSUTAN UNUSEEI

13. Andi dë fanöudu u sa abi wan bunu toou libi, nöö faandi mbei?

¹³ Wan u dee bunu fasi fa u sa mbei soni ta waka bunu a di toou libi, hën da te u ta fan a wan suti fasi ku di sëmbë di u ku ën toou. A dë wan tjali soni taa so womi ku mujëë di toou ta fan a wan möön lesipeki fasi ku sëmbë di de an sabi, möön di sëmbë di de ku ën toou! Te womi ku mujëë di toou ta ’hoi deseei a bëë, ta gandji da deseei, te de hati ta boonu ku deseei, ta buja, ta feti, ta kosi deseei’, nöö pikipiki de ta poi di toou libi u de (Efeise 4:31). Ee hii juu i ta si föutu a di sëmbë di i ku ën toou nasö ta taki soni ta tjökö ën, nöö di soni dë o poi di toou libi fii. So womi ku mujëë di toou di kë u soni go bunu a di toou libi u de musu mbei möiti u ta fan a wan suti fasi, söseei a wan lobi fasi ku deseei.​—Efeise 4:32.

14. Andi wa musu ta du?

¹⁴ Di Bëibel taki taa „wan ten dë u dë pii” (Peleikima 3:7). Ma di soni aki an kë taki taa wa musu fan ku di sëmbë di u ku ën toou, biga a dë fanöudu u ta fan fuu fusutan useei ee u kë abi wan bunu toou libi. Wan mujëë di toou di ta libi na Alumanköndë bi taki taa: „Te ja ta fan ku di sëmbë di i ku ën toou te wan soni pasa, nöö a sa hati ën gaanfa seei.” A bi taki söseei taa: „Hii fa a ta taanga i hoi iseei te wan soni ta hati i, tökuseei an bunu fii puu hatiboonu a sëmbë liba. Biga i sa taki nasö du soni söndö u pakisei di sa hati di sëmbë di i ku ën toou, nöö di soni hën ta mbei toobi ku möön bigi.” Te womi ku mujëë di toou ta bai deseei nasö te de ta dökë ku deseei, nöö na dee soni dë o heepi de ku di bookohedi u de. Ma sëmbë di toou sa abi wan bunu toou libi ee de ta taki fusutan deseei wantewante te de abi wan bookohedi, söseei te de an ta disa dee soni dë ko toon soni di sa mbei de ta buja ku deseei.

15. Unfa di fan di womi ku mujëë ta fan u fusutan deseei sa heepi de u abi wan bunu toou libi?

¹⁵ I sa ko abi wan bunu toou libi te i ta piki di sëmbë di i ku ën toou unfa i ta pakisei, söseei unfa i ta fii. Leti kumafa a dë fanöudu u luku bunu andi i ta taki, sö nöö a dë fanöudu u luku bunu ku di fasi fa joo taki ën tu. Ee ju ku i mujëë nasö i ku i manu abi toobi, tökuseei i musu mbei möiti u fan a wan suti fasi ku ën. A sö wan fasi an o ta taanga da i mujëë nasö da i manu u ta haika i te i ta fan ku ën (Lesi Kolosën 4:6). Wan womi ku wan mujëë di toou sa abi wan bunu toou libi te de sa fan u fusutan deseei, söseei te de ta taki soni u da deseei taanga nasö te de ta taki soni u heepi deseei.​—Efeise 4:29.

DA UNUSEEI ANDI WOMI KU MUJËË DI TOOU MUSU TA DA DESEEI

16, 17. Faandi mbei womi ku mujëë musu ta buta mëni a di fasi fa de ta fii, söseei a dee manu ku mujëë fii u de?

¹⁶ Womi ku mujëë di toou sa abi wan bunu toou libi te de an ta mëni di u de wanwan soni nöö, ma de ta mëni di u di wotowan tu (Filipi 2:3, 4). Wan womi nasö wan mujëë musu ta buta mëni a di soni di di wotowan fëën abi fanöudu. A musu buta mëni a di fasi fa di wotowan fëën ta fii, söseei a dee manu ku mujëë fii fëën.​—Lesi 1 Kolenti 7:3, 4.

¹⁷ Ma a tjali taa so sëmbë di toou an ta du soni u lei taa de lobi di wotowan nasö de ta niinga di wotowan a ndeti. Nöö so womi ta pakisei taa te de ta libi a wan suti fasi ku de mujëë, nöö di soni dë kë taki taa de da wan sösö womi. Ma di Bëibel ta taki taa: „Un dee womi dee dë ku mujëë, un musu ta fii da dee mujëë fuunu e” (1 Petuisi 3:7). Wan womi musu ko fusutan taa na te a duumi ku di mujëë fëën, nöö hën da a dëën hii soni di a abi fanöudu a di toou libi. Ma a musu ta lei hii juu taa a lobi hën mujëë. Te a ta libi sö, nöö di mujëë o ta piizii u duumi ku ën. Te hii de tuu ta lei taa de lobi deseei, söseei ta fii da deseei, nöö de o sa da deseei andi de abi fanöudu.

18. Andi sa heepi womi ku mujëë di toou u soni waka bunu a di toou libi u de?

¹⁸ Na wan soni ta da u pasi u waka da di sëmbë di u ku ën toou. Ma a sa pasa taa wan womi nasö wan mujëë sa go suku lobi a wan woto sëmbë u di hën mujëë nasö hën manu an ta lei ën taa a lobi ën tjika (Nöngö 5:18; Peleikima 9:9). Fëën mbei di Bëibel ta da womi ku mujëë di toou di lai taa de an ’musu duumi paatipaati ku de seei ta niinga de seei’, boiti ee de tuu fiti buka taa de o dë sö u wan pisiten. Faandi mbei? Sö taa „di didibi an musu feni wan baaku faa tja unu go du hogi, fu di wan a’ taanga fuun hoi unu seei” (1 Kolenti 7:5). A bi o dë wan tjali soni seei ee tu sëmbë di toou mbei Saatan mbei de waka da deseei u di de an sa ’hoi de seei’. Te womi ku mujëë di toou ta da deseei andi musu ta da deseei, nöö de an ’ta du wan soni di bunu da de seei nöö a kaba, ma de musu ta mëni andi dë bunu da di otowan u de tu’. De an ta du di soni dë u di de duwengi de u du ën, ma de ta du ën u di de lobi deseei. Te de ta lei taa de lobi deseei, söseei te de ta libi suti ku deseei, nöö di soni dë o mbei taa soni ta waka möön bunu a di toou libi u de.​—1 Kolenti 10:24.

TAN MBEI MÖITI U SONI WAKA BUNU A DI TOOU LIBI FII

19. Andi u musu dë kabakaba u du, nöö faandi mbei?

¹⁹ U dë sö zuntu u denda go a di njunjun goonliba! A bi o dë wan gaan hati soni seei ee u mbei dee taku fii fuu basi u, leti kumafa a bi pasa ku dee 24.000 Isaëli sëmbë di bi dë a di lagi kamian u Moab. Baka di di Bëibel bi taki andi bi pasa, hën a bai u taa: „Di sëmbë di ta mëni taa a taanpu gingin, nöö a musu luku bunu be an kai e. Biga i sa kai” (1 Kolenti 10:12). Ee u kë taa soni waka bunu a di toou libi fuu, nöö u musu tan hoi useei a Jehovah, söseei a di sëmbë di u ku ën toou (Mateosi 19:5, 6). Ma nöunöu da di ten di u musu ’biinga seei, nöö woo dë limbolimbo söndö föutu ku kötöhati a Gadu fesi’​—2 Petuisi 3:13, 14.