Mbei di libi fii kai ku di nëbai begi u Masa Jesosi​—Pisi 2

1-3. Andi bi mbei wan sisa dë seiki taa Jehovah sabi andi a bi abi fanöudu?

Wan pionili sisa de kai Lana an sa fëëkëtë di soni di bi pasa di a bi go köi na Alumaköndë a di jaa 2012. A bi si fa Jehovah bi piki tu u dee begi fëën. Di a bi dë a wan talanwagi nango a di kamian ka de ta tei opolani, hën a bi hakisi Jehovah faa heepi ën u feni wan sëmbë faa peleiki da. Di a ko dou a di kamian, hën a ko jei taa di opolani an o go di daka dë möön, ma a o go debooko fëën. Hën Lana hakisi Jehovah faa heepi ën biga an bi ko abi möni sö möön, nöö a bi musu feni wan kamian u duumi di ndeti dë tu.

² Di Lana kaba begi, hën a jei wan sëmbë taa: „Unfa Lana, andi i ta du aki?” A bi dë wan njönku kijoo di hën ku ën bi go a di wan siköö. Hën mama ku hën avo bi tjëën ko tei opolani, biga a bi nango a Zuid Afiikan. Di Lana konda da de andi miti ën, hën di mama ku di avo u di womi mii piki Lana taa a sa duumi a de pisi di ndeti dë. De bi hakisi ën sömëni soni u di biibi fëën, söseei u di pioniliwooko di a ta du.

³ Di debooko fëën di de bi dë a tafa ta njan a di mamate, hën Lana piki sömëni u dee soni de bi hakisi ën möön di nama ku di Bëibel. Baka di dë, Lana hakisi de ee de sa dëën di tëlëfön nöbu ku di wosu nöbu u de, faa sa manda sëmbë ko a de u piki dee hakisi u de go dou. Bakaten Lana toona go nëën köndë baka, hën a go dou ku di pioniliwooko fëën. A bi si taa Jehovah bi piki dee begi fëën. Jehovah bi sabi andi Lana bi abi fanöudu, nöö a bi heepi ën tu.​—Psalöm 65:2.

4. Andi woo luku a di woto aki?

⁴ Te wan fuka ko miti u vou sö, nöö an ta taanga da u u hakisi Jehovah faa heepi u, nöö waiwai seei a ta haika dee begi fuu (Psalöm 34:15; Nöngö 15:8). Ma möön fanöudu soni dë di u musu ta hakisi Jehovah, te u luku di nëbai begi di Masa Jesosi bi lei u. A di woto aki woo taki u dee fö lasiti soni u di begi dë di sa heepi u u hoi useei a Jehovah.​—Lesi Mateosi 6:11-13.

„DA U DEE SONI U ABI FANÖUDU FUU PASA U LIBI TIDE”

5, 6. Faandi mbei Jesosi bi lei u taa u musu ta hakisi Gadu „dee soni u abi fanöudu fuu pasa u libi tide”, hii fa u abi sömëni u njan kaa?

⁵ Jesosi bi lei u taa u musu ta hakisi Gadu „dee soni u abi fanöudu fuu pasa u libi tide”, ma na u hakisi ën „dee soni mi abi fanöudu u mi pasa mi libi tide”. Wan keling-gaanwomi de kai Victor di ta libi a wan Afiikan köndë, taki taa: „Mi lo’ u da Jehovah tangi u di mi ku mi mujëë an ta booko u hedi ku naasë woo feni soni u njan nasö naasë woo feni möni u paka u juu wosu. Dee baaa ku sisa fuu ta sölugu u hii daka. Ma mi ta begi da dee sëmbë dee ta heepi u u de sabi andi de musu du te de dë ku möni fuka.”

⁶ Kandë u abi sömëni soni u njan, ma sömëni u dee baaa ku sisa fuu pooti. Boiti di dë, a dë sö taa gaan ventu nasö gaan wata ko booko di kamian ka so u de ta libi. Na begi nöö u sa begi da de, ma u sa du soni u heepi de. U sa paati dee soni dee u abi ku de. Boiti di dë, u sa ta da möni da di wooko di dee sëmbë u Jehovah ta du a hii goonliba. U sabi taa dee möni dee u ta da, ta heepi dee baaa ku sisa fuu dee dë ku fuka.​—1 Johanisi 3:17.

7. Unfa Jesosi bi lei u taa ’wa musu ta booko u hedi ku dee soni fu amanjan’?

⁷ Baka di Jesosi lei dee bakama fëën unfa de musu begi, hën a lei de taa de an musu ta booko de hedi tumisi ku dee soni u di goonliba aki. A bi taki taa ee Jehovah ta sölugu dee folo dee ta göö a sabana, „nöö na möön hesi Gadu o sölugu unu ku soni u bisi tu nö? Ee, dee sëmbë aki, unfa seei a waka te nöö di biibi fuunu piki sö baa? Fëën mbei mi taki da unu taa, wan musu ta booko hedi taa: . . . ’Unfa woo feni koosu u bisi?’” Hën a piki de wan pasi möön taa: „Ja musu abi bookohedi fu dee soni fu amanjan” (Mateosi 6:30-34). An dë fanöudu fuu ta booko u hedi ku dee soni dee u abi fanöudu u pasa u libi hiniwan daka, ma u musu ta dë tifihedi ku dee soni dee u ta feni hiniwan daka. U sa begi u feni wan kamian u libi, u feni wan wooko fuu sa sölugu dee sëmbë fuu, söseei u du soni a wan köni fasi te u siki. Ma wan möön fanöudu soni dë di u musu ta begi da.

8. Andi u ta mëni te u luku di taki di Jesosi bi taki u dee soni dee u abi fanöudu fuu pasa u libi hiniwan daka? (Luku di peentje a bigi u di woto.)

⁸ Dee soni Jesosi bi taki u dee soni dee u abi fanöudu ta mbei u mëni wan woto soni di a bi taki. A bi taa: „Na soni u njan wanwan nöö ta hoi sëmbë a libi e, ma a hiniwan wöutu fu Gadu di a ta taki, nöö a de libi ta kumutu” (Mateosi 4:4). Fëën mbei u musu ta begi be Jehovah ta lei u soni a di soifi ten go dou, söseei faa da u dee soni dee u abi fanöudu fuu tan zuntu ku ën.

„PUU U A BËË FU DEE HOGI DEE U TA DU”

9. Faandi mbei dee zöndu fuu dë kuma paima di u abi?

⁹ Jesosi bi taki taa: „Da u paadon u dee paima fuu” (Mateosi 6:12, NW). Wan woto pasi a bi taki taa: „Puu u a bëë fu dee hogi [zöndu] dee u ta du” (Lukasi 11:4). A bi taki di soni aki u di dee zöndu fuu dë kuma paima di u abi. A di jaa 1951, The Watchtower bi taki taa te u du wan zöndu, nöö a dë kuma te u abi wan paima u paka Jehovah. Jehovah da di sëmbë di u musu lobi, nöö u musu ta piki hën buka, u di hën abi di leti dë. Fëën mbei te u du wan zöndu, hën da wa ta da Jehovah di soni di a abi leti u kisi. The Watchtower bi taki taa ee Jehovah kë, nöö a bi sa taki taa an kë u kuma mati möön. A bi taki söseei taa: „Te u du wan zöndu, nöö wa ta lei taa u lobi Gadu.”​—1 Johanisi 5:3.

10. Faandi mbei Jehovah sa da u paadon u dee zöndu fuu, nöö unfa u musu si ën?

¹⁰ U dë ku tangi a hati seei taa Jehovah mbei Jesosi dëdë kuma wan lusupaima faa sa da u paadon u dee zöndu fuu. Hii daka u musu ta begi Jehovah faa da u paadon. Jesosi bi dëdë da u söwan 2000 jaa pasa kaa, ma tökuseei u ta feni wini u di lusupaima a di ten aki. Hii juu u musu ta da Jehovah tangi u di gaan soni di a du da u aki. Na wan fuu bi o sa paka di lusupaima di bi dë fanöudu u puu u a zöndu ku dëdë basu (Lesi Psalöm 49:7-9; 1 Petuisi 1:18, 19). Di Jesosi bi taki a di nëbai begi fëën u Gadu „puu u a bëë fu dee hogi dee u ta du”, nöö a bi ta mëni u taa leti kumafa u abi di lusupaima fanöudu, sö nöö dee baaa ku sisa fuu abi ën fanöudu tu. Jehovah kë fuu ta hoi a pakisei taa de ku ën dë mati tu. Hën da wa musu ta naanaa u da dee baaa fuu paadon te de du wan soni ku u. Gaansë u dee soni di de ta du ku u da pikipiki soni. Ma te u ta da dee baaa ku sisa fuu paadon, nöö u ta lei taa u lobi de. Söseei u ta lei taa u ta tei ën u bigi taa Jehovah ta da u paadon tu.​—Kolosën 3:13.

11. Faandi mbei a dë wan fanöudu soni u ta da wotowan paadon?

¹¹ U di u da zöndu libisëmbë, mbei a ta taanga da u so juu u da wan sëmbë di du wan soni ku u paadon (Leifitiki 19:18). Ee u go ta konda da wotowan andi wan baaa nasö wan sisa du ku u, nöö woto sëmbë a di kemeente sa tei së ku u. Nöö di soni aki sa mbei taa wa o ta libi fiifii ku useei a di kemeente möön. Ee u ta disa di soni aki faa ta pasa nöömö, nöö a sö wan fasi u ta lei taa wa ta si di lusupaima di Gadu da u kuma wan dii kado. Nöö di soni dë an o tja wini ko da u tu (Mateosi 18:35). Ee wa ta da wotowan paadon, nöö Jehovah seei an o sa da u paadon tu (Lesi Mateosi 6:14, 15). Söseei ee u kë u Jehovah ta da u paadon, nöö wa musu ta du soni di a ta buuse.​—1 Johanisi 3:4, 6.

„NA DISA U DA DEE SONI DEE SA HAI U TJA GO A DI SË U HOGI E”

12, 13. (a) Andi bi pasa ku Jesosi baka di a tei dopu? (b) Faandi mbei wa musu taki taa woto sëmbë hën ta mbei u go du wan soni di an bunu? (c) Andi Jesosi bi lei Saatan u di a hoi ënseei a Gadu u te a dëdë?

¹² Di soni di Jesosi bi taki a di begi taa „na disa u da dee soni dee sa hai u tja go a di së u hogi”, ta mbei u ta mëni di soni di pasa ku Jesosi baka di a tei dopu. Di jeje u Gadu bi tjëën go a wan sabana „fu di didibi sa ko nëën ko poobëën luku ee a sa mbei a piki ën buka” (Mateosi 4:1; 6:13). Faandi mbei Jehovah disa di soni aki pasa? Jehovah bi manda Jesosi ko a goonliba u lei ee libisëmbë sa hoi deseei a Gadu, u di Adam ku Eva an bi kë u Jehovah tii de möön. Ten bi dë fanöudu u ko sabi ee de bi abi leti di de bi hopo fia ku Gadu. Wan soni bi föutu a di fasi fa Jehovah mbei libisëmbë u? Wan sëmbë di an abi zöndu sa hoi hënseei a Jehovah te „didibi” ta poobëën u? Söseei an bi o möön bunu u libisëmbë tii deseei ö? (Kenesesi 3:4, 5). A di ten di ta ko te Jehovah o feni taa dee piki u dee hakisi aki ko gbelingbelin a fesi tjika, nöö hii sëmbë a liba ala ku goonliba aki tuu o sabi taa di fasi fa Jehovah ta tii da di möön bunu wan.

¹³ Jehovah da wan santa Gadu, nöö fëën mbei nöiti a ta pooba sëmbë ku hogi soni. Saatan hën da di „poobasëmbëma” (Mateosi 4:3). Saatan ta pooba u a peipei fasi. Ma hiniwan fuu sa taki ee woo finga futu dëën, nasö ee wa o finga futu dëën te a ta pooba u (Lesi Jakobosi 1:13-15). Di Saatan bi ta pooba Jesosi, hën wantewante a bi finga futu dëën, u di a bi taki soni di sikifi a di Wöutu u Gadu. Jesosi bi hoi ënseei a Gadu. Ma tökuseei Saatan an bi disa Jesosi. A bi „go fëën ufö” go ta wakiti wan möön bunu ten u pooba Jesosi (Lukasi 4:13). Aluwasi andi Saatan bi du seei, tökuseei hii juu Jesosi bi ta piki Gadu buka, di dë di Tiima fëën. Jesosi bi lei Saatan taa wan libisëmbë di an abi zöndu sa hoi ënseei a Jehovah aluwasi un gaan tesi miti ën. Ma Saatan ta mbei möiti u pooba dee bakama u Jesosi jeti, te kisi ju, u pasa Jehovah buka.

14. Andi u musu du ee u kë finga futu da Saatan te a ta pooba u?

¹⁴ Te kuma tide a dë fanöudu u ko sabi ee dee soni di Saatan bi taki u di fasi fa Jehovah ta tii, dë sö tuutuu. Fëën mbei Jehovah ta disa Saatan faa ta pooba u jeti. Na Jehovah hën ta tja soni ko a u dee sa „hai u tja go a di së u hogi”. Ma a ta biibi taa u sa hoi useei nëën, nöö a kë heepi u tu. Söseei Jehovah an ta musu u fuu ta du bunu soni. A da u di leti fuu sa du andi u kë. Fëën mbei a disa u fuu taki da useei ee u kë hoi useei nëën nasö ee wa kë hoi useei nëën. Ee wa kë u Didibi ganjan u kisi, nöö u musu du tu soni. U musu tan zuntu ku Jehovah, söseei u musu ta begi ën faa heepi u tu. Unfa Jehovah ta piki dee begi fuu te u ta hakisi ën faa heepi u fuu finga futu da Saatan te a ta pooba u?

15, 16. (a) Un tesi ku un tesi u musu finga futu da? (b) Ambë u musu da di föutu ee u tuwë useei da tesi?

¹⁵ Jehovah da u di santa jeje fëën u heepi u u finga futu da dee tesi u Saatan. Söseei Jehovah da u di Bëibel ku di kemeente u ta bai u a fesi u hogi an miti u. Wan fasi fa a ta bai u, hën da wa musu ta poi u ten, u möni, ku di kaakiti fuu u du soni di an dë fanöudu. Espen ku Janne ta libi a wan gudu köndë u Europa. Sömëni jaa longi de bi ta du di pioniliwooko a wan pisiwata u di köndë ka de bi abi peleikima fanöudu. Di de ko pai wan mii, hën de ko disa di pioniliwooko, nöö nöunöu de abi tu mii. Espen taki taa: „U bi ta begi Jehovah hii juu faa heepi u fu wa tuwë useei da tesi, möönmöön fa wa sa du sö hia möön a di peleikiwooko kumafa u bi naa. U hakisi Jehovah faa heepi u fuu sa ta abi wan taanga biibi hii juu, söseei fuu sa dë fajafaja a di peleikiwooko.”

¹⁶ Wan woto tesi di u musu finga futu da, da di luku di sëmbë ta luku fanafiti soni u womi ku mujëë. Ee u tuwë useei da di tesi aki, nöö wa sa taki taa Saatan hën mbei. Faandi mbei? Biga Saatan ku di goonliba fëën an sa musu u du wan soni di na fiti. So sëmbë ta luku fanafiti soni u womi ku mujëë u di de ta pakisei soni di na fiti. Ma sömëni u dee baaa ku sisa fuu finga futu da di tesi aki, nöö useei sa du ën tu.​—1 Kolenti 10:12, 13.

„PUU U A DI DIDIBI MAUN”

17. (a) Unfa u sa lei taa u kë u Jehovah „puu u a di didibi maun”? (b) Fuun pei soni woo böö abiti möön?

¹⁷ Unfa u sa lei taa u kë u Jehovah „puu u a di didibi maun”? Wa musu „dë ku de [di goonliba aki] a wan së”, söseei wa „musu lobi dee soni u di goonliba aki” tu (Johanisi 15:19; 1 Johanisi 2:15-17). Woo böö seei te Jehovah o puu Saatan a goonliba, söseei te a poi di hogi goonliba aki kaba a sösö! Ma te u di ten dë dou, u musu ta hoi a pakisei taa Saatan dë „ku taanga hatiboonu, biga a sabi taa ten fëën ko sati”. A o du hii soni di a sa u tapa u u dini Jehovah. Fëën mbei u musu ta begi nöömö u Jehovah tjubi u be Saatan an feni u kisi.​—Akoalimbo 12:12, 17.

18. Andi u musu du ee u kë pasa di kaba u di goonliba u Saatan libilibi?

¹⁸ I bi o kë libi a wan goonliba ka Saatan an dë u? Wë nöö i musu ta begi nöömö be di Könuköndë u Gadu ko, be di në u Gadu ko santa, söseei be di kë fëën pasa a goonliba. Hii juu i musu abi di biibi taa Jehovah sa mbei soni waka bunu ku u, söseei taa a sa da i hii soni di i abi fanöudu u hoi iseei nëën. Awa, du hii soni di i sa u mbei di libi fii kai ku di nëbai begi u Masa Jesosi.