Di u feifi woto

Andi da di pakisei di Gadu abi ku di goonliba aki

Faandi mbei Gadu bi mbei di goonliba aki. (1, 2)

Faandi mbei di goonliba an dë wan paladëisi möön. (3)

Andi o pasa ku dee taku hati sëmbë. (4)

Andi Jesosi o du a di ten di dë a u fesi tako da dee sëmbë di siki, di ko gaandi, ku dee di dëdë kaa. (5, 6)

Andi i musu du, ee i kë feni dee bunu soni a di ten di dë a u fesi ta ko. (7)

1. Jehovah Gadu bi mbei di goonliba a sö wan fasi taa libisëmbë bi o feni bunu nëën dendu fu teego. A bi kë taa hii juu dee sëmbë di bi o libi a goonliba aki, bi musu dë sëmbë di lobi letifasi u libi ku taa de bi musu dë kölöku tu (Psalm 115:16; Jesaja 45:18). Kwetikweti, na wan ten sëmbë o booko di goonliba aki; a sa tan fu teego.​—Psalm 104:5; Prediker 1:4.

2. Bifö Gadu bi mbei libisëmbë, a bi tei wan piki pisi u di goonliba, hën a bi mbei hën ko toon wan hanse djai, di de ta kai wan paladëisi. A bi kai hën di djai fu Eden. Naandë a bi buta di fosu womi ku mujëë, Adam ku Eva. Di pakisei u Gadu bi dë taa de bi musu paii mii fuu hii di goonliba. Pikisö pikisö, de bi o mbei hii di goonliba ko toon wan paladëisi.​—Genesis 1:28; 2:8, 15.

3. Adam ku Eva bi du zöndu fu di fu esipeesi de bi pasa Gadu buka. Fëën mbei Jehovah bi puu de buta a döö së u di djai fu Eden. Sö di paladëisi an dë möön (Genesis 3:1-6, 23). Ma Jehovah an fëëkëtë di soni a bi abi a pakisei ku di goonliba aki. A paamusi taa a o mbei a ko toon wan paladëisi baka, ka libisëmbë sa libi fu teego. Ma unfa a o du di soni dë?​—Psalm 37:29.

4. Ma bifö di goonliba aki o ko toon wan paladëisi baka, nöö taku hati sëmbë an musu dë nëën dendu möön (Psalm 37:38). Di soni aki o pasa a Armagedon, di de ta kai di feti u Gadu, di o kii hii dee taku hati sëmbë tuu puu. Baka Armagedon, de sa söötö Satan wan dusun [1000] jaa longi. Di soni aki o mbei taa na wan taku hati sëmbë o fika a baka u poi di goonliba möön. Dee sëmbë di ta dini Jehovah tö o fika a libi.​—Akoalimbo 16:14, 16; 20:1-3.

5. Nöö masa Jesosi Keesitu sa tii di goonliba kuma Könu wan dusun jaa longi (Akoalimbo 20:6). Pikipiki a o puu zöndu a u pakisei ku sinkii. Woo ko toon telutelu sëmbë kumafa Adam ku Eva bi dë bifö de bi du zöndu. Nöö siki an o dë möön, sëmbë an o ko gaandi möön. Dëdë seei an o dë möön. Sëmbë di bi siki, o ko bëtë u di siki u de. Nöö sëmbë di bi gaandi o ko jönku baka.​—Job 33:25; Jesaja 33:24; Akoalimbo 21:3, 4.

6. A di dusun jaa dendu ka Jesosi o tii di goonliba, nöö sëmbë di tan a di së u Gadu sa wooko u mbei hii di goonliba ko toon wan paladëisi (Lukasi 23:43). Sö seei, milijunmilijun sëmbë di bi dëdë kaa, o weki baka, u ko libi a goonliba aki (Tjabukama 24:15). Nöö ee de du dee soni di Gadu kë taa de musu du, nöö de o libi go dou fu teego a goonliba aki. Ma ee de an du dee soni di Gadu kë taa de musu du, nöö de sa lasi di libi u de fu teego.​—Johanisi 5:28, 29; Akoalimbo 20:11-15.

7. Fu taki hën leti, di pakisei di Gadu bi abi a fesi ku di goonliba, o ko tuu. I kë feni dee bunu aki di dë a u fesi ta ko u? Ee a dë sö, nöö i musu tan tei lei u di Bëibel u ko sabi Jehovah möön bunu. Sö seei i musu tan du dee soni di a kë taa i musu du. Te i guwenti u go a dee komakandi u Jehovah Kötöigi a di kamian ka i ta libi, nöö a o heepi i fii du dee soni di Gadu kë taa i musu du.​—Jesaja 11:9; Hebelejën 10:24, 25.

[Peentje a bladsëidë 10]

Di paladëisi di an dë möön

[Peentje a bladsëide 9]

Te Alumakëdön pasa, nöö de o mbei di goonliba ko toon wan paladëisi