Gadu paamusi wan paladëisi

DISI da wan peentje u wan paladëisi. A kan taa sö wan paladëisi Gadu bi lei di tjabukama fëën Jesaaja. Jesaaja bi libi sati baka Jona.

Paladëisi kë taki „djai” nasö „hanse kamian”. An ta mbei i mëni wan soni u bi si a di buku aki kaa u? A ta djei di gaan hanse djai di Jehovah bi mbei da Adam ku Eva, na sö nö? Ma hii di goonliba o toon wan paladëisi wan daka u?

Jehovah bi piki di tjabukama Jesaaja u sikifi soni u di njunjun paladëisi di ta ko da dee sëmbë u Gadu. A taa: ’Matu dagu ku sikapu o libi fiifii makandi ku de seei. Kau mii ku lëun mii o njan makandi, nöö piki mii hën o luku de. Soni seei an o du wan beibi ee a pëë zuntu u wan taku sindeki.’

So sëmbë o taki taa: ’Di soni aki an kan, biga hii juu kaa hogi ta pasa a goonliba, nöö sö nöö a o dë.’ Ma pakisei di soni aki: Un tankamian Gadu bi da Adam ku Eva?

Gadu bi buta Adam ku Eva a wan paladëisi. U di de bi pasa Gadu buka, mbei de lasi di hanse tankamian u de, de ko gaandi hën de dëdë. Gadu paamusi taa a o da dee sëmbë dee lobi ën hii dee soni Adam ku Eva lasi.

A di njunjun paladëisi di ta ko na wan sëmbë o du hogi nasö poi soni. Naandë böö o dë tuutuu. Hii sëmbë o dë gösöntu, nöö de o dë waiwai tu. A o dë leti kumafa Gadu bi kë sensi di bigi. Ma bakaten woo lei unfa Gadu o mbei dee soni aki pasa.