Un dee mama ku dee tata un heepi dee mii fuunu u de ko abi wan bunu libi bakaten

Dee mama ku dee tata dee ta lesipeki Gadu kë u dee mii u de ko toon dinima u Jehovah di ta hoi deseei nëën. Mama ku tata sa heepi dee mii u de u dee lei u Bëibel dou de hati te de dë miii jeti (Det 6:7; Nön 22:6). Un musu disa so soni di un bi o kë du fuun sa heepi dee mii fuunu ö? Wë aai! Nöö di möiti di unu o mbei an o dë u sösö.​—3Jo 4.

Dee mama ku dee tata sa lei sömëni soni a Josëfu ku Malia. De „bi guwenti fu go a Jelusalen hiniwan jaa u de go njan di gaan piizii de ta kai Pasika” hii fa a bi ta tei de ten ku de möni (Lu 2:41). A kan taa de bi ta möön booko de hedi ku di dë di de bi musu dë mati ku Jehovah. A di wan seei fasi dee mama ku dee tata u di ten aki sa heepi dee mii u de u de waka a di soifi pasi, te de ta tei hiniwan okasi u lei de soni ku dee soni di de ta taki, söseei ku di fasi fa de ta libi.​—Ps 127:3-5.

LUKU DI FËLÖN DE BI TEI HINIWAN OKASI DI DE BI FENI, NÖÖ BAKA DI DË, PIKI DEE HAKISI AKI:

• Unfa Jon Schiller ku Sharon Schiller bi buta di Könuköndë a di fosu kamian a de libi di de bi ta kiija dee mii u de?

• Faandi mbei mama ku tata musu luku taa te de ta lei dee mii u de soni, ku te de ta bai de a soni, nöö de an musu du ën a di wan seei fasi ku hiniwan u dee mii u de?

• Unfa mama ku tata sa seeka dee mii u de a fesi te tesi o miti de a di biibi?

• Undi u dee soni di di ölganisaasi fuu mbei i bi tei u heepi dee mii fii u de ku Jehovah ko toon mati?