Lei soni u Bëibel fii sa toona tei de konda da wotowan

U ta fii bunu te u ta lei soni u Bëibel. Ma u ta fii möön bunu seei te u ta konda dee soni dee u bi lei da wotowan. A sikifi a Nöngö 11:25 taa: „Di sëmbë di ta da wotowan te a hia wata, o feni te a hia wata tu.”

Te u ta konda dee soni dee u lei da wotowan, nöö u ta möön hoi dee soni dë a hedi, söseei u ta ko fusutan de möön bunu. U ta wai seei u konda dee soni dee u bi lei da wotowan, u di de sa feni wini u dee soni dë tu.​—Tjab. 20:35.

Pooba di soni aki: A dee wiki dee ta ko, nöö mbei möiti u konda dee soni dee i bi lei da wotowan. I sa konda de da wan famii fii, wan sëmbë u di kemeente, wan sëmbë di i ku ën ta wooko a di wan kamian, wan sëmbë di i ku ën ta sindo a di wan kalasi, wan sëmbë di i ku ën ta dë bandja ku bandja, nasö wan sëmbë di i miti a di peleikiwooko. Pooba u konda dee soni gbelingbelin da di sëmbë, kumafa i fusutan de.

Hoi di soni aki a pakisei: Konda dee soni dee i lei da wotowan u da de taanga, ma na du ën u lei de fa i sabi soni tjika.​—1 Kol. 8:1.