Dee soni dee Mateosi sikifi
11 Di Jesosi lei dee tuwalufu bakama fëën andi de musu du te a kaba, hën a go paaja di bunu buka a dee köndëköndë dee bi dë a zuntu.
2 Johanisi di Dopuma bi dë a dunguwosu di a jei dee soni di di Keesitu ta du, hën a manda dee bakama fëën u de go hakisi ën taa: 3 „Ju da di Sëmbë di Gadu bi paamusi u taa a o manda ko u, naa wan woto sëmbë o ko jeti?” 4 Hën Jesosi piki dee bakama u Johanisi taa: „Un go nöö un go piki Johanisi dee soni dee un ta si ku dee un ta jei. 5 Un piki ën taa dee bookowojoma ko ta si soni, nöö dee lanma ko ta waka. Dee kököbëma ko bëtë, nöö dee bookojesima ko ta jei soni. Dee dëdë sëmbë ta weki ko a libi baka, söseei dee pootima ta jei di bunu buka. 6 Di sëmbë di an ta mati disa di biibi u di ma ta du kumafa a bi mëni, nöö di sëmbë dë hën dë bunu e.”
7 Di dee bakama u Johanisi nango, hën Jesosi bigi konda soni u Johanisi da dee sëmbë dee bi sai dë. A hakisi de taa: „Ambë da di womi di un go si a di sabana? A bi dë wan sëmbë di dë kuma kambaluwa* di ventu ta tja nango ta ko u? 8 Ambë a bi dë? A bi dë wan sëmbë di bi ta bisi gaan waiti koosu ö? Wë nönö, biga dee sëmbë dee ta bisi gaan waiti koosu ta libi a könu wosu. 9 Nöö ambë di womi dë bi dë? A bi dë wan tjabukama u? Aai, a bi dë wan tjabukama tuu, ma a bi hei möön wan tjabukama seei. 10 Gadu bi mbei dee tjabukama fëën sikifi soni u di womi dë. De bi sikifi taa: ’Haika e, mi o manda wan bosikopuma u mi go a i fesi faa limbo pasi da i!’ 11 Mi taki da unu e, na wan libisëmbë di de pai a goonliba aki hei möön Johanisi di Dopuma. Ma di möön lagiwan di dë a di Tii u Gadu di dë a liba ala dendu seei hei möön hën. 12 Sensi di ten di Johanisi di Dopuma bigi di wooko fëën te kisi di ten aki, hën sëmbë ta biinga u de go a di Tii u Gadu di dë a liba ala dendu. Ma di sëmbë di ta biinga taanga nëën baka, nöö hën o dë nëën dendu. 13 Hii dee tjabukama ku dee Wëti bi taki a fesi kaa andi o pasa u te kuma Johanisi dou. 14 Wë ee wan sëmbë kë biibi ën, nasö ee an kë biibi ën, hën da di Elia di bi musu ko. 15 Be di sëmbë di jei dee soni aki, go kai pakisei a de.
16 Ku ambë mi sa tei dee sëmbë u di ten aki maaka? De dë kuma miii di ta pëë a wojowojo, nöö de ta kai dee woto mii ta piki de taa: 17 ’U böö foloiti da unu, ma wan bi kë baja. U kanda tjali kanda da unu, ma wan bi këë.’* 18 Di Johanisi ko, nöö an bi ta njan ta bebe kuma dee woto sëmbë. Ma tökuseei sëmbë ta taki taa ’taku soni dë nëën liba’. 19 Di sëmbë di ko dë Libisëmbë Miii ko ta njan ta bebe kuma woto sëmbë nöö. Ma tökuseei sëmbë ta taki taa ’a ta njan pasa maaka, a ta bebe win pasa maaka, söseei a ta hulu dee pii-lantimönima ku dee sëmbë dee an ta libi bunu a Gadu wojo’. A dee soni di wan sëmbë ta du i sa si ee a köni.”
20 Hën Jesosi bigi gandji da dee sëmbë u dee köndë ka a bi du dee foombo wooko fëën, u di de an bi bia libi. A taa: 21 „Mi bai helu da dee sëmbë u Kolazin ku dee sëmbë u Bëtisaida. Biga ee dee sëmbë u Tilusi ku Sidön bi si dee foombo wooko aki, nöö de bi o bia de libi gaanduwe kaa. De bi o ta bisi djodjo u lei taa de ta tjali, söseei de bi o ta sindo a sindja liba. 22 Mi taki da unu e, di sitaafu di woon feni a di Gaan Kuutu Daka u Gadu o hebi möön di u Tilusi ku di u Sidön. 23 Un dee sëmbë u Kapënaumi dë, un mëni taa woon go a liba ala u? Na seei. A geebi* woon pasa go. Biga ee dee sëmbë u Sodöm bi si dee foombo wooko dee un si, nöö di foto dë bi o dë a di ten aki jeti. 24 Mi taki e, di sitaafu di woon feni a di Gaan Kuutu Daka u Gadu o hebi möön di u Sodöm.”
25 Hën Jesosi bia fan ku hën Tata. A taa: „Taata o, i wë da Masa u liba ala ku goonliba aki tuu. Nöö mi ta gafa i a hii sëmbë fesi, u di i tjubi dee soni aki da dee könima ku dee sabima, ma i mbei piki mii ko sabi de. 26 Aai Taata, sö wë i feni ën bunu fii du.” 27 Jesosi bi taki tu taa: „Mi Tata buta hii soni a mi maun. Na wan sëmbë sabi di Mii kumafa di Tata sabi ën, nöö na wan sëmbë sabi di Tata kumafa di Mii sabi ën, boiti dee sëmbë di di Mii da pasi u de ko sabi ën. 28 Ee wan sëmbë i dë fukafuka, i ko wei u dee lai dee i ta tja, nöö i ko a mi e. Nöö mi o da i kaakiti. 29 Ko wooko makandi ku mi,* nöö lei soni a mi, nöö joo feni kaakiti baka. Biga mi abi saapifasi, söseei mi abi sakafasi. 30 Di wooko u mi* an taanga, nöö di lai u mi an hebi.”