Dee soni dee Lukasi sikifi
14 Wan daka, hën Jesosi go njan a wan u dee fesima u dee Faliseima pisi. Di daka dë bi dë wan Saba daka, nöö dee sëmbë dee bi sai dë bi ta luku ën seei. 2 Nöö wan womi bi sai dë ku wan siki di bi ta mbei sinkii fëën soi. 3 Hën Jesosi hakisi dee Faliseima ku dee sëmbë dee bi sabi dee Wëti bumbuu taa: „A fiti u kula wan sëmbë a Saba daka u?” 4 Ma na wan sëmbë piki ën. Hën Jesosi tëndë maun panjan di womi, hën a kulëën te a kaba, hën a mandëën go. 5 Hën a hakisi de taa: „Ee i abi wan womi mii fii, nasö wan kau fii, nöö hën a kai go a wan baaku wata a Saba daka, ja bi o mbei möiti fii go puu ën a di baaku dendu hii fa di soni dë pasa a wan Saba daka u?” 6 Ma de an bi sa piki ën na wan hojo soni möönsö.
7 Hën a konda wan woto da dee sëmbë dee de bi kai ko a di piizii dee bi go sindo a dee möön bunu kamian. A piki de taa: 8 „Te wan sëmbë kai i fii ko a wan tööu wosu, nöö ja musu suku u go sindo a di möön bumbuu kamian e. Biga kandë di sëmbë di kai i ko dë, bi kai wan woto sëmbë di hei möön i. 9 Nöö di sëmbë di kai unu ko dë o ko piki i taa: ’Wë mati o, be di woto sëmbë aki sindo a i kamian.’ Nöö di juu dë, ku gaan sen joo hopo go sindo a di möön lagi kamian. 10 Ma te wan sëmbë kai i ko a wan piizii, nöö go sindo a di möön lagi kamian. Nöö te a ko, nöö a o taa: ’Mati o, ko sindo a di möön bumbuu kamian aki baa.’ Nöö dee woto sëmbë o si taa i dë wan heihei sëmbë. 11 Biga Gadu o saka di sëmbë di ta suku u hei hënseei, nöö a o hei di sëmbë di ta saka hënseei.”
12 Baka di dë, hën Jesosi piki di womi di kai ën ko nëën pisi taa: „Te joo kai sëmbë u de ko njan ku i, nöö na kai dee mati fii, nasö dee baaa fii, nasö dee famii fii, nasö dee guduma dee ta libi a i bandja. Wë biga ee i kai dee sëmbë dë, nöö de o toona kai i tu. Nöö a o dë kuma de paka i u di bunu di i bi du. 13 Ma te joo kai sëmbë u de ko njan ku i, nöö i musu kai dee pootima, dee lanma, ku dee bookowojoma, 14 nöö joo ta dë waiwai, u di dee sëmbë dë an o sa toona paka i. Ma Gadu o paka i te a o weki dee bunuhati sëmbë ko a libi baka.”
15 Di Jesosi fan sö te a kaba, hën wan u dee sëmbë di bi sai dë taki dëën taa: „Wë di sëmbë di o feni kamian go sindo njan a tafa* a di Tii u Gadu, hën dë bunu e.”
16 Ma Jesosi piki ën taa: „Wan womi bi dë, di bi seeka soni u njan te a hia, hën a kai gaan hia sëmbë u de ko njan ku ën. 17 Di di juu kisi u de njan, hën a manda di saafu fëën go piki dee sëmbë taa: ’Un ko oo, di juu dou, hii soni dë seekaseeka kaa.’ 18 Ma de tuu ta pii soni ta konda. Wan u de taa: ’Ma sa ko e. Biga mi bai wan goon, nöö mi musu go luku ën. Ma na tei mi u hogi e.’ 19 Wan wotowan taki taa: ’Wë mi bai teni kau, nöö mi musu go luku fa de dë. Nöö hën mbei ma o feni pasi u ko. Ma na tei mi u hogi e.’ 20 Nöö hën wan wotowan taki möön taa: ’Wë djunsu aki mi tööu, nöö ma o sa ko e.’ 21 Hën di saafu toona ko, hën a dëën masa dee bosikopu. Hën di masa hati boonu seei, hën a taki dëën taa: ’Wë nöö toona go hesihesi, nöö i waka a dee gaangaan pasi ku dee pikipiki pasi dee dë a di köndë tuu, nöö i suku dee pootima, dee lanma, ku dee bookowojoma, nöö i tja de tuu ko.’ 22 Hën di di saafu go te a ko, hën a taa: ’Masa o, mi feni dee sëmbë tja ko kaa, ma kamian dë jeti.’ 23 Hën di masa piki di saafu taa: ’Go a dee pasi dee dë a döösë u di köndë, nöö te i feni sëmbë, nöö i musu piki de taa de musu ko nöömö, sö taa di wosu u mi sa fuu ku sëmbë. 24 Ma nöö mi taki da unu taa dee fosu sëmbë dee mi bi kai dë, nöö na wan u de o sa feni di njanjan u mi aki tesi seei.’”
25 Wanlö gaan hia sëmbë bi ta waka a Jesosi baka. Di a ta waka te wan pisi, hën a bia luku de, hën a taa: 26 „Di sëmbë di lobi hën tata, hën mama, hën mujëë, dee mii fëën, dee baaa ku dee sisa fëën, nasö di libi fëën möön mi, an fiti u dë wan bakama u mi. 27 Ee wan sëmbë an ta tja di posu* fëën ta waka a mi baka, nöö an fiti u dë wan bakama u mi. 28 Ee wan fuunu kë mbei wan wosu, nöö ja o go sindo pakisei te i kaba luku ee di möni fii tjika u du di wooko ufö i go seti mbei ën u? 29 Wë biga ee i go seti ën nöö ja ko kabëën, nöö te sëmbë waka pasa si ën, nöö de o mbei i fa. 30 De o taa: ’Di womi aki seti mbei wan wosu fëën, ma an sa kabëën.’ 31 Ee wan könu abi 10.000 sodati, nöö hën a pakisei taa a o go feti ku wan woto könu di abi 20.000 sodati, nöö a o sindo kai pakisei bunu ee a o sa feti ku ën. Na sö nö? 32 Wë ee a ko si taa an o sa wini, nöö a o manda bosikopuma go a di woto könu ala te a dë a pasi, u begi ën be de koti di taki ufö de ko miti. 33 Sö nöö hiniwan fuunu musu sindo kai pakisei luku ee a sa disa hii dee soni dee a abi, nöö ee ja sa disa de fii ko ta waka a mi baka, nöö ja sa dë bakama u mi e.
34 Satu da wan bumbuu soni. Ma ee di satu lasi di tesi fëën, nöö andi seei i sa du u mbei a kisi di tesi fëën baka? 35 Tuwë nöö i sa tuwëën. An bunu seei u tei paandi soni, söseei an bunu da di goondoti. Be di sëmbë di jei dee soni aki, go kai pakisei a de.”