U ta libi a „wan tumisi hogi ten” ka sëmbë abi bookohedi seei (2 Timoteo 3:1). Sömëni sëmbë abi möni fuka, soni an nango bunu a de wosudendu, gaan feti ta feti a goonliba, taku siki ta kii hia sëmbë, soni kuma wata nasö ventu, nasö libisëmbë seei ta booko dee kamian ka sëmbë ta libi. Boiti dee soni aki, sëmbë ta booko de hedi ku woto soni tu. De ta hakisi deseei: ’Dee logologo soni dee mi ta fii a mi sinkii aki sa dë kankël ö? Unfa di goonliba aki o dë da dee mii dee o kai mi avo?’

So juu a ta bunu te u ta booko u hedi ku soni. Te u musu mbei wan lepetisi, te u musu du wan soni a sëmbë fesi, nasö te u nango suku wooko, nöö u ta booko u hedi. Te u ta fëëë hogi, nöö wa o go du soni di sa tja hogi ko miti u. Ma te u ta booko u hedi pasa maaka, nöö a sa tja hogi ko da u. De bi öndösuku möön leki 68.000 sëmbë. De bi ko si taa dee sëmbë dee bi ta booko de hedi ku pikipiki soni bi ta dëdë möön hesi. Fëën mbei Jesosi bi hakisi wanlö sëmbë taa: „Undi fuunu sa libi tjë sö seei . . . , fu di i ta booko hedi mbei?” Awa, an ta tja wini ko da wan sëmbë te a ta booko hën hedi ku soni pasa maaka. Fëën mbei Jesosi bi taki taa: ’Ja musu ta booko i hedi’ (Mateosi 6:25, 27). Ma di soni dë kan u?

Woo sa du sö wan soni ee u ta tei dee köni lai u Bëibel, te u ta biibi a Gadu, ku te u abi di taanga biibi taa soni o waka bunu a di ten di ta ko. Kandë wa dë ku gaan bookohedi nöunöu, ma soni sa tooka wan daka. Fëën mbei boo go luku unfa dee soni dee u bi taki aki bi heepi Paul, Janet ku Alona ku dee bookohedi u de.

Paul da wan womi di toou, nöö a abi tu mii. A bi taki taa: „Di möni u di köndë bi ko lagi seei. Soni u njan bi ko möön dii, nöö soni njan bi taanga u feni tu. U bi musu taanpu sömëni juu longi a wan lëi u bai soni u njan. Ma te fuu bi dou ka de ta sei dee soni, nöö hii soni bi kaba kaa. Sömëni sëmbë bi ko mangu seei u di de an bi ta feni soni u njan, nöö so u de bi ta pasa kai a sitaati tu. U bi musu paka sömëni milion da dee soni dee u bi abi fanöudu hiniwan daka. Te u kaba fëën di möni an bi dë na wan hojo soni möön. Mi lasi di möni di bi abi a banku, di möni di mi bi ta paka u heepi mi te wan soni miti mi, ku di pensu möni u mi.”

Paul bi sabi taa ee a bi kë u di wosudendu fëën pasa di pena ten dë, nöö a bi musu wooko ku dee „köni” lai u Bëibel (Nöngö 3:21). A taki taa: „Mi bi ta wooko da wan masikapei di bi ta buta sitolomu a sëmbë wosu, ma mi bi ta tei hiniwan wooko di mi bi feni, aluwasi de an bi ta paka m’ hia seei. So sëmbë bi ta paka m’ ku soni u njan, nasö de bi ta da m’ soni di de bi abi a wosu. Ee de bi da m’ fö pisi sopu, nöö m’ bi ta hoi tu, nöö m’ bi ta sei dee tu wotowan. Te wan pisi, hën mi bi ko abi 40 ganian. Di de ko bigi, mi sei de, hën mi bai 300 möön. Bakaten, mi bi da wan sëmbë 50 ganian faa bi sa da m’ 50 kilo boon. Ku di boon mi bi sölugu dee sëmbë u mi ku sömëni woto famii, wan hii pisiten.”

Paul bi sabi tu taa di möön bunu soni di wan sëmbë bi sa du, hën da a bi musu futoou Gadu. Te u ta du dee soni di Gadu ta piki u, nöö a o heepi u. Jesosi bi taki wan soni di nama ku dee soni dee u abi fanöudu hiniwan daka. A bi taa: „Wan musu ta kai dee soni naandë gaan soni poi. . . . Ma unu Tata sabi dee soni un abi fanöudu kaa.”​—Lukasi 12:29-31.

A tjali taa di gaan felantima u Gadu de kai Saatan, ganjan gaansë u dee sëmbë u di ten aki, u di a ta mbei de ta booko de hedi ku dee soni u di goonliba aki nöö. Sëmbë ta booko de hedi gaanfa seei ku dee soni di de abi fanöudu, söseei de ta booko de hedi u feni dee soni di de an abi fanöudu tuutuu. Sömëni u dee sëmbë dë ta tei paima buta a de liba, nöö bakaten de ta ko si taa ’di sëmbë di ta mbei wotowan leni ën möni, ta toon saafu u di sëmbë dë’.​—Nöngö 22:7.

So sëmbë ta du soni di ta tja hogi ko miti de. Paul taki taa: „Sömëni u dee sëmbë u di kamian ka mi ta libi bi go disa dee famii u de ku dee mati u de u go suku wan möön bunu libi.” So u de bi foloisi go libi a woto köndë söndö u seeka pampia soni a fesi, nöö de an bi sa feni wooko. Hii juu dee sëmbë dë bi musu ta tjubi da siköutu, nöö de bi ta duumi a sitaati tu. De an bi da Gadu pasi faa heepi de. Ma mi ku mi wosudendu bi buta taa woo ta futoou Gadu faa heepi u ku dee möni fuka fuu.”

TEI DI LAI U JESOSI

Paul taki wan soni möön. A taa: „Jesosi bi taki taa: ’Ja musu abi bookohedi fu dee soni fu amanjan, biga te amanjan dou, nöö a sa sölugu fëën seei. Nöö hiniwan daka ta abi hën soni fii booko hedi nëën te tjika kaa.’ Fëën mbei hiniwan daka te m’ bi ta begi, nöö m’ bi ta hakisi Gadu faa ’da u di soni di u abi fanöudu fuu pasa di daka’ dë. Nöö a bi ta heepi u tuu, leti kumafa Jesosi bi paamusi u. Na hii juu u bi ta feni di soni di u kë e. Wan daka m’ bi go bai soni u njan, ma ma bi saandi de bi ta sei. Di mi dou a di sëmbë fesi di ta sei dee soni, hën mi bi ko si taa jököti de bi ta sei. Ma ma lobi jököti. Ma soni u njan bi di dë. Hën u bebe di jököti di ndeti dë. Mi ta da Gadu tangi taa hii di pisiten dë, mi ku mi wosudendu an go duumi söndö njan.”a

„Nöunöu wa dë ku möni fuka sö möön. Ma u bi lei a hii dee soni dee bi miti u dë, taa di möön bunu soni di u musu du te u abi bookohedi, hën da u musu futoou Gadu. Jehovahb o heepi u ee u ta du di kë fëën nöömö. U si fa di soni di sikifi a Psalöm 34:8 pasa tuutuu. A sikifi naandë taa: ’Tesi Jehovah, nöö joo si fa a bunu. Di sëmbë di ta suku tjubi nëën ta dë waiwai.’ Fëën mbei wa ta dë pantapanta ee a bi o ko pasa taa woo ko dë ku möni fuka wan pasi möön.

„Nöunöu u ko fusutan gbelingbelin andi libisëmbë abi fanöudu u tan a libi. Na wooko nasö möni de abi fanöudu, ma soni u njan. U kë u di ten dou seei te di soni di Gadu paamusi aki o pasa tuutuu. Di Bëibel taa: ’Soni u njan o fuu goonliba seei.’ Ma a di ten di u dë aki, ’ee u abi sondi fuu njan u pasa u libi ku koosu fuu tapa u sinkii, nöö a tjika fuu dë tifihedi’. Dee soni di di Bëibel ta taki aki ta da u taanga seei. A taa: ’Wan musu lobi möni te a kisi unu buta nëën basu e, ma un musu ta tifihedi ku dee soni un abi kaa. Biga Gadu bi taki taa: „Ma o disi i seepi, kwetikweti. Na wan juu mi o disa i wanwan möönsö.” Nöö hën mbei u sa taki seei söndö panta a u hati taa: „Masa [Jehovah] hën da mi Heepima. Ma o fëëë.”’”c

U musu abi wan taanga biibi seei u ’waka ku Gadu’ leti kumafa Paul ku hën wosudendu ta du ën (Kenesesi 6:9). Ee u abi gaan möni fuka nöunöu nasö ee woo abi möni fuka a di ten di ta ko, nöö u sa lei sömëni soni seei u di biibi di Paul bi abi ku di wooko di a bi wooko, ku dee köni lai u Bëibel.

Ma andi u musu du ee u abi bookohedi a di wosudendu fuu?

Wan mujëë de kai Janet taki taa: „Kölö sö baka di mi tata dëdë, hën mi manu piki mi taa a dë ku wan woto mujëë. Baka di dë, an piki mi na wan soni möön seei, hën a pii hii hën lai, hën a go disa m’ ku dee tu mii.” Janet bi ko feni wan wooko, ma di möni di a bi ta kisi an bi tjika u paka di wosu u de. Nöö na ku möni fuka wanwan nöö a bi dë. A taa: „Dee gaan hia soni dee mi wanwan bi musu ta du, bi ta möön mi seei. A bi ta hati m’ seei taa ma bi sa da dee mii u mi dee soni dee woto mama ku tata ta da dee mii u de. Te kuma tide mi ta booko mi hedi ku di fasi fa wotowan ta si mi ku dee mii u mi. Kandë de ta hakisi deseei ee m’ bi mbei hii möiti u mbei soni go bunu a di toou libi u mi.”

Di begi di Janet bi ta begi bi heepi ën u hoi ënseei, nöö a bi heepi ën u ko dë wan möön bunu mati u Gadu tu. Janet taki möön taa: „A bi ta möön taanga da mi a ndeti seei, biga te hii soni bi dë sö piii, nöö mi bi ta pakisei dee bookohedi u mi. Ma te mi bi ta begi, ku te mi bi lesi wan pisi u di Bëibel, nöö a bi ta heepi mi u duumi. Wan u dee tëkisi u Bëibel di mi möön lobi da Filipi 4:6, 7. A ta taki taa: ’Wan musu ta booko hedi a na wan soni e, ma un musu ta begi Masa Gadu nöömö ta dëën tangi. I musu ta tja hii dee fuka fii nango ta konda dëën, nöö a o da i kötöhati. Nöö di kötöhati di a o da i dë o bigi pasa hii sëmbë fusutan, nöö a hoi hii pakisei fii ku i hati tuu.’ Sömëni ndeti mi puu begi Jehovah, nöö mi bi si taa a bi da mi kötöhati.”

Dee soni di Jesosi bi taki di nama ku begi, a di taki di a bi hoi a di kuun sa heepi u ku hii pei bookohedi di u abi. A bi taa: „Ufö un go u go begi seei, Gadu sabi gaanduwe kaa andi ku andi un abi fanöudu” (Mateosi 6:8). Tökuseei u musu ta hakisi ën faa heepi u. Di fosu soni di u musu du di o heepi u u „pusa go a Gadu” nasö u ko zuntu ku ën, hën da u musu ta begi ën. Andi o pasa te u ta du sö? Wë „Gadu seei o pusa ko a i tu.”​—Jakobosi 4:8.

Awa, te u ta begi, nöö na fii nöö woo fii bunu u di u ta konda dee bookohedi fuu da Gadu. Ma Jehovah, di „Sëmbë di ta haika begi”, ta du soni u heepi dee sëmbë dee abi biibi nëën (Psalöm 65:2). Fëën mbei Jesosi bi lei dee bakama fëën taa „de an musu ko wei u begi Gadu, ma de musu ta begi ën hiniwanten söndö lasi hati” (Lukasi 18:1). Hii juu u musu ta hakisi Gadu faa tii u, söseei faa heepi u, nöö u musu abi di futoou taa a o piki dee begi fuu u di u abi biibi nëën. Nöiti u musu pakisei taa an o kë heepi u nasö taa an o sa heepi u. Te u ta ’begi hiniwanten’ a sö wan fasi, nöö u ta lei taa u abi biibi tuutuu.​—1 Tesalonika 5:17.

ANDI A KË TAKI U ABI BIIBI TUUTUU?

Ma andi da biibi tuutuu? Wan sëmbë ta ko abi biibi te a „ko sabi” Gadu (Johanisi 17:3). Di fosu soni di u musu du, hën da u musu lei soni a Bëibel fuu ko sabi fa Gadu ta pakisei. Woo ko sabi taa a ta si hii sëmbë, söseei taa a kë heepi u. Ma na sabi nöö u musu sabi soni u Gadu fuu sa ko abi biibi. U musu mbei möiti tu u ko dë mati ku ën. Leti kumafa wa sa ko dë mati ku wan sëmbë a wan kodo daka dendu, sö nöö wa sa ko dë mati ku Gadu a wan kodo daka dendu tu. Möön u ta lei soni u Gadu, möönmöön ’di biibi fuu o göö ko soni’. Söseei di biibi fuu o ko möön taanga, te u „ta du dee sondi dee ta kai ku ën” ku te u ta si fa a ta heepi u (2 Kolenti 10:15; Johanisi 8:29). Di lö biibi aki hën bi heepi Janet ku dee bookohedi dee a bi abi.

Janet taki taa: „Di soni di bi heepi mi tuutuu u ko abi wan möön taanga biibi, da di si di mi bi si fa Jehovah heepi m’„ ”a hii dee soni dee bi ta miti m’. Te wan sëmbë libi hogi ku u, nöö a ta djei kuma wa o sa tja sö wan soni. Ma te u ta begi Jehovah hii juu, nöö u ta si taa a ta heepi u a wan fasi di wa bi mëni. Te mi ta begi Jehovah ta dëën tangi, nöö di soni dë ta heepi m’ u hoi a pakisei fa a heepi m’ tjika. Hii juu a bi ta heepi m’ te mi bi abi ën fanöudu. Jehovah da m’ baaa ku sisa a di biibi di dë tuutuu mati. Hii juu de ta heepi m’, nöö de ta libi a wan fasi di dee mii u mi sa djeesi.”a

„Mi sabi nöunöu faandi mbei Jehovah ta taki taa: ’Ma lobi te sëmbë ta booko toou seepiseepi’ (Maleaki 2:16). Di soni aki da di möön hati soni di wan sëmbë sa du ku wan sëmbë di hën ku ën toou. A pasa sömëni jaa kaa di mi manu go disa m’, ma tökuseei so juu mi ta fii miseei hooo jeti. Te mi ta fii sö, nöö mi ta pooba u du wan soni u heepi woto sëmbë, nöö hii juu di soni dë ta heepi m’ tu.” Di fiti di Janet fiti di mama wëti di ta lei u taa wa musu ta dë u wanwan nöömö, bi heepi ën fu an ta booko hën hedi sö möön.b​—Nöngö 18:1.

Janet taa: „Di soni di ta da m’ kötöhati seei, da di sabi di mi ko sabi taa Gadu da ’wan tata da dee mii dee na a’ tata möön, söseei wan kuutuma di ta hopo taki da dee mujëë dee manu u de dëdë kaa.’ Nöiti Gadu o go disa m’ kumafa mi manu go disa mi” (Psalöm 68:5). Janet sabi taa Gadu an ta pooba u ku „hogi”. Ma a ta da u köni ku „di gaan kaakiti” di u abi fanöudu u heepi u ku dee bookohedi fuu.​—Jakobosi 1:5, 13; 2 Kolenti 4:7.

Ma andi u musu du ee u ta booko u hedi ku hogi di sa miti u di sa mbei u lasi u libi?