Dë wan mati u Gadu u teego!

Taanga möiti dë fanöudu te i ta tei mati, söseei taanga möiti dë fanöudu u hoi wan mati. Joo feni te a hia bunu u di möiti di i ta mbei u toon wan mati u Gadu, ku söseei u di möiti i ta mbei u tan wan mati fëën. Jesosi bi taki da dee sëmbë dee bi ta biibi nëën taa: „Di tuutuu lei o mbei un ko fii” (Johanisi 8:32). Andi di soni aki kë taki?

I sa ko fii nöunöu kaa. I sa ko fii u dee poipoi lei ku dee lëgëdë soni di Saatan paaja a hii kamian. Milionmilion sëmbë di na sabi Jehovah, aan houpu. Ja o dë kuma dee sëmbë dë (Loomë 8:22). Dee mati u Gadu an o „fëëë dëdë” kumafa de bi ta fëëë möön.​—Hebelejën 2:14, 15.

I sa ko fii a di njunjun goonliba u Gadu. A di ten di ta ko, dee mati u Gadu o ko fii tuutuu! A di Paladëisi, feti an o dë, siki ku hogidu seei an o dë möön tu. Pena ku gaan hangi an o dë. Sëmbë an o ta gaandi, de an o ta dëdë möön tu. Sëmbë an o ta fëëë soni möön, de an o ta pena wotowan, söseei de an o ta du takuhati soni möön tu. Di Bëibel taa Gadu o du di soni aki: „I ta jabi i maun dendu, nöö i ta da hiniwan libilibi soni di soni di hën hati fii taa a kë.”​—Psalöm 145:16.

Dee mati u Gadu o libi u teego. Gadu o da hii dee sëmbë dee kë dë mati fëën wan gaan dii kado, hën da di libi u teego (Loomë 6:23). Sindo pakisei pikisö unfa di libi u teego bi o sa dë da i!

Joo abi ten u du hia soni. Kandë joo kë lei u pëë poku, nasö joo kë tëmbë. A sa dë sö taa joo kë sa soni u dee mbeti nasö u dee uwii. Nasö kandë i kë go si woto köndë ku woto lö sëmbë. Te joo libi u teego, nöö joo sa du hii dee soni aki!

Joo abi ten u tei mati ku hia sëmbë. Te joo libi u teego nöö joo ko sabi sömëni woto sëmbë di toon mati u Gadu. Joo ko sabi un pei soni de sa u du, ku söseei dee bumbuu fasi u de. Nöö dee sëmbë dë o toon mati fii tu. Joo lobi de, nöö de o lobi i tu (1 Kolenti 13:8). Te joo libi u teego, nöö joo abi di ten u toon mati ku hii sëmbë a goonliba! Ma di möön gaan soni, hën da di matifasi di i abi ku Jehovah o ko taanga gingin. Hii höndöhöndö jaa di o ta pasa, i ku Gadu o ko möön zuntu. Be a dë sö taa i dë wan mati u Gadu, u teego!