Watchtower LIBRARY A INTERNET
Watchtower
LIBRARY A INTERNET
Saamakatöngö
  • BËIBEL
  • BUKU
  • KOMAKANDI
  • km 7/15 bld. 3-4
  • Woto u di Jaarboek u 2015

Fëlön an dë da di pisi aki.

Piimisi, wan soni ta tapa u fuu pëë di fëlön.

  • Woto u di Jaarboek u 2015
  • Di Könuköndë diniwooko fuu 2015
  • Hedipakisei
  • Gabriel bi heepi hën avo
  • Wan Bëibel studie a matu dendu
Di Könuköndë diniwooko fuu 2015
km 7/15 bld. 3-4

Woto u di Jaarboek u 2015

Gabriel bi heepi hën avo

Baka di Gabriel di abi sikisi jaa bi kumutu a wan könklësi di bi hoi a Palaguwai, hën a bi go dë ta pakisei unfa a dë fanöudu tjika u paaja di Könuköndë bosikopu da sëmbë. Hën a ko mëni baka taa a abi wan sëmbë di a bi o kë fëën ku ën dë makandi a di paladëisi. Di sëmbë dë, da hën avo. Ma hën avo an bi kë ta jei soni u di tuutuu lei, nöö a bi ta du ku hën mujëë ku dee mii fëën u di de bi dë kotoigi.

A di wan seei daka dë, Gabriel hakisi dee gaan sëmbë fëën u de bëli dee avo fëën dëën, dee ta libi na Algetina, be a fan ku de a Internet ka a bi sa si de. Gabriel bi konda dëën avo faandi mbei a dë fanöudu u lei soni u Bëibel. Nöö hën a hakisi ën taa: „Öupa, ja kë u m’ lei i soni u Bëibel ö?”, hën di avo fëën piki taa a kë. Nöö hën Gabriel piki ën taa a o ta lei ën soni u Bëibel a wan buku de kai Haika Gadu nöö joo libi u teego. Sö a ko pasa taa Gabriel bi ta lei ën avo soni u Bëibel ku di brochure dë hiniwan liba. U di na wan u de bi sa u lesi bumbuu, mbei de bi ta seeka deseei a fesi te de bi o lei soni Bëibel. Hii juu Gabriel bi ta seeka hënseei da di studie, nöö a bi ta bisi wan bösöökö ku wan dasi te a bi o lei hën avo soni.

Bakaten dee avo u Gabriel bi go luku de wan tu wiki, nöö hën öupa bi nango ku de a dee komakandi. Di Gabriel avo bi toona go baka na Algetina, hën wan baaa bi nango ta lei ën soni u Bëibel, nöö a bi go a fesi seei u te a ko dë wan peleikima di an dopu jeti. Nöunöu dee avo u Gabriel ta begi makandi hiniwan daka. Gabriel seei go a fesi tu. Nöunöu hënseei dë wan peleikima di an dopu jeti. Hën avo kë tei dopu u lei taa a buta hën libi a Jehovah maun.

Wan Bëibel studie a matu dendu

Hiniwan mamate Margret ta tja di dagu fëën go waka a wan matu kamian di dë na Alumanköndë. A taki taa: „Mi ta pooba u fan ku dee sëmbë dee ta waka pasa aki. Te mi si taa mi ku wan sëmbë ta fan sutisuti, nöö mi ta bigi fan ku de u Bëibel.”

Wan daka hën a miti wan mujëë di pasa seibiteni jaa, di bi tja di dagu fëën go koi. Di mujëë bi wai taa Margret bi fan ku ën, nöö a bi piki ën taa a ta begi Gadu, söseei a ta lesi Bëibel hiniwan daka. Sensi di ten dë, hën de nango ta miti hiniwan daka ta taki u soni u Gadu. Wan daka hën di mujëë hakisi Margret taa: „Unfa i du sabi sö hia soni u Bëibel?” Hën Margret piki ën taa hën da wan Jehovah Kotoigi.

Sömëni pasi Margret bi hakisi di mujëë ee a kë faa ta ko lei ën soni u Bëibel nëën pisi, ma di mujëë an bi kë. Ma tökuseei de bi ta miti ta fan jeti. Ma baka wan tu liba hën Magret toona hakisi di mujëë ee a kë faa ko ta lei ën soni u Bëibel nëën pisi. Hën di mujëë piki ën di pasi aki taa a ta fëë u lei soni u Bëibel, u di di womi di hën ku ën ta libi, an lo’ Jehovah Kotoigi.

Di woto pasi di Magret go u go köi a di matu möön, hën a tja di Bëibel lei-buku fëën ku hën Bëibel. Di a si di mujëë, hën a tei degihati, hën a taa: „Di pasi aki ma kë hakisi i u m’ ko lei i soni u Bëibel a i pisi, ma m’ kë hakisi i ee mi sa ta lei i soni u Bëibel a di matu aki.” Ku këë a wojo di mujëë piki taa a kë. Sikisi pasi a wan wiki a bi ta ko a di matu dendu, u Margret lei ën soni u Bëibel. Te di wei tooka, nöö so juu Margret musu ta lei ën soni u Bëibel a wan paazoo basu ku wan batilëi.

    Saamakatöngö buku (2007-2025)
    Log out
    Log in
    • Saamakatöngö
    • Mandëën da wan sëmbë
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacyinstellingen
    • JW.ORG
    • Log in
    Mandëën da wan sëmbë