Woto u di Jaarboek u 2015

Di bunu fasi fa wan tata bi tja hënseei

De kiija Jemima, wan mujëë mii di ta libi a Sipanjöluköndë kuma wan Jehovah Kotoigi. Ma di a bi abi seibi jaa, hën hii hën libi bi ko tooka. Hën mama an bi kë dë wan Jehovah Kotoigi möön, hën a booko toou ku Jemima tata. Di Jemima bi a’ 13 jaa, hën a disa u hulu dee Jehovah Kotoigi, söseei an bi kë fëën tata konda na wan soni u Bëibel dëën möön.

Di Jemima bi ko möön bigi, hën a bi go ta du wan wooko ka sëmbë ta mbei möiti u heepi pootima, söseei a bi go nama ku politiki, u di a bi ta suku u feti da dee leti u pooti sëmbë. Ma baka wan pisiten di an bi a’ wooko, hën wë hën tata Domingo bi hakisi ën faa ko wooko ku ën u ta feifi sëmbë wosu.

Wan daka di Jemima ku hën tata bi ta wooko, hën wë hën tata hakisi ën ee a kë faa lei ën soni u Bëibel. Hën a taa an kë, ma a bi piki ën taa te di daka di a o kë lei soni u Bëibel dou, nöö a o piki ën. Hën tata bi lo’ u pëë di Bëibel ku dee buku fuu ta haika te a dë a wooko, ma Jemima hën a bi ta buta soni nëën jesi ta haika woto poku fëën.

A ëlufumu-liba u di jaa 2012 hën Domingo, di bi toona toou baka kisi di kai u go a di siköö da Keesitu sëmbë di toou. A bi bigi da Jemima seei taa hën tata bi o go u tu liba longi a wan siköö ka de ta lei sëmbë soni u Bëibel, nöö baka di dë a bi o disa hii soni u foloisi go a hiniwan kamian ka de bi o mandëën faa go. Awaa ufö Jemima bi ko fusutan taa hën tata bi lobi di tuutuu lei ku hii hën hati, nöö a bi kë sabi faandi mbei hën tata bi lobi di tuutuu lei sö.

Jemima bi bia ko disa u haika dee poku dee a bi ta haika, hën a ko ta haika dee Bëibel soni dee hën tata bi ta pëë. A bi bigi ta hakisi hën tata soni u Bëibel tu. Wan daka di Domingo bi dë taanputaanpu a wan sikada ta feifi, hën Jemima piki ën taa: „I sabi jeti di mi bi piki i taa te di daka di mi bi o kë lei soni u Bëibel dou, nöö mi bi o piki ö? Wë di daka dou.”

Domingo bi wai seei u jei di soni dë. A jailiba u di jaa 2013, Jemima tata bi bigi lei ën soni u Bëibel tu pasi a wan wiki. Di di siköö da Keesitu sëmbë di toou, bi bigi a piki-deewei-liba, hën Domingo bi bigi ta lei Jemima soni u Bëibel a Internet, nöö de bi sa si deseei. Jemima bi go luku fa hën tata bi o kisi pampia u di a bi kaba di siköö, nöö a bi lo’ dee taki di dee baaa bi hoi di daka dë seei. A 14 u tuwalufumu-liba u di jaa 2013, Jemima bi tei dopu.

Jemima bi taki taa: „Jehovah bi hoi pasensi da mi, nöö mi sabi taa noiti a bi disa u heepi mi. Jehovah mbei mi ko feni tuutuu mati, wan soni di nöiti ma bi o sa feni a di goonliba. Dee baaa ku dee sisa dee mi abi a hii së u goonliba ta mbei mi tei di lobi di Jehovah lobi mi u bigi seei.”

De njönku poi u konda soni u Gadu da sëmbë u?

Wan daka, hën wan njönku womi mii u seibi jaa di de ta kai Teariki, di ta libi a wan paati di dë a di pisiwata u Kiribati, bi ta peleiki ku hën tata Tueti. Nöö hën de go a wan wosu, hën de miti wanlö womi mii ku wanlö mujëë mii dee bi pasa 20 jaa. De bi dë söwan teni sëmbë a di wosu. Baka di Teariki tata peleiki da de, hën wan u de piki ën taa: „U si taa hii unu tuu ta tei dee mii fuunu ta tja go a peleiki. Faandi mbei un ta tja de? De njönku poi u konda soni u Gadu da sëmbë.”

Hën Tueti hakisi de taa: „Un kë si ee di womi mii u mi sa konda soni u Gadu da sëmbë u? Ee un kë, mi sa waka go taanpu a döö, nöö a sa peleiki da unu.” Hën hii de tuu piki taa: „Aai u kë faa peleiki da u.”

Hën Tueti waka go taanpu a döö. Hën Teariki hakisi de taa: „Un sabi Gadu në u?”

Hën wan u de piki taa: „Aai, hën në da Jesosi!” Wan wotowan taa: „Hën në da Gadu.” Wan wotowan möön taa: „Hën në da Masa.”

Hën Teariki piki de taa: „Boo luku andi di Bëibel ta taki. Kandë u sa lesi Jesaaja 42:5 makandi.” Baka di de lesi di tëkisi, hën a hakisi de taa: „Fu ambë di tëkisi aki ta taki?”

Hën wan u de piki taa: „U Gadu.” Hën Teariki taa: „Aai, a ta taki u di tuutuu Gadu. Nöö andi di tuutuu Gadu ta piki u a vers aiti? A taa: ’Mi da Jehovah. Mi në di dë. Ma o mbei woto sëmbë kisi di hei di mi musu kisi’ Un si andi da di në u Gadu ö?”

Hën hii de tuu piki taa: „Jehovah.”

Hën Teariki hakisi hii de tuu taa: „Un wini u sa feni te u ta kai di në u Gadu, Jehovah? U sa lesi di piki a Tjabukama 2:21. A ta taki naandë taa: ’Hiniwan sëmbë di o kai Masa Gadu në faa feni heepi nëën, hën Gadu o puu fu an feni sitaafu.’ Un wini u sa feni te u ta kai di në u Gadu, Jehovah?”

Hën wan u de piki taa: „A o puu fu wa feni sitaafu.”

Nöö hën Teariki tata toona waka ko. Hën a hakisi de taa: „Wë, unfa u si ën? Dee njönkuwan fuu sa konda soni u Gadu da sëmbë u? A fiti fuu ta tja de go a di peleikiwooko u? Hën hii de tuu piki taa dee mii sa’ u peleiki, nöö a dë wan bunu soni u ta tja de go a di peleikiwooko. Hën Tueti piki de taa: „Unuseei sa konda soni u di tuutuu lei da sëmbë, leti kumafa Teariki ta du ën, ee un lei ko sabi andi sikifi a Bëibel.”