De kii Jesosi

LUKU andi ta pasa dë. Na wan gaan hogi nö? De kii Jesosi. De hëngi hën a wan posu. Nöö de pekëën ku peegu nëën maun ku ën futu. Faandi mbei de du sö wan soni ku Jesosi?

Wë u di so sëmbë ta buuse Jesosi. I sa’ ambë u? Wan u de da di taku engel de kai Saatan Didibi. Hën bi feni Adam ku Eva ganjan u de pasa Jehovah buka. Nöö Saatan da di sëmbë di mbei dee felantima u Jesosi du di gaan hogi aki.

Ufö dee felantima u Jesosi pekëën a di posu aki, de bi du hogihogi soni ku ën. I sabi jeti fa de bi go kisi ën a di djai de kai Gëtiseimani ö? Ambë da dee felantima dë? Awa, dee hedima u keiki wë. Boo go luku andi pasa möön.

Di dee hedima u keiki kisi Jesosi tja go, hën dee apösutu fëën kule go. De disa Jesosi wanwan ku dee felantima, u di de bi fëëë. Ma apösutu Petuisi ku Johanisi an bi kule go a longi. De bi ta watji luku andi bi o pasa ku Jesosi.

Dee begima tja Jesosi go a di gaan womi Ananasi di bi dë Kaba Hei Begima. Dee sëmbë an tan dë longi. Baka di dë, de tja Jesosi go a di wosu u di Kaba Hei Begima Kajafasi. Sömëni u dee hedima u keiki bi ko makandi a di wosu u Kajafasi.

De hoi kuutu a Kajafasi wosu. De bi ta tja sëmbë ta ko ta mindi soni da Jesosi. Hii dee hedima u keiki bai taa: ’Jesosi musu dëdë.’ Hën de ta tunta nëën fesi ta naki ën ku böö.

Hii fa dee soni dë ta pasa, Petuisi dë fëën a di djai dendu. Döö bi kötö, nöö dee sëmbë bi mbei wan faja. Di de dë ta këndë faja, hën wan mujëë futuboi luku Petuisi hën a taa: ’Di womi aki seei bi dë ku Jesosi.’

Petuisi piki taa: ’Ambë, na mi!’

Dii pasi sëmbë piki Petuisi taa a bi dë ku Jesosi. Ma hiniwan pasi Petuisi ta fia taa na tuu. Di u dii pasi di Petuisi fia baka, hën Jesosi bia luku ën. Tjali kisi Petuisi u di fia a fia dë, nöö hën a kule go a döö go këë te a bigi.

Nöö di feeda mamate biten di sonu kumutu, hën dee gaan begima tja Jesosi go a di gaan kuutu wosu u de de kai di Sahidin. Naandë de kai kuutu u luku andi de o du ku ën. Hën de tjëën go a Pontuisi Pilati di Gaama u di pisiwata u Judea.

De piki Pilati taa: ’Gaama o, di womi aki hogi. A musu dëdë.’ Baka di Pilati hakisi Jesosi wan tu soni, hën a taa: ’Ma feni taa di womi aki du wan hogi e.’ Hën Pilati manda Jesosi go a Helodi Antipasi. Helodi da di Gaama u Galilea, ma a ta dë a Jelusalen. Helodi seei an feni na wan hogi a Jesosi, hën a mandëën go baka a Pilati.

Pilati kë manda Jesosi go. Ma dee felantima u Jesosi kë lusu wan woto sitaafuma a Jesosi kamian. Di womi dë da di gaan fufuuma de kai Balabasi. Ndeti bi tapa di Pilati tja Jesosi ko a döö. A piki dee sëmbë taa: ’Un luku di könu fuunu.’ Ma dee gaan begima bai taa: ’Un pekëën kii, un pekëën kii!’ Fëën mbei Pilati lusu Balabasi, hën de tei Jesosi ta tja go kii.

Feeda sapate, hën de peka Jesosi a wan posu. Luku ën a di peentje, nöö a dee tu së bandja fëën de peka wan hogihatima a wan posu tu. Nöö ufö Jesosi böö koti, hën wan u dee hogiduma hakisi ën taa: ’Masa o, mëni mi te i dë a di könuköndë fii e.’ Hën Jesosi piki ën taa: ’Mi ta soi taa mi ku i o dë makandi a di Paladëisi.’

Na wan hanse paamusi di dë u? I sa fuun pei Paladëisi Jesosi ta taki ö? Naasë di paladëisi di Gadu bi mbei a di bigi bi dë? Awa, a goonliba aki. Nöö te Jesosi o tii kuma könu a liba, nöö a o tja di womi aki ko a libi baka faa libi a di njunjun Paladëisi a goonliba aki. Na soni u piizii ö?