Wan teeja lei dee womi di pasi

I TA si di teeja di ta koti faja njaan, di wan u dee womi ta lei ku ën finga u? De si di teeja dë di de kumutu a Jelusalen. Dee womi aki kumutu a di së u sonu kumutu, nöö de da könima di ta luku teeja u saandi o pasa a goonliba. De ta biibi taa di njunjun teeja aki ta tja de go a wan apaiti sëmbë.

Di dee womi dou a Jelusalen hën de hakisi taa: ’Wë na unsë di mii dë di o toon könu fuun dee Dju sëmbë aki?’ „Dju” da wan woto në u dee Isaëli sëmbë. ’Biga di u bi dë a u köndë a di së u sonu kumutu hën u si wan teeja di lei u soni fëën, nöö hën u ko aki fuu ko bigi ën.’

Di Helodi, di könu u Jelusalen jei di soni aki, hën hati fëën boonu seei. An bi kë u wan woto könu tei ën kamian. Hën Helodi kai dee Gaan Begima ko hakisi taa: ’Naasë de o pai di könu di Gadu paamusi unu?’ Hën de piki taa: ’Wë di Bëibel taa a Betelehem, de o pai ën.’

Hën Helodi kai dee womi dee kumutu a di së u sonu kumutu, hën a piki de taa: ’Un go suku di mii. Te un feni ën, nöö un toona ko piki mi baka wantewante. Biga miseei kë go bigi ën tu.’ Ma suku wë Helodi bi ta suku di mii u kii e!

Hën di teeja tja dee womi tee de go dou a Betelehem leti a di wosu ka di mii dë, nöö hën a tan piii a di wosu liba. Di dee womi denda a di wosu dendu, hën de go si Malia ku di mii Jesosi naandë. Nöö hën de da Jesosi dee gudu de bi tja ko dëën. Ma bakaten Jehovah bai dee womi a wan sunjan taa de an musu toona go a Helodi möön. Nöö hën de tei wan woto pasi waka go u de a de köndë.

Di Helodi ko jei taa dee womi go a wosu baka, hën hati fëën boonu te na soni. Hën a paaja di buka taa de musu kii hii dee womi mii u Betelehem dee abi tu jaa tja go a basu. Ma Jehovah bi piki Josëfu a wan sunjan a fesi kaa andi Helodi kë du. Fëën mbei Josëfu ku ën wosudendu hai go a Egepiti. Bakaten di Josëfu ko jei taa Helodi dëdë, hën a tei Malia ku Jesosi, hën de toona go baka a Nazalëti. A di köndë aki de kiija Jesosi.

Ambë i mëni taa mbei di njunjun teeja bi ta koti faja njaan? Pakisei taa baka di dee womi si di teeja hën de go a Jelusalen. Saatan Didibi wë bi kë kii di Womi Mii u Gadu. Nöö a bi sabi tu taa di könu u Jelusalen de kai Helodi bi o pooba u kii ën. Fëën mbei Saatan hën wë bi mbei di teeja koti faja.