Johanisi dopu Jesosi

LUKU di pomba di ta saka ko a di womi liba dë. Jesosi wë da di womi dë e. Aki Jesosi abi söwan 30 jaa. Nöö di woto womi da Johanisi. U bi lei pikisö soni fëën kaa. I sabi jeti di Malia bi go luku Elizabëti di di mii bi ta djombo piizii a Elizabëti bëë dendu ö? Di mii di bi dë nëën bëë dendu bi dë Johanisi. Ma andi Johanisi ku Jesosi ta du aki?

Djunsu dë Johanisi dopu Jesosi a Joodan Lio. I sabi unfa de ta dopu sëmbë u? De ta doki di sëmbë go a basu wata, nöö baka di dë de ta hopo ën ko a liba wata baka. U di Johanisi ta dopu sëmbë, mbei de ta kai ën Johanisi di Dopuma. Ma faandi mbei Johanisi dopu Jesosi?

Wë, Johanisi du di soni aki, biga Jesosi hën ko hakisi ën faa dopu ën. Johanisi ta dopu sëmbë di kë lei taa de ta tjali u dee hogi de du. Ma Jesosi bi du hogi di musu hati ën u? Nönö, na wan daka Jesosi du hogi, biga hën da Gadu Womi Mii fëën seei vö di kumutu a Gadu ko a goonliba. Hën da wan woto soni mbei a hakisi Johanisi faa dopu ën. Boo go luku faandi mbei.

Bifö Jesosi ko a Johanisi, a bi dë wan tëmbëma. Wan tëmbëma da wan sëmbë di ta mbei soni ku udu. A ta mbei soni kuma tafa, sutuu ku bangi. Josëfu di manu u Malia bi dë wan tëmbëma, nöö a lei Jesosi tëmbë wooko. Ma Jehovah an bi mandëën Womi Mii ko a goonliba u dë tëmbëma. A bi a’ wan apaiti wooko dëën, nöö di juu bi dou awaa u Jesosi bigi ku di wooko dë. U di Jesosi kë lei taa a ko u du di kë fëën Tata, mbei a go hakisi Johanisi faa dopu ën. Gadu bi wai ku di soni dë u?

Aai, biga baka di Jesosi ko a liba wata, hën de jei wan töngö piki te a liba ala taa: ’Di womi aki da di Womi Mii u mi. Libi fëën ta kai ku mi.’ Söseei a djei kuma mundu jabi wajaa, hën di pomba aki saka ko a Jesosi liba. Ma na wan tuutuu pomba e. Djei a ta djei wan. Di santa jeje u Gadu wë di dë.

Nöunöu Jesosi a’ sömëni soni u go sindo pakisei. A go tan a wan pii kamian 40 daka longi. Ala Saatan faaka ën. Dii pasi Saatan pooba Jesosi faa pasa dee wëti u Gadu. Ma Jesosi an du sö.

Baka di Jesosi kumutu naandë ko, hën a miti wanlö womi dee toon dee fosu bakama fëën. Wan tu u de de ta kai Andiasi, Petuisi (hënseei de ta kai Simon), Filipi ku Nataniëli (hënseei de ta kai Batolomisi). Jesosi ku dee njunjun bakama fëën dë go a di pisiwata u Galilea. Di de dou Galilea hën de tan a di foto Kana, ka Nataniëli ta libi. Naandë Jesosi go a wan gaan toou wosu, ka a du di fosu foombo wooko fëën. I saandi a du ö? A mbei wata toon win.