Wan bosikopu da di pleikima di an dopu jeti
A dë wan gaandi taa i sa pleiki makandi ku di gemeente hii di ja tei dopu jeti. U musu gafa i u di i go a fesi a di dini u Gadu. I ko sabi finifini andi Gadu kë u di i lei soni u Gadu Wöutu. Boiti di dë dee soni dee i ko sabi mbei taa i ko a’ biibi a Gadu.—Joh. 17:3; Heb. 11:6.
Kandë i bi nango a wan woto keiki ufö dee Jehovah Kotoigi bigi lei i soni u Gadu. Nasö sonte i bi ta du woto soni di an bi ta kai ku dee maiki u Bëibel. Ma nöunöu i ta söi taa i a’ biibi, fëën mbei a ko ta hati i taa ja bi libi kumafa Gadu kë a di ten di pasa. Boiti di dë di biibi fii mbei taa i bia disa dee hogilibi fii, nöö i dë kabakaba u libi kumafa a fiti a Gadu wojo.—Tjab. 3:19.
Ma sonte i naki kölöku taa i kiija a di tuutuu biibi, i lei soni u Bëibel, nöö i ta du dee soni Keesitu sëmbë musu du. Kandë leti kuma Timoteo ’i bi lei Masa Gaangadu Buku te sabi, sensi di i bi dë piki mii seei’. Nöö di soni dë heepi i fu ja du soni di an fiti wan Keesitu sëmbë ku söseei fu ja du gaan zöndu (2 Tim. 3:15). I lei u finga futu da dee pei fii di kë i du soni di na fiti, söseei ja mbei taa woto soni hai i go du soni di Jehovah buuse. Boiti di dë i nango hii juu a dee komakandi, dee kling komakandi ku dee könklësi, söseei i ta konda da wotowan andi i ta biibi. Hii dee soni aki ta lei taa i a’ biibi. I lei fa fii du di pleikiwooko möön bunu u di i ta wooko ku dee gaan sëmbë fii ku wotowan a di pleikiwooko. Hën i buta taa joo dini Jehovah a di gemeente kuma wan pleikima di an dopu jeti.
Ee a dë sö taa sensi pikimii ten i ko lei sabi Jehovah nasö ee di i ko bigi aki ufö i ko sabi ën, nöunöu i kai pakisei u du tu soni: i kë buta i libi nëën maun, nöö i kë tei dopu. Dee tu soni aki o mbei taa i go a fesi a di dini i ta dini Gadu. I ta buta i libi a Jehovah maun te i begi ën nöö i piki ën taa i kë dini hën wanwan tö u teego (Mat. 16:24). I ta lei taa i buta i libi a Jehovah maun te i tei dopu, hën da de o doki hii i sinkii go a basuwata, nöö de hopo i baka (Mat. 28:19, 20). Te i buta i libi a Jehovah maun, nöö i tei dopu, hën da i ta ko wan dinima u Jehovah Gadu. Wan gaan bunu wë kai da i dë e!
Kumafa fa i lei a di Bëibel, peipei fuka o miti i u di i kë waka a di pasi aki. Mëni jeti taa an bi tei longi baka di Jesosi dopu, hën „di Akaa u Gadu [di santa jeje, NW] tjëën go a wan gaan sabana dendu, fu di didibi sa ko nëën ko poobëën luku ee a sa mbei a piki ën buka” (Mat. 4:1). Baka te i tei dopu toon wan bakama u Keesitu, i sa dë ku di mëni taa joo kisi tesi (Joh. 15:20). Hii pei tesi sa ko miti i. Kandë famii fii o buta ku i (Mat. 10:36). Kandë wooko kompe ku awoo guwentima seei o ta mbei i fa. Ma mëni hii juu dee soni Jesosi bi taki a Maikusi 10:29, 30, taa: „Ma nöö mi taki da unu taa di sëmbë di o disa hën baaa, ku ën sisa, ku ën mama, ku ën tata, ku ën mii, ku dee pandasi kamian fëën fu di a ko nama ku mi, ee nasö fu di a kë paaja di bunu buka u Gadu, nöö an o lasi e. Biga a o toona feni hii soni wan höndö toon baka: ee sisa, ee baaa, mama, tata, pandasi kamian, ku köndë tuu seei a o feni a di ten u dë aki, ma nöö a o kisi sitaafu tu o. Ma nöö a di ten di ta ko, nöö a o feni di libi u teego.” Fëën mbei tan mbei möiti u tan zuntu u Jehovah, nöö hoi i seei a dee bumbuu maiki fëën.
Te i kë tei dopu, nöö mbei dee gaanwomi u di gemeente sabi. Wanlö hakisi ta ko baka di pisi aki. Dee gaanwomi o luku de makandi ku i sö taa de sa sabi ee i dou dee maaka u tei dopu. I sa bigi luku dee hakisi aki i wanwan ufö. Kandë i sa du ën a di pisiten i buta u öndösuku soni a Bëibel.
Te joo seeka iseei da dee hakisi dë, nöö tei i ten u lesi hii dee tëkisi, nöö pakisei bunu u de tu. A sömëni kamian, joo si taa dee tëkisi an o ta piki hiniwan hakisi gbelingbelin, ma de o heepi fii si fa di piki kai ku di Bëibel. Ee ja dë seiki u di piki u wan hakisi, nöö kandë a bi o bunu fii go öndösuku ën a Bëibel nasö a dee woto buku di di „köni bumbuu futuboi” tja ko a döö (Mat. 24:45). Kandë i bi o kë sikifi wan tu soni a di buku aki nasö a wan pisi pampia. I sa luku dee soni i sikifi a i buku nasö a i pampia te joo piki dee hakisi u dee gaanwomi. Ee wan hakisi taanga da i u fusutan, nöö na fëëë u hakisi di sëmbë di ta lei i soni a Bëibel nasö dee gaanwomi u de heepi i.
Te dee gaanwomi o buta dee hakisi da i, na mëni taa i musu da wan gaan langa kofaliki piki. Wan sati piki kumafa iseei pakisei o tjika kaa. Te joo piki so u dee hakisi, a bi o bunu ee i taki u wan nasö u tu Bëibel tëkisi u lei fa di piki fii ta kai ku di Bëibel.
Ee a dë sö taa ja sabi dee möön fanöudu lei u Bëibel tjika, nöö dee gaanwomi o seeka soni u wan sëmbë heepi i fii sa fusutan dee Bëibel tëkisi möön bunu, nöö bakaten i sa dou dee maaka u tei dopu.