WOTO 27
Un wini u ta feni u di dëdë u Jesosi?
U di di fosu womi ku di fosu mujëë, Adam ku Eva, bi pasa Gadu buka, mbei u ta du zöndu, u ta tja pena ku fuka, söseei u ta dëdë.a Ma di soni dë an kë taki taa saanfa-u-du fuu kaba. Jehovah bi seeka soni u di Womi Mii fëën, Jesosi Keesitu, ko puu u a zöndu ku dëdë basu. Di Bëibel ta lei taa Jesosi bi paka wan lusupaima, u di a bi dëdë. Wan lusupaima da wan paima di i ta paka u mbei wan sëmbë ko fii. Di paima di Jesosi paka bi dë wan dii paima. A bi paka ku di telutelu libi fëën di an bi abi zöndu. (Lesi Mateosi 20:28.) Jesosi bi sa libi u teego a goonliba, ma u di a bi kë fuu feni hii dee soni di Adam ku Eva mbei u lasi, mbei a bi dëdë da u. Jesosi bi lei tu unfa hën ku Jehovah lobi u gaanfa tjika. Di woto aki o heepi i fii möön tei di dëdë di Jesosi dëdë da u u bigi.
1. Un wini u ta feni u di dëdë u Jesosi a di ten aki?
U di u da zöndu libisëmbë, mbei u ta du sömëni soni di Jehovah an ta feni bunu. Ma, ee u ta tjali tuutuu u dee föutu dee u mbei, nöö u hakisi Jehovah faa da u paadon a di në u Jesosi, söseei ee u ta mbei möiti fu wa mbei dee seei föutu dë möön, nöö u ku Gadu sa dë gaan mati (1 Johanisi 2:1). Di Bëibel ta taki taa: „Keesitu seei bi tja sitaafu tee fa de kii ën dë, hii fa an bi du hogi wan daka . . . Nöö dee hogilibi fuu wë a paka di wan pasi dë u nöömö . . . faa sa tja u ko a Gadu”—1 Petuisi 3:18.
2. Un wini woo feni a di ten di ta ko u di Jesosi dëdë da u?
Jehovah bi manda Jesosi faa ko dëdë paka ku di telutelu libi fëën, sö taa hii sëmbë di ta biibi a di Mii fëën liba, an o sa lasi go kaba a sösö, ma de o sa feni di libi u teego (Johanisi 3:16). U wai taa Jesosi dëdë da u. Di dëdë fëën o mbei Jehovah puu hii dee hogi soni dee ta pasa, u di Adam ku Eva pasa hën buka. Di soni aki kë taki taa ee u buta biibi a di lusupaima u Jesosi, nöö woo sa libi u teego a wan paladëisi a goonliba aki!—Jesaaja 65:21-23.
WOTO SONI DI I SA LEI
Woo luku woto soni di o heepi u fuu ko fusutan möön bunu faandi mbei Jesosi dëdë da u, söseei woo luku un wini u ta feni u di dëdë fëën.
3. Di dëdë u Jesosi o puu u a zöndu ku dëdë basu
Pëë di FËLÖN, nöö piki di hakisi aki.
Andi Adam bi lasi di a pasa Gadu buka?
Lesi Loomë 5:12, nöö piki di hakisi aki:
Andi ta pasa ku i u di Adam du zöndu?
Lesi Johanisi 3:16, nöö piki di hakisi aki:
Faandi mbei Jehovah bi manda di Womi Mii fëën ko a goonliba aki?
Adam an bi abi zöndu. Ma u di a pasa Gadu buka, mbei u ko dë a zöndu ku dëdë basu
Jesosi an bi abi zöndu. Ma u di a piki Gadu buka, mbei a puu a zöndu ku dëdë basu, sö taa u sa libi u teego
4. Hii sëmbë sa feni wini u di dëdë u Jesosi
Pëë di FËLÖN, nöö piki di hakisi aki.
Unfa di dëdë u wan kodo sëmbë sa tja wini ko da hii sëmbë?
Lesi 1 Timoteo 2:5, 6, nöö piki di hakisi aki:
Adam, wan womi di an bi abi zöndu, mbei libisëmbë ko abi zöndu, nöö de ta dëdë. Jesosi bi dë wan womi di an abi zöndu tu leti kuma Adam. Ma nöö faandi mbei di dëdë u Jesosi bi dë wan paima di bi fiti u mbei libisëmbë ko fii u zöndu ku dëdë?
5. Di lusupaima da wan kado di Jehovah da i
Dee mati u Jehovah ta si di lusupaima kuma wan kado di a da de. Lesi Galasia 2:20, nöö piki di hakisi aki:
Unfa apösutu Paulosu bi lei taa a ta si di lusupaima kuma wan kado di Gadu dëën?
Di Adam du zöndu, hën a ko pasa taa hën ku dee bakamii fëën tuu ko ta dëdë. Ma Jehovah manda di Womi Mii fëën ko dëdë da u, sö taa iseei sa feni di okasi u libi u teego.
Te i ta lesi dee tëkisi aki, nöö pooba u pakisei unfa Jehovah bi ta fii di a bi si unfa di Womi Mii fëën ta tja sitaafu. Lesi Johanisi 19:1-7, 16-18, nöö piki di hakisi aki:
Unfa i ta si di soni di Jehovah ku Jesosi du da i?
WAN SËMBË SA HAKISI I TAA: „Unfa wan kodo sëmbë sa dëdë da hii sëmbë?”
Andi i bi o piki ën?
ANDI I LEI?
Di dëdë u Jesosi mbei taa Jehovah sa da u paadon u dee zöndu fuu, söseei a sa mbei u feni di libi u teego.
Andi i bi o piki?
Faandi mbei Jesosi dëdë?
Unfa a du ko taa di dëdë u Jesosi bi dë wan paima di bi fiti u mbei libisëmbë ko fii u zöndu ku dëdë?
Un wini i sa feni u di dëdë u Jesosi?
WOTO SONI DI I SA LUKU
Lesi di woto aki fii si faandi mbei de ta kai di dëdë u Jesosi wan lusupaima.
Lesi di woto aki fii si andi u musu du fuu sa ko fii u zöndu ku dëdë.
Jehovah sa da u paadon u dee gaan zöndu dee u du ö?
„Piki tapu aksi fu Bijbel” (A Waktitoren, 1 u sebitaa-liba 2013)
Lesi di woto aki fii si unfa di sabi di wan womi bi ko sabi soni u di dëdë u Jesosi, bi heepi ën faa tooka dee fasi dee a bi abi.
„Ik had totaal geen controle meer over mijn agressie” (Woto a di website fuu)
a Di soni de kai zöndu, an dë di du di wan sëmbë ta du hogi soni nöö. Di siki di u ta siki, di gaandi di u ta gaandi, ku di dëdë di u ta dëdë, ta ko u di u abi di zöndu u Adam ku Eva.