WOTO 28
Lei taa i ta tei di soni di Jehovah ku Jesosi du da i u bigi
Unfa i ta fii te wan mati fii da i wan kado? An dë u taki taa i ta wai seei, nöö i ta kë lei di mati fii taa i tei di kado u bigi. Jehovah ku Jesosi da u di möön dii kado di na wan woto sëmbë bi sa da u. Andi da di kado dë, nöö unfa u sa lei taa u ta tei ën u bigi?
1. Andi da wan fasi fa u sa lei taa u ta tei di soni di Gadu ku Keesitu du da u u bigi?
Di Bëibel ta paamusi u taa „hiniwan sëmbë di ta biibi a . . . [Jesosi]” sa feni di libi u teego (Johanisi 3:16). Unfa u sa du di soni aki? Wë, wa musu taki nöö taa u ta biibi a Jesosi, ma a musu dë u si a dee soni dee u ta du, ku dee soni dee u ta buta taa u kë du (Jakobosi 2:17). Te dee soni dee u ta du, ku dee soni dee u ta taki ta lei taa u abi biibi, nöö u ku Jesosi ku hën Tata Jehovah, o ko dë möön gaan mati.—Lesi Johanisi 14:21.
2. Un apaiti komakandi ta heepi u fuu lei taa u ta tei di soni di Jehovah ku Jesosi du da u u bigi?
A di ndeti ufö Jesosi dëdë, hën a bi piki dee bakama fëën andi da wan woto fasi fa de sa lei taa de ta tei di dëdë di a bi o dëdë da de u bigi. A bi hoi wan apaiti komakandi ku de. Di Bëibel ta kai di apaiti komakandi dë „di Ndeti Njanjan u Masa”, di u sabi kuma di mëni di u ta mëni di dëdë u Keesitu (1 Kolenti 11:20). Jesosi bi seti di komakandi aki, u dee apösutu fëën ku hii dee tuutuu Keesitu sëmbë dee bi o ko baka de, bi sa ta mëni di dëdë di a bi dëdë da u. Fëën mbei Jesosi bi taki taa: „Sö nöö un musu ta du nöömö fuun ta mëni di dëdë di mi o dëdë da unu” (Lukasi 22:19). Te i nango a di komakandi u mëni di dëdë u Jesosi, nöö i ta lei taa i ta tei ën u bigi seei taa Jehovah ku Jesosi lei taa de lobi u gaanfa.
WOTO SONI DI I SA LEI
Woo luku andi da wantu woto fasi fa u sa lei taa u ta tei di lobi di Jehovah ku Jesosi lobi u gaanfa seei u bigi. Söseei woo luku faandi mbei a dë fanöudu fuu ta mëni di dëdë u Keesitu.
3. Andi u sa du fuu lei taa u ta tei ën u bigi taa Jesosi dëdë da u?
Pakisei taa i ta dëdë a wata, hën wan sëmbë ko puu i. I bi o fëëkëtë di soni di di sëmbë dë du da i ö? Naa i bi o suku fasi u lei ën taa i ta tei di soni di a du da i u bigi?
U musu da Jehovah tangi u di u dë a libi. Lesi 1 Johanisi 4:8-10, nöö piki dee hakisi aki:
Faandi mbei di dëdë di Jesosi dëdë da u dë wan apaiti soni sö?
Unfa i ta si di soni di Jehovah ku Jesosi du da i?
Unfa u sa lei taa u ta tei di soni Jehovah ku Jesosi du da u u bigi? Lesi 2 Kolenti 5:15 ku 1 Johanisi 4:11; 5:3. Baka te i lesi hiniwan u dee tëkisi, nöö piki di hakisi aki:
Te i pakisei hiniwan u dee tëkisi dee u lesi djunsu dë, nöö andi u sa du u lei taa u ta tei di soni di Jesosi ku Jehovah du da u u bigi?
4. Djeesi Jesosi
Wan woto fasi fa u sa lei taa u ta tei di soni di Jesosi du da u u bigi, hën da te u ta djeesi ën. Lesi 1 Petuisi 2:21, nöö piki di hakisi aki:
Andi da wantu fasi fa i sa djeesi Jesosi?
Jesosi bi lobi di Wöutu u Gadu, a bi ta paaja di bunu buka, söseei a bi ta heepi woto sëmbë
5. Mëni di dëdë u Jesosi
Ee i kë sabi andi bi pasa di fosu pasi di de bi hoi di Ndeti Njanjan u Masa, nöö lesi Lukasi 22:14, 19, 20. Baka di dë, nöö piki dee hakisi aki:
Andi ku andi de bi du a di Ndeti Njanjan u Masa?
Andi di bëëë ku di win kë taki?—Luku vers 19 ku 20.
Jesosi bi kë taa dee bakama fëën bi musu ta hoi di Ndeti Njanjan u Masa wan pasi a wan jaa te de bi o ta mëni di dëdë fëën. Fëën mbei dee Jehovah Kotoigi ta ko makandi wan pasi a wan jaa u mëni di dëdë u Jesosi kumafa a bi piki dee bakama fëën. Ee i kë ko sabi möön soni u di fanöudu komakandi aki, nöö pëë di FËLÖN. Baka di dë, nöö piki di hakisi aki.
Kumafa i si a di fëlön, nöö andi ta pasa te u ta mëni di dëdë u Jesosi?
Di bëëë ku di win kë taki wan soni. Di bëëë kë taki di telutelu sinkii u Jesosi di an bi abi zöndu, di a bi da fuu hedi. Di win kë taki di buuu fëën
SO SËMBË TA TAKI TAA: „Di wan kodo soni di i musu du fii sa feni tjubi, hën da biibi i musu biibi a Jesosi.”
Unfa i sa wooko ku Johanisi 3:16 ku Jakobosi 2:17 u lei wan sëmbë taa biibi a Jesosi wanwan an tjika?
ANDI I LEI?
U ta lei taa u ta tei di soni di Jesosi du da u u bigi te u ta buta biibi nëën, söseei te u nango a di komakandi te de ta mëni di dëdë fëën.
Andi i bi o piki?
Andi a kë taki u biibi a Jesosi?
Andi i bi o kë du u lei taa i ta tei di soni di Jehovah ku Jesosi du da i u bigi?
Faandi mbei a dë fanöudu seei u go a di komakandi ka u ta mëni di dëdë u Jesosi?
WOTO SONI DI I SA LUKU
Andi di dëdë di Keesitu dëdë da u ta da u taanga u du?
Lesi di woto aki fii ko sabi andi da biibi, söseei andi u sa du fuu ko abi biibi.
„Sori bribi na ini den pramisi fu Yehovah” (A Waktitoren, u tinimu-liba 2016)
Lesi di woto aki fii si unfa wan mujëë libi bi tooka di a ko fusutan andi di dëdë di Jesosi dëdë dëën kë taki.
„Bijbel e kenki sma libi” (A Waktitoren, 1 u tanvuuwata-liba 2011)
Lesi di woto aki fii si faandi mbei wantu sëmbë nöö ta njan di bëëë, ta bebe di win.