Mi bi ko ta du di sëndëlengiwooko, hii fa mi bi dë wan sëmbë di bi ta sen gaanfa seei

De bi pai mi a di jaa 1951 a wan foto de kai Vienna, a Oostenrijk, nöö dee famii u mi bi dë a Lomusu keiki. Hii fa sen bi ta kisi mi, tökuseei mi bi ta biibi taa wan Gadu dë, nöö mi bi lo’ u begi. Di mi bi abi nëigi jaa, hën mi tata bigi lei soni u Bëibel ku dee Jehovah Kotoigi. Kölö sö baka di dë, hën mi mama seei bigi lei soni u Bëibel tu.

Baka di dë, hën u bi nango a di kemeente de kai Döbling a Vienna. U bi dë wan famii di bi ta du sömëni soni makandi. U bi ta lesi Bëibel, nöö u ta öndösuku soni fëën, u bi nango a dee komakandi, söseei u bi ta heepi a dee gaan komakandi. A dee jaa dë mi tata bi heepi mi u ko lobi Jehovah gaanfa seei. Mi tata bi lo’ u begi u mi ku mi sisa bi sa bigi du di pioniliwooko. Ma na di soni dë mim bi kë du.

MI BIGI DU DI HII-TEN DINIWOOKO

Mi dopu a di jaa 1965. A di pisiten dë mi bi abi 14 jaa. A bi ta taanga da mi u mi peleiki da sëmbë di ma bi sabi. Boiti di dë, mi bi lo’ u fii kuma dee woto njönkuwan bi bumbuu möön mi, nöö mi bi ta kë u de lobi mi. Fëën mbei na longi baka di mi dopu, hën mi bi bigi ta hulu ku sëmbë di an bi ta dini Jehovah. Hii fa a bi ta suti da mi te mi dë makandi ku de, tökuseei háti u mi bi ta fon mi, u di mi bi ta möön nama ku sëmbë di an bi dë Kotoigi. Ma ma bi abi degihati u tooka. Andi bi heepi mi?

A di ten dë wan mujëë mii de kai Dorothée, di bi abi 16 jaa bi ko a di kemeente te ka mi bi dë. Di fasi fa a bi ta du di peleikiwooko fajafaja bi ta bigi da mi seei. Mi bi gaanwan fëën pikisö, ma ma bi ta peleiki hiniwan juu. Mi bi ta pakisei taa: ’Dee gaansëmbë u mi da Kotoigi, ma Dorothée an bi abi sëmbë a di tuutuu lei. A bi ta libi ku hën mama di bi dë ku suwaki, ma tökuseei a bi ta du di peleikiwooko hii juu!’ Di fasi fa a bi ta du soni bi heepi mi u mi du möön soni da Jehovah. Baka di dë, hën mi ku Dorothée bigi ta du di pioniliwooko makandi. U bi bigi du di heepi pioniliwooko, hën bakaten, hën u bi ta du di kowoonu pioniliwooko makandi. U di di peleikiwooko bi ta suti da Dorothée sö te, mbei a bi ko ta suti da mi tu. A bi heepi mi u mi bigi lei sëmbë soni u Bëibel. Baka wan pisiten, hën an bi ta taanga da mi sö möön u mi fan ku sëmbë a de pisi, a sitaati, nasö a woto kamian.

Di fosu jaa di mi bigi du di kowoonu pioniliwooko, hën wan baaa u Oostenrijk de kai Heinz bi ko a di kemeente ka mi bi dë. A bi ko sabi di tuutuu lei di a bi go a Kanada go luku wan baaa fëën di bi dë wan kotoigi. De bi manda Heinz ko a di kemeente u Vienna faa bi ko du di apaiti pioniliwooko. Mi bi lobi ën sensi di fosu pasi di mi bi si ën. Ma a bi kë du di sëndëlengiwooko, nöö mim ma bi kë du di wooko dë. Fëën mbei ma bi mbei a sabi taa mi bi lobi ën. Bakaten hën mi ku Heinz ko lei sabi useei hën u toou, hën u bigi du di pioniliwooko makandi a Oostenrijk.

MI BI KO KË DU DI SËNDËLENGIWOOKO

Heinz bi lo’ u konda da mi taa a bi kë du di sëndëlengiwooko. An bi ta duwengi mi u du di wooko aki, ma a bi ta hakisi mi soni di bi sa da mi taanga u du ën. A bi ta hakisi mi taa: „Mda wa abi miii, nöö wa bi o sa du möön soni a di dini di u ta dini Jehovah u? Mi bi ta sen gaanfa seei, nöö fëën mbei mi bi ta fëëë u du di sëndëlengiwooko. Tuu taa mi bi ta du di pioniliwooko hii fa mi bi ta sen gaanfa, ma mi bi ta si kuma di sëndëlengiwooko bi o taanga da mi poi. Ma tökuseei Heinz bi lo’ u taki soni fëën. A bi ta da mi taanga u mi ta möön buta pakisei a wotowan ka u mi bi ta buta pakisei a di fa mi bi ta fii. Di soni aki bi heepi mi seei.

Pikipiki mi bi bigi ta fii u du di sëndëlengiwooko, nöö hën u bi fuu di pampia u go a di Giliati-siköö. Ma di bëikantoo dinai bi piki mi taa be mi mbei möiti u ko ta fan Ingisitöngö möön bunu. Baka dii jaa di mi bi lei u ko ta fan Ingisitöngö möön bunu, hën de manda u go a di foto Salzburg, a Oostenrijk, a wan kemeente ka ta fan Serbo-Croatiatöngö. Di soni aki bi foondo u seei. U bi peleiki a di pisiwata dë seibi jaa longi, nöö a dee seibi jaa dë dendu u bi du di keling-wooko wan jaa longi. Di Serbo-Croatiatöngö bi taanga da u seei, ma u bi abi sömëni sëmbë di u bi ta lei soni u Bëibel.

A di jaa 1979, hën de bi hakisi u fuu go ku „fakansi a Bulgalia. De bi tapa di wooko fuu a di köndë dë. Wa bi peleiki da na wan sëmbë di u go a fakansi. Ma u bi tja dee buku fuu di de bi sikifi a pikipiki pampia tjubitjubi, go da dee feifi sisa dee bi ta libi a Sofia, di mama foto u Bulgalia. Mi bi ta fëëë te na soni ma Jehovah bi heepi mi. Hii fa de bi sa kisi dee sisa aki buta a dunguwosu, tökuseei de bi abi degihati, nöö de bi ta dë waiwai. Di soni aki bi da mi taanga u mi mbei hii möiti u du hiniwan soni di di ölganisaasi u Jehovah bi ta hakisi mi u mi du.

Baka wan pisiten, hën u toona fuu pampia u go a di Giliati-siköö. Di pasi aki hën de bi kai u fuu go a di siköö. U bi mëni taa na Amëëkanköndë u bi go a di siköö, söseei u bi mëni taa a Ingisitöngö u bi o lei soni a di siköö. Ma a ëlufumu-liba u di jaa 1981, hën di ölganisaasi bigi hoi di Giliati-siköö a di Bëikantoo u Wiesbaden di dë na Alumaköndë. U bi ta lei soni a di siköö na Alumatöngö, nöö a bi möön kösökösö da mi u mi fusutan. Naasë de bi o manda u go?

U BI GO DU DI PELEIKIWOOKO A WAN KÖNDË KA FETI BI TA FETI

De bi manda u go a Kenia, hën di bëikantoo u Kenia hakisi u ee u bi o kë go wooko a di köndë de kai Uganda. Teni jaa a fesi wan sodati fesima de kai Idi Amin bi ko feti tei di köndë. A dee jaa dee a bi ta tii, nöö a bi kii dusudusu sëmbë, söseei milionmilion sëmbë bi ta tja fuka. A di jaa 1979, hën dee felantima u Idi Amin toona tei di köndë ko u de. I sa fusutan faandi mbei mi bi ta fëëë u go a di köndë dë. Ma di Giliati-siköö bi lei u fuu ta futoou Jehovah. Fëën mbei u bi piki aai.

Di libi a Uganda bi hogi gaanfa seei. Dee tiima an bi sa seeka wata soni, faja soni ku dee woto soni dee sëmbë bi abi fanöudu. Dee tëlëfön seei an bi ta wooko. Sëmbë bi ta suti wotowan ta kii, nöö de bi ta fufuu. Möönmöön a ndeti. Fëën mbei te kamian bi ko dungu, nöö hii sëmbë bi ta dë a wosu dendu, nöö de bi ta begi u sëmbë an ko fufuu de nasö ko kii de. Hii fa di libi bi ta taanga, tökuseei dee baaa ku dee sisa bi ta dini Jehovah ku piizii go dou!

A di jaa 1982, hën mi ku Heinz go dou a di mama foto u Uganda de kai Kampala. U bi dë feifi liba longi a wan baaa de kai Sam Waiswa ku hën mujëë Christina pisi, nöö de bi abi feifi mii, söseei fö sëmbë u de famii bi ta libi ku de tu. Möön gaanfa baaa ku sisa Waiswa ku dee famii u de bi ta njan wan pasi nöö a wan daka dendu. Ma tökuseei de bi ta dë kabakaba u paati di pikisö njanjan di de bi abi ku u. U bi lei sömëni soni a de di bi heepi u a di sëndëlengi wooko seei. De bi lei u fuu wasi ku pikisö wata, nöö u bi ta toona tei di seei wata dë u sawa toilet. A di jaa 1983, hën mi ku Heinz foloisi go a wan wosu a wan pisiwata u Kampala ka an bi hogi sö.

U bi lobi di peleikiwooko seei. Mi ta mëni jeti taa a wan liba dendu u bi paati möön leki 4000 buku. Ma di möön bunu pisi da di fasi fa dee sëmbë a di peleikiwooko bi dë. De bi ta lesipeki Gadu, nöö de bi ta kë sabi soni u di Bëibel. Mi ku Heinz bi lo’ u abi sömëni sëmbë di u bi ta lei soni u Bëibel. Möön gaanfa hiniwan fuu bi ta abi 10 te go miti 15 sëmbë u lei soni u Bëibel. U bi ta lei sömëni soni a de. Hii fa de bi ta waka ku futu go a dee komakandi hiniwan wiki, tökuseei de an bi ta kuutu ma de bi ta dë waiwai.

A di jaa 1985 ku 1986, nöö tu feti bi toona booko a Uganda. U bi lo’ u si pikipiki mii ku gaangaan goni a maun. De bi buta de kuma sodati a dee pasi u ta luku ambë bi sa pasa. A di ten dë u bi ta hakisi Jehovah faa heepi u fuu du soni ku köni, söseei fuu wa ta fëëë te u bi ta du di peleikiwooko. Nöö Jehovah bi piki dee begi fuu. Möön gaanfa te u bi miti wan sëmbë di bi kë lei soni u Bëibel, nöö wa bi ta fëëë sö möön.

U bi lo’ u peleiki da woto köndë sëmbë tu. U bi miti wan womi de kai Murat Ibatullin ku hën mujëë Dilbar, hën u lei de soni u Bëibel. De bi kumutu a Tatarstan wan kamian di dë a Losiaköndë. Murat bi dë wan data. Hën ku hën mujëë tuu dopu nöö de ta hoi deseei a Jehovah go dou. Bakaten hën mi bi miti Tatjana Vileyska, wan mujëë di bi kumutu a di köndë Ukalaini. Di mujëë aki bi ta pakisei u kii hënseei. Baka di Tatjana dopu hën a toona go a Ukalaini, nöö bakaten a bi ta heepi u puu dee buku fuu ko a Ukalainitöngö.a

U GO DU SI SËNDËLENGIWOOKO A WAN WOTO KÖNDË

A di jaa 1991 di mi ku Heinz go ku fakansi a Oostenrijk, hën di bëikantoo u Oostenrijk manda wan biifi da u taa u feni wan njunjun wooko u du, a di köndë Bulgalia. De bi tapa di peleikiwooko fuu a wantu u dee köndë u Europa, sömëni jaa longi. Ma di soni aki bi ko tooka. U bi sa peleiki fiifii a Bulgalia. Kumafa mi bi taki kaa, nöö mi ku Heinz bi tja dee buku fuu tjubitjubi ko a di köndë dë di di wooko fuu bi tapa. Ma nöunöu de bi manda u go ala u go peleiki.

Dee baaa bi piki u taa an dë fuu toona go a Uganda möön. Fëën mbei wa toona go a di wosu fuu go tei lai, nasö u go piki dee mati fuu taa u nango. U go wantewante dë a di Bëtëli u Alumanköndë, hën u tei wagi go a Bulgalia. De bi manda u go a wan kulupu u 20 peleikima a Sofia.

Sömëni soni bi miti u a Bulgalia. Di fosu soni, hën da wa bi sabi di töngö. Boiti di dë, tu buku nöö u bi abi a di Bulgaliatöngö. Dee buku aki da De waarheid die tot eeuwig leven leidt ku Dee woto u di Bëibel. Nöö a bi ta taanga da u seei fuu lei sëmbë soni u Bëibel. Ma hii fa soni bi dë sö, tökuseei di piki kulupu Kotoigi aki bi dë fajafaja, nöö de bi nango a fesi seei. Dee sëmbë u di Orthodox keiki an bi lobi fa u bi ta peleiki, fëën mbei de bi bigi ta du ku u.

A di jaa 1994, hën lanti puu dee Jehovah Kotoigi a buku taa de an dë wan keiki möön. Sömëni u dee sëmbë a Bulgalia bi ta si u kuma wan biibi di dë u fëëë. De bi söötö wantu u dee baaa fuu. Nöö de bi ta konda sömëni mindimindi soni fuu a njunsu taa dee Jehovah Kotoigi ta kii miii, söseei de ta da dee baaa ku dee sisa u de taanga u de kii deseei. A bi ta taanga da mi ku Heinz u du di peleikiwooko. Te u bi ta peleiki, nöö sëmbë bi ta hogi da u, de bi ta kai siköutu da u, söseei de bi ta hiti soni naki u. A bi ta taanga da u fuu tja buku ko a di köndë, söseei a bi ta taanga da u fuu feni kamian juu, u hoi komakandi. Dee siköutu bi ko tapa wan u dee könklësi fuu seei. Mi ku Heinz an bi guwenti di lö buuse aki. A bi tooka gaanfa seei ku dee sëmbë u Uganda. De de bi ta dë kabakaba u lei soni u Bëibel. Andi bi heepi u fuu dë waiwai go dou?

Di dë di u bi ta dë makandi ku dee baaa ku dee sisa fuu bi heepi u seei. De bi lobi di tuutuu lei, nöö de bi ta wai taa u bi dë makandi ku de. U bi ta heepi useei. Mi ku Heinz bi lei taa u sa du hiniwan wooko ku piizii ee u ta buta pakisei a wotowan, möön fa u ta buta pakisei a useei.

Baka wantu jaa, nöö an bi ta taanga da u sö möön fuu peleiki. A di jaa 1998, hën lanti bi toona buta a buku taa dee Jehovah Kotoigi da wan biibi, söseei sömëni u dee buku fuu bi dë u feni a Bulgaliatöngö. A di jaa 2004, hën wan njunjun bëikantoo bi jabi ala. Nöunöu 57 kemeente dë a Bulgalia, ku 2953 peleikima. A di diniwooko jaa di pasa, nöö 6475 sëmbë bi dë a di daka di u bi mëni di dëdë u Jesosi. A wan pisiten nöö feifi sisa nöö bi dë a Sofia, ma nöunöu u abi nëigi kemeente! U si tuutuu fa ’wan piki kulupu toon . . . dusudusu sëmbë’.​—Jes. 60:22.

U BI ABI FUU BOOKO HEDI APAITI

Mi bi ta dë ku suwaki. Sömëni pasi data bi ta si taa wan taku siki bi ta göö a mi sinkii dendu. Wan bi göö te a mi töönzön. De bi wooko ku wan kofaliki deesi u mbei di taku siki aki ko möön piki, söseei mi bi go a di köndë de kai India, hën wan data opalasi mi 12 juu longi, hën a puu gaansë u di taku siki aki a mi hedi dendu. Baka di opalasi, hën u fika a di Bëtëli u India, sö taa mi bi sa ko bëtë. Baka di dë, hën u toona go a Bulgalia.

A di ten dë, hën wan sootu taku pei suwaki bi ko a Heinz, di de ta kai Huntington. Di siki aki bi ta mbei taa a bi ta taanga dëën u waka, u fan, söseei u ta buli sinkii kumafa a bi kë. Di siki aki bi ta ko möön hogi, nöö mi hën bi musu ta du hii soni dëën. So juu mi bi ta wei gaanfa seei, nöö mi bi ta booko mi hedi taa ma bi o sa ta heepi ën u nöömö. Ma wan njönku baaa de kai Bobi bi ta ko tei ën u de go a di peleikiwooko hii juu. Bobi an bi ta sen taa Heinz an bi ta fan bunu, nasö taa an bi sa ta buli ën maun ku ën futu kumafa a bi kë. Bobi bi ta sai dë hii juu u heepi mi ku Heinz te ma bi sa heepi ën. Hii fa mi ku Heinz an bi kë pai miii a di goonliba aki, tökuseei u ta fii taa Jehovah da u Bobi kuma miii fuu!​—Maik. 10:29, 30.

Boiti di dë, Heinz bi abi kankël tu. A tjali taa mi manu lasi libi a di jaa 2015. Mi ta hangi ën seei. Hën bi da di sëmbë di bi ta heepi mi hii juu u ma ta booko mi hedi poi. A ta taanga da mi seei u biibi taa an dë aki möön. Ma a mi pakisei a dë a libi jeti! (Luk. 20:38) Mi lo’ u pakisei dee soni dee a bi lo’ u piki mi, ku dee köni dee a bi lo’ u da mi, nöö ku de mi ta pasa dee daka u mi. Mi dë ku tangi a hati seei, da dee sömëni jaa dee u dini Jehovah makandi.

MI TA DA JEHOVAH TANGI U DI FASI FA A BI HEEPI MI

Jehovah bi heepi mi u hoi dou a hii dee fuka dee bi miti mi. A bi heepi mi u mi lobi sëmbë sö taa mi bi sa du di sëndëlengiwooko, hii fa mi bi ta sen (2 Tim. 1:7). Jehovah bi heepi mi ku mi piki sisa u du di hii-ten diniwooko. Nöunöu, hën ku ën manu nango a tookatooka kamian a Europa u go luku dee kemeente ka sëmbë ta fan Serbiatöngö. Jehovah piki dee begi u mi tata di a bi ta begi di u bi dë miii!

Di lei di mi ta lei mi seei soni u Bëibel, ta da mi kötöhati. Te soni ta taanga da mi, nöö mi ta begi „möön taanga”, leti kuma Jesosi (Luk. 22:44). Wan fasi fa Jehovah bi piki dee begi u mi, hën da di fasi fa dee mati u mi a di kemeente u Nadezhda, a Sofia bi ta lei taa de lobi mi. De mi bi ta kai mi u dë makandi ku de, söseei de lo’ u du soni u lei taa de lobi mi. Hii dee soni aki ta mbei taa mi ta dë waiwai.

Mi lo’ u kai pakisei a di fa dee sëmbë fuu o weki ko a libi baka. Mi ta pakisei fa mi ku dee sëmbë u mi dë makandi a di paladëisi. Mi ta si fa dee gaansëmbë u mi dë njönkunjönku kumafa de bi dë di de bi toou, nöö de taanpu a u dööbuka. Mi ta si fa mi sisa ta boi soni. Mi ta si Heinz taanputaanpu a di hasi fëën bandja. Te mi ta pakisei fa soni o dë a di ten di ta ko, nöö mi ta fii bunu seei. A ta heepi mi u hoi dou, söseei u dë ku tangi a hati.

Te mi toona mëni baka fa libi u mi bi dë, ku te mi ta pakisei fa soni o dë a di ten di ta ko, nöö mi ta piki ku di soni di Dafiti bi taki a Psalöm 27:13, 14. A bi taki taa: „Naasë mi bi o dë ee ma bi biibi taa mi bi o si di bunu hati fii a di köndë u dee sëmbë dee ta libi? Futoou Jehovah, abi degihati, nöö na fëëë. Awa futoou Jehovah.”