38 Baka dati, Yehovah en sten ben de fu yere na ini wan tranga winti.+ A taigi Yob:
2 „Suma na a sma drape di e drai den wortu fu mi,
Fu di a e taki sani sondro fu sabi?+
3 Tai yu mindri leki wan tranga man,
Èn meki mi poti aksi gi yu, dan yu piki mi.+
4 Pe yu ben de di mi ben e meki grontapu?+
Taigi mi, efu yu sabi dati.
5 Efu yu sabi, dan taigi mi suma bosroiti o bigi grontapu musu de.
Suma hari wan lin fu marki en?
6 Na tapu sortu sani den pilari+ fu grontapu e tanapu?
Suma meki den ukuston fu en,
7 Di ala den mamanten stari+ bari fu prisiri,
Èn di den manpikin fu Gado+ prèise en nanga wan tranga sten?
8 Suma tapu a watra fu se nanga doro+
Di a bigin pusu kon, neleki fa wan pikin na ini en mama bere e pusu kon na doro?
9 Mi poti den wolku leki wan krosi gi en
Èn mi domru en na ini dungru.
10 Mi poti mi wèt gi en.
Mi tapu en nanga stanga èn nanga doro.+
11 Dan mi taigi en: ’Te so fara yu kan kon, èn no moro fara.+
Te dyaso yu bigi skwala kan kon.’+
12 Sensi yu de na libi, yu gi a mamanten komando?+
Na yu meki musudei sabi en presi?
13 Na yu taigi a leti fu mamanten fu go te na den moro farawe pisi fu grontapu
Èn yagi den ogri sma?+
14 Grontapu e kenki neleki te wan sma e naki wan stampu na tapu klèidoti.+
A gersi leki a weri wan moi nyun krosi.
15 Dan a leti fu den ogri sma no de moro.+
Den anu fu den di opo go na loktu, o broko.+
16 Yu go na a presi pe a se e bigin?
Yu waka na ini a se+ fu ondrosuku san de na ini?+
17 Yu si den portu fu dede,+
Èn yu man si den portu fu den dungru presi?+
18 Yu ondrosuku o bigi grontapu de?+
Piki mi, efu yu sabi ala den sani disi.
19 Taigi mi now: Yu sabi a pasi di e go na a tanpresi fu leti?+
Yu sabi pe dungru e tan,
20 So taki yu ben sa man tyari en go drape?
Yu sabi a pasi di e go na en oso?
21 Yu ben gebore na a ten dati, so taki yu ben sa man sabi ala den sani disi?+
Na so langa yu e libi kaba?
22 Yu go na ini den maksin pe snew de?+
Yu si pe den maksin de fu den pisipisi ijs di e fadon komoto na hemel?+
23 Mi o hori den drape teleki a ten fu banawtu doro,
Èn teleki a dei fu feti doro.+
24 Fu sortu presi a leti e komoto te a e skèin go na ala sei?
Fu sortu presi a winti fu owstusei+ e komoto te a e wai na grontapu?
25 Suma opo wan pasi gi fruduwatra
Èn gi sibibusi nanga dondru?+
26 Suma e meki alen fadon na den presi pe sma no e tan+
Èn na den sabana pe libisma no de?
27 Na so den drei sabana nanga den presi pe nowan sani ben gro, e kon bun baka
Èn grasi e bigin gro baka.+
28 Alen abi wan papa?+
Suma na a papa fu dow?+
29 Na suma bere ijs komoto?
A finifini ijs+ di e saka kon fu hemel abi wan mama?
30 A watra e kibri ensrefi, leki a de na ondro wan ston.
Tapusei fu a watra e kon tranga.+
31 Yu kan tai den titei di e hori a starigrupu Kima?
Yu kan lusu den titei fu a starigrupu Kesil?+
32 Yu kan meki a starigrupu Masarot kon de fu si na a yoisti ten?
Yu man tiri a starigrupu As makandra nanga den pikin fu en?
33 Yu sabi den wèt fu hemel+
Èn yu kan gebroiki den fu tiri grontapu?
34 Yu man bari gi den wolku
Fu meki furu watra fadon na yu tapu?+
35 Yu kan seni den faya di e koti na hemel fu du wan sani gi yu?
Den o man taigi yu: ’Dya wi de!’?
36 Suma gi den wolku koni,+
Èn suma gi den sani na hemel frustan?+
37 Suma abi a koni fu teri den wolku?
Suma kan kanti a watra na ini den watrakan fu hemel+
38 So taki a finifini doti tron tokotoko
Èn den pisipisi doti na grontapu e plak na makandra?
39 Yu kan onti meti gi wan lew,
Èn yu kan tapu a bigi angri fu den yongu lew+
40 Te den e didon e luru na wan kibripresi,+
Noso te den e kibri na wan presi fu grabu wan meti?
41 Suma e gi den blaka fowru nyanyan,+
Te den pikin fu den e bari suku yepi na Gado,
Èn te den e waka lontu fu di den no abi noti fu nyan?