Psalm

140 Yehovah, frulusu mi puru na a anu fu den ogri sma.+

Kibri mi gi den sma di e du ogri-ati sani,+

 2 Den wan di e luku fa den kan du mi ogri.+

Heri dei den e suku fu kon feti nanga mi.+

 3 Den srapu den tongo, neleki a di fu wan sneki.+

A vergif fu wan takru sneki de na tapu den mofobuba.+ Sela.

 4 Yehovah, kibri mi, so taki den ogri sma no man du mi noti.+

Kibri mi tu gi den sma di e du ogri-ati sani,+

Iya, gi den sma di e luku san den kan du fu meki mi fadon.+

 5 Den heimemre sma seti wan trapu gi mi.+

Den poti titei leki wan nèt na tapu mi pasi.+

Na trapu den seti gi mi.+ Sela.

 6 Mi taigi Yehovah: „Yu na mi Gado.+

Yehovah, mi e begi yu, poti yesi arki den fayafaya begi fu mi.”+

 7 Ke Yehovah di de a Moro Hei Masra,+ yu na a wan di e gi mi krakti èn di e frulusu mi.+

Di feti ben de, yu sorgu taki ogri no miti mi.+

 8 Yehovah, mi e begi yu, no gi den ogri sma san den wani.+

No meki den kisi okasi fu du den ogri di den wani du, so taki den no kisi bigifasi.+ Sela.

 9 Meki den ogri di den sma na mi lontu taki nanga den mofo,+

Saka kon na tapu den eigi ede.+

10 Meki krofaya di e bron, fadon na den tapu.+

Meki den fadon go na ini wan faya+ noso na ini watra-olo, so taki den no man komoto na ini moro.+

11 No meki a sma di e dyaf, tan libi na grontapu.+

Ibri tron baka ogri musu miti den sma di lobi du ogri-ati sani.+

12 Mi sabi heri bun taki Yehovah+

O koti krutu gi den mofinawan. Na wan reti fasi a o koti krutu gi den pôtiwan.+

13 Den reti-ati sma o prèise yu nen.+

Den krin-ati sma o de na yu fesi doronomo.+