Yesaya
17 Disi na wan krutuboskopu gi Damaskus:+ „Luku! Damaskus no de wan foto moro. A tron wan brokopresi èn wan ipi broko ston.+ 2 Sma no e tan moro na den foto fu Arower.+ Den tron presi pe meti e nyan grasi. Den e tan drape èn nowan sma e meki den frede.+ 3 Nowan foto di abi bigi skotu de moro na ini Efrayim+ èn a kownukondre no de moro na Damaskus.+ A glori fu den sma di ben tan abra na Siria o lasi gowe neleki a glori fu den Israelsma”, na so Yehovah di e tiri den legre taki.+
4 „Na a ten dati Yakob no o abi furu glori moro.+ A fatu skin fu en o kon mangri.+ 5 A o tron neleki a pikinso nyanyan di tan abra baka te sma kaba koti a nyanyan+ na den gron fu Refayim-lagipresi.+ 6 A o de neleki den olèif di tan abra baka te sma seki olèif puru na den bon. Na soso tu noso dri lepi olèif o tan abra nomo na tapusei fu a bon. Soso fo noso feifi o de na den taki di ben abi furu froktu”, na so Yehovah, a Gado fu Israel, taki.+
7 Na a ten dati sma o luku go na loktu na a Mekiman fu den. Iya, den o luku go na a Santawan fu Israel.+ 8 Den no o luku go na den altari+ di den ben meki.+ Den no o luku go na den tra sani di den meki, awinsi na santa pilari noso altari fu bron switismeri+ gi tra gado. 9 Na a ten dati den tranga foto fu den o de leki wan taki di sma libi fu gro fa a wani. Na fu den Israelsma ede, sma o gowe libi den foto èn den o tron busibusi presi. Nowan sma o tan drape moro.+ 10 Unu frigiti+ a Gado di frulusu unu.+ Unu no prakseri a Stonbergi,+ a fortresi fu unu. Fu dati ede unu prani bigi gron èn unu prani pransun fu freimdesma na tapu. 11 Kande unu poti wan bun skotu lontu den gron fu unu na deiten. Kande unu wroko a gron, so taki den sani di un prani bigin gro na mamanten. Ma toku unu no o koti nyanyan na den gron te unu siki hebi èn unu abi pen doronomo.+
12 Helu fu den furu pipel di e meki dyugudyugu èn di e rigeri leki wan krasi se! Helu fu den pipel di e meki babari neleki a watra fu wan bigi sula!+ 13 Iya, den pipel+ o meki babari neleki a watra fu wan bigi sula. Gado o bari den,+ dan den o lowe gowe bun fara. A o yagi den gowe neleki fa winti e wai aleisibuba na den bergi. Den o de leki makabusi na ini wan draiwinti.+ 14 Na mofoneti ala sortu ogri o miti den wantronso. Fosi mamanten doro, nowan fu den o de moro.+ Na disi o pasa nanga den sma di e kon teki den sani fu wi na wan ogri-ati fasi. Iya, dati na a pai fu den ogri-ati sma di kon fufuru den sani fu wi.+