Yesaya

18 Helu fu a kondre di de na ini a birti fu den liba fu Etiopia+ pe meti soleki sprenka de! 2 A kondre e seni boskopuman+ na tapu papirus-boto go na tapu a se fu taigi sma na ini a heri kondre: „Un boskopuman, go esi-esi na wan pipel di e tan na wan kondre di liba wasi gowe.+ Den sma fu a kondre dati langa, den abi brenki skin èn na ala sei sma e frede den. Den man du furu sani fu di den tranga èn den e teki furu tra kondre abra.”

3 Ala un sma di e libi na ini a kondre+ èn ala un sma di e libi na grontapu, unu o si wan sani di de leki wan marki di tanapu leti-opo na den bergi,+ èn unu o yere wan babari leki a babari fu wan tutu.+ 4 Bika Yehovah taigi mi: „Mi o rostu èn mi o luku mi presi.+ A o de leki te a son e skèin faya na deiten+ èn leki dow di e saka kon na mamanten te a faya na kotiten.+ 5 Te den bon e kisi bromki èn te den bromki e tron lepi droifi, sobun fosi a kotiten doro, wan sma musu teki wan nefi èn koti den taki nanga ala sani di de na den taki, puru na den bon.+ 6 Den alamala o tron nyanyan gi den tingifowru na den bergi èn gi den busimeti na ini a kondre.+ Na dati den fowru disi o nyan na a waran ten fu a yari èn na dati den busimeti na ini a kondre o nyan na a kotiten.+

7 Na a ten dati wan pipel o tyari wan kado gi Yehovah di e tiri den legre.+ Den o tyari en go na Sion-bergi,+ a presi pe sma e kari a nen fu Yehovah di e tiri den legre. A pipel dati e tan na wan kondre di liba wasi gowe. Den langa, den abi brenki skin+ èn na ala sei sma e frede den. Den man du furu sani fu di den tranga èn den e teki furu tra kondre abra.”