Yeremia
21 Yeremia kisi wan boskopu+ fu Yehovah di Kownu Sedekia+ seni Pasyur,+ a manpikin fu Malkia, èn Sefanya,+ a manpikin fu Priester Maseya, fu aksi en: 2 „Grantangi, aksi Yehovah san wi musu du,+ bika Kownu Nebukadresar fu Babilon kon feti nanga wi.+ Kande Yehovah kan du wan kefalek sani fu yepi wi, so taki a kownu kan hari gowe.”+
3 Ne Yeremia taigi den: „Disi na san un musu taigi Sedekia: 4 ’Yehovah, a Gado fu Israel, taki: „Mi o sorgu taki unu no o man du noti nanga den fetisani di unu o gebroiki fu feti nanga a kownu fu Babilon.+ Unu no o man feti nanga den Kaldeyasma+ di de lontu a heri skotu na dorosei fu a foto. Mi o meki den kon na ini a foto disi.+ 5 Misrefi o feti nanga unu.+ Mi o langa mi anu fu naki unu nanga ala mi krakti èn nanga atibron. Iya, nanga bigi atibron mi o kon feti nanga unu.+ 6 Mi o naki ala sma di e tan na ini a foto disi. Libisma nanga meti o dede, fu di wan takru siki o kiri den.”’+
7 ’Yehovah taki: „Te a takru siki, feti-owru, nanga angri kiri furu fu den sma, dan Kownu Sedekia fu Yuda, den futuboi fu en, nanga wan tu sma fu a foto o tan abra ete. Ma mi o libi den sma disi gi Kownu Nebukadresar fu Babilon. Iya, den feanti nanga den sma di e suku fu kiri den, o kiri den nanga feti-owru.+ A kownu no o abi nowan firi gi den èn a no o sari den srefisrefi.”’+
8 Yu musu taigi a pipel disi: ’Disi na san Yehovah taki: „Luku, mi e gi unu na okasi fu bosroiti efu unu wani teki a pasi fu libi noso a pasi fu dede.+ 9 Efu wan sma tan na ini a foto disi, a o dede fu di feti-owru, angri, nanga takru siki o kiri en.+ Ma efu wan sma komoto na ini a foto èn a gi ensrefi abra na den Kaldeyasma di lontu a foto, a no o dede. A o tan na libi.”’+
10 ’„Mi drai baka gi a foto disi. Mi o tyari rampu kon na en tapu èn nowan bun o pasa nanga en.+ Mi o libi en gi a kownu fu Babilon+ èn a o bron en nanga faya”,+ na so Yehovah taki.
11 Yehovah abi wan boskopu tu gi na osofamiri fu a kownu fu Yuda.+ 12 Un sma fu David,+ disi na san Yehovah taki: „Efu ibri mamanten+ unu e koti krutu na wan reti fasi+ èn efu unu e yepi sma te bedrigiman du ogri nanga den,+ dan mi ati no o bron nanga unu moro. Den ogri di unu e du, e meki mi ati bron leki wan faya.+ A o bron unu krinkrin èn nowan sma o man kiri en.”’+
13 ’Un sma di e tan na a foto di de na tapu a stonbergi fu a lagipresi,+ mi o strafu unu’, na so Yehovah taki. ’Sonwan fu unu e taki: „Suma o man saka kon na wi? Suma o man kon na den presi pe wi e tan?”+ 14 Ma mi o aksi unu frantwortu+ fu den sani di unu e du.+ Mi o sutu faya gi a busi+ fu a foto èn a faya o bron ala sani na en lontu’,+ na so Yehovah taki.”