Esekièl
35 Baka dati Yehovah taigi mi: 2 „Manpikin fu libisma, luku go+ na a sei fu Seyir-bergikontren+ èn taki san o pasa nanga den sma drape.+ 3 Yu musu taigi den: ’A Moro Hei Masra Yehovah taki: „Unu di e libi na Seyir-bergikontren,+ luku, mi o strafu unu. Mi o langa mi anu fu strafu unu+ èn fu meki a kontren disi kon tron wan presi pe nowan sma e tan. Iya, mi o pori en.+ 4 Mi o meki den foto fu unu kon tron wan brokopresi èn a kontren disi o kon de wan presi pe nowan sma e tan.+ Unu sa musu fu sabi taki mi na Yehovah.+ 5 Mi o du disi, fu di te na a dei fu tide unu abi bita-ati+ èn unu ben e kiri den Israelsma nanga feti-owru+ na a ten di soso ogri ben miti den,+ iya, na a ten di a sondu fu den ben kon na wan kaba.”’+
6 A Moro Hei Masra Yehovah taki: ’Dati meki, neleki fa a de seiker taki mi de na libi, na so a de seiker taki sma o kiri unu, fu di mi ben sreka unu fu sma kiri unu.+ Unu ben abi bita-ati gi den sma di unu kiri. Dati meki sma o kiri unu.+ 7 Mi o meki Seyir-bergikontren kon tron wan presi pe nowan sma e tan. Iya, mi o pori en.+ Mi o kiri den sma di e waka pasa na ini a kontren disi èn den wan di e drai kon baka.+ 8 Mi o meki a heri Seyir-bergikontren kon lai nanga sma di trawan kiri drape. Den sma di trawan kiri nanga feti-owru o fadon dede+ na tapu den pikin bergi fu unu, na ini den lagipresi fu unu èn na ini ala den liba fu unu. 9 Fu ala ten mi o meki a kontren fu unu kon tron wan presi pe nowan sma e tan èn nowan sma o libi na ini den foto fu unu.+ Unu sa musu fu sabi taki mi na Yehovah.’+
10 Unu ben taki: ’Den tu pipel disi èn den tu kondre disi o kon de fu wi èn wi o teki ala kondre abra’,+ aladi Yehovah ben de leti drape.+ 11 A Moro Hei Masra Yehovah taki: ’Dati meki, neleki fa a de seiker taki mi de na libi, na so a de seiker taki mi o strafu unu, fu di unu ati ben e bron nanga den èn unu ben e dyarusu na den tapu. Iya, na bita-ati unu ben abi gi den.+ Te mi o krutu unu, mi o meki den kon sabi suma na mi.+ 12 Unu sa musu fu sabi taki mi, Yehovah, iya, mi srefi yere ala den wisiwasi sani di unu taki fu den bergi fu Israel.+ Unu ben taki: „Nowan sma e libi drape. Wi kisi na okasi fu pori den.”+ 13 Unu opo un mofo fu gi mi bigitaki.+ Unu taigi mi wan lo sani.+ Mi yere ala san unu taki.’+
14 A Moro Hei Masra Yehovah taki: ’Na a ten di ala sma na grontapu e prisiri, mi o meki a kontren fu unu kon tron wan presi pe nowan sma e tan. 15 Di a kontren fu den Israelsma tron wan presi pe nowan sma e tan, unu ben e prisiri. We, mi o meki unu kon de leki fa den Israelsma ben de fosi.+ Un sma fu Seyir-bergikontren, iya, un alamala di e libi na Edom, a heri kontren fu unu o tron wan presi pe nowan sma e tan.+ Den pipel sa musu fu sabi taki mi na Yehovah.’”+