MWBR17 07 Verwijzing gi Wi Kresten libi nanga a preikiwroko studie-buku
31 YULI–6 AUGUSTUS
GUDU NA INI GADO WORTU | ESEKIÈL 24-27
„Wan profeititori di e sori taki Gado o strafu Tirus, e tranga wi bribi na ini san Yehovah taki”
si-O 133 ¶4
4 Tra buweisi di e sori taki Bijbel komoto fu Gado, de fu si na a kefalek moi fasi fa den profeititori fu Esekièl kon tru. A ben taki dati Gado ben o strafu kondre soleki Tirus, Egepte nanga Edom. A ben sori fu eksempre taki Tirus ben o kisi pori, èn wan pisi fu a profeititori disi kon tru di Nebukadnesar teki a kondre abra, baka di a feti nanga a foto 13 yari langa (Esek. 26:2-21). Ma a feti disi no meki taki Tirus kisi pori krinkrin. Toku Yehovah ben taki dati Tirus ben o kisi pori krinkrin. Yehovah ben taigi Esekièl fu taki: „Mi o krabu ala finifini doti puru na ini en, meki a tron wan brenki bigi ston pe noti no de na tapu. . . . Den o trowe den ston, den udusani fu yu nanga ala finifini doti go na watra” (Esek. 26:4, 12). Ala den sani disi kon tru baka moro leki 250 yari, na a ten di Aleksander a Bigiwan go feti nanga na èilanti fu Tirus. Den srudati fu Aleksander krabu ala den broko ston fu Tirus di ben de na a syoro fu Fenisia kon na wán, dan den trowe dati go na ini a se. Na so den meki wan pasi di ben e waka sowan 800 meter go miti na èilanti. Baka dati, nanga kefalek koni fetisani den broko pasa a skotu fu a foto di ben hei 46 meter èn na so den ben man teki a foto abra na ini a yari 332 Fosi Krestes. Dusundusun sma fu Tirus lasi den libi èn den srudati fu Aleksander seri omeni fu den leki srafu. Neleki fa Esekièl ben taki, dan Tirus tron wan ’brenki bigi ston pe noti no ben de na tapu èn wan presi pe sma ben e drei fisinèt’ (Esek. 26:14). Na a tra sei fu a Pramisi Kondre, den Edomsma di ben lobi bedrigi trawan, kisi pori tu, neleki fa a profeititori fu Esekièl ben taki (Esek. 25:12, 13; 35:2-9). Boiti dati, ala den profeititori fu Esekièl di ben taki dati Yerusalem ben o kisi pori èn taki sani ben o kon bun baka na ini Israel, kon tru finifini.—Esek. 17:12-21; 36:7-14.
ce-O 216 ¶3
Na Gado meki sma skrifi Bijbel trutru?
3 Tirus ben de wan prenspari foto na a syoro fu Fenisia. A kondre disi ben du ogri sani nanga owruten Israel di ben de na zuid-sei èn di ben e anbegi Yehovah. Moro leki 250 yari na fesi, Yehovah ben taigi a profeiti Esekièl fu fruteri sma taki Tirus ben o kisi pori krinkrin. Yehovah ben taki: „Mi o tyari furu kondre kon feti nanga yu . . . Den o hari den skotu fu Tirus broko èn den o broko den toren fu en. Mi o krabu ala finifini doti puru na ini en, meki a tron wan brenki bigi ston pe noti no de na tapu. A o tron wan presi pe sma e drei fisinèt na ini a birti fu wan se.” Esekièl ben taki tu sortu kondre nanga sortu fesiman ben o de a fosiwan di ben o kon feti nanga Tirus. A ben taki: „Mi o meki Kownu Nebukadresar fu Babilon kon feti nanga Tirus.”—Esekièl 26:3-5, 7.
it-1-O 87
Aleksander
Tu leisi Aleksander wini den Persiasma na ini Pikin Asia. A fosi leisi ben de na Granikus-liba èn a di fu tu leisi ben de na Isus-lagipresi pe a kiri sowan feifi hondro dusun Persia srudati. Ma baka di a wini den Persiasma, a no hari go na den baka di den lowe. Na presi fu dati, a poti en prakseri na a èilanti Tirus. Hondrohondro yari na fesi, profeiti ben taki kaba taki den skotu, den toren, den oso èn srefi a doti fu a foto Tirus ben o trowe go na ini a se (Esek. 26:4, 12). Sobun, na wan aparti sani taki na den broko pisi fu a foto di ben tan abra baka di Nebukadnesar pori a foto, Aleksander gebroiki fu meki wan pasi fu 800 meter go na a èilanti. Na ini yuli 332 Fosi Krestes, Aleksander nanga en legre gebroiki den tranga fetisani fu den fu pori a heimemre foto disi di fosi ben de bigi basi fu se.