MWBR17 08 Verwijzing gi Wi Kresten libi nanga a preikiwroko studie-buku

7-13 AUGUSTUS

GUDU NA INI GADO WORTU | ESEKIÈL 28-31

„Yehovah pai wan pipel di no ben e anbegi en”

(Esekièl 29:18) „Manpikin fu libisma, Kownu Nebukadresar fu Babilon seni a legre fu en fu go feti nanga Tirus. Ala den ede ben kon piri. Den skowru fu den ben kon sorosoro. Ma toku en nanga den srudati fu en no kisi nowan pai di den go feti nanga Tirus.

it-2-O 1056 ¶7

Tirus

A foto kisi pori. Nebukadnesar lontu Tirus bun langa. Fu di den ede fu den srudati ben e griti na den helm fu den, meki den „kon piri”. Den srudati ben musu syow wrokosani fu bow sani lontu a foto èn dati meki den skowru fu den ben kon „sorosoro”. Nebukadnesar no kisi nowan „pai” di a strafu Tirus soleki fa Gado ben wani. Dati meki Yehovah pramisi taki a ben o gi en den gudu fu Egepte (Ese 29:17-20). Soleki fa a Dyu historia skrifiman Josephus e taki, dan Babilon lontu Tirus 13 yari langa (Against Apion, I, 156 [21]) èn a kostu den bun furu. Historia buku no e taki finifini san nanga san Nebukadnesar du nanga Tirus. Ma a no de fu taki dati furu sma fu Tirus dede èn den lasi furu gudu.​—Ese 26:7-12.

(Esekièl 29:19) Dati meki a Moro Hei Masra Yehovah taki: ’Mi o gi Egepte na Kownu Nebukadresar fu Babilon. A o tyari den gudu fu Egepte gowe, iya, a o leigi Egepte. Den sani disi o de leki pai gi den srudati fu en.’

it-1-O 602 ¶7

Egepte, Egeptesma

Sma feni wan brifi di ben skrifi gi Nebukadnesar na ini a di fu 37 yari di a ben e tiri, 588 F.K. A brifi disi ben e taki fu wan feti di den Babilonsma ben go feti nanga Egepte. Wi no sabi efu a feti disi abi fu du nanga a fosi leisi di den teki Egepte abra noso efu a abi fu du nanga tra feti. Ma san wi sabi, na taki Nebukadnesar kisi den gudu fu Egepte fu di Yehovah ben gebroiki en fu strafu Tirus di ben de wan feanti fu Gado pipel.​—Ese 29:18-20; 30:10-12.

(Esekièl 29:20) „’Mi gi en a kondre Egepte leki pai fu di a go feti nanga Tirus gi mi’, na so a Moro Hei Masra Yehovah taki.

g86-O 8/11 27 ¶4, 5

Wi musu pai ala belasting-moni di lanti e aksi?

Fu piki na aksi disi, dan meki wi luku a tori pe a Mekiman srefi ben pai wan kondre gi wan wroko di den ben du gi en. Yehovah ben abi reti fu atibron tapu Tirus èn dati meki a taki dati a o strafu a foto disi. Gado gebroiki a legre fu Babilon di ben de ondro a tiri fu Nebukadnesar fu du disi. Aladi den Babilonsma wini a feti disi, toku a kostu den furu. Dati meki Yehovah ben feni taki den musu kisi pai gi a wroko fu den. Luku san a taki na Esekièl 29:​18, 19: „Manpikin fu libisma, Kownu Nebukadresar fu Babilon seni a legre fu en fu go feti nanga Tirus. . . . Ma toku en nanga den srudati fu en no kisi nowan pai di den go feti nanga Tirus. Dati meki a Moro Hei Masra Yehovah taki: ’Mi o gi Egepte na Kownu Nebukadresar fu Babilon. A o tyari den gudu fu Egepte gowe, iya, a o leigi Egepte. Den sani disi o de leki pai gi den srudati fu en.’”

Leki Bijbel studenti, wi sabi taki Nebukadnesar ben de wan heimemre tiriman di ben e anbegi fasi gado. Sma sabi taki Babilon nanga a legre fu en ben e du ogri-ati sani nanga den sma di den ben teki leki strafuman. Yehovah no ben feni den sani dati bun, toku gi en wan paiman tan wan paiman, èn a ben feni en prenspari fu pai Babilon ala san a ben musu pai en.

Diki moro dipi

(Esekièl 28:12-19) „Manpikin fu libisma, singi wan sari singi di abi fu du nanga a kownu fu Tirus. Taigi en: ’Disi na san a Moro Hei Masra Yehovah taki: „Yu na wan eksempre fu wan sma di abi furu koni èn di moi srefisrefi. ¹³ Yu ben de na ini Eden, a dyari fu Gado. Den krosi fu yu ben moi nanga ala sortu diriston, soleki robijn-ston, topas-ston, yaspis-ston, krisolit-ston, oniks-ston, yade-ston, safir-ston, turkwas-ston, nanga smaragd-ston. Den sani pe den diriston ben fasi na ini, ben de fu gowtu. Na a dei di mi meki yu, mi meki den sani disi. ¹⁴ Yu na a salfu kerub-engel di e gi kibri. Na mi gi yu a wroko dati. Yu ben de na tapu a santa bergi fu Gado. Yu ben e waka na mindri ston di ben e bron. ¹⁵ Sensi mi meki yu, yu tyari yusrefi na wan reti fasi, teleki yu bigin du kruktudu. ¹⁶ Fu di a bisnis fu yu ben e drai bun, meki yu kon lai ogridu èn yu bigin du sondu. Leki wan doti sani mi o trowe yu komoto na a bergi fu Gado. Mi o kiri yu, kerub-engel di e gi kibri, so taki yu no de moro na mindri den ston di e bron. ¹⁷ Na fu di yu moi, meki yu kisi heimemre. Fu di yu ben abi so furu glori meki yu lasi a koni fu yu. Mi o trowe yu go na gron. Den kownu o fruwondru te den si san mi du nanga yu. ¹⁸ Na fu di yu du furu ogri èn yu du bisnis na wan kruka fasi, meki yu doti den santa presi fu yu. Mi o meki wan faya bron na yu mindri. A o bron yu krinkrin. Mi o meki yu tron asisi na heri grontapu, so taki ala sma kan si yu. ¹⁹ Den sma fu ala pipel di sabi yu, o luku yu nanga opo mofo. Mi o meki rampu kon na yu tapu wantronso. Noiti yu o de moro.”’”

it-2-O 1177 ¶1, 2

No abi sondu

A fosi sma di sondu èn a kownu fu Tirus. Fosi libisma sondu, wan yeye na ini hemel ben sondu kaba, soleki fa Yesus taki na Yohanes 8:44 èn soleki fa skrifi na ini Genesis kapitel 3. Aladi a sari singi di skrifi na Esekièl 28:12-19 abi fu du nanga a „kownu fu Tirus”, toku a e sori fa wan yeye manpikin fu Gado tron a fosi sma di sondu. A tekst e taki dati „a kownu fu Tirus” ben abi heimemre, a ben e si ensrefi leki ’wan gado’, a e kari en wan „kerub-engel” èn a e taki fu „Eden, a dyari fu Gado”. Na den srefi sani disi Bijbel e taki fu Satan Didibri. A ben kon kisi heimemre, a ben meki wan sneki na ini Eden taki èn en na „a gado fu a grontapu disi”.​—1Ti 3:6; Ge 3:1-5, 14, 15; Opb 12:9; 2Ko 4:4.

A nen fu a kownu fu Tirus no kari. A e taki dati a e tan na ini wan foto di „moi srefisrefi”. A kownu disi ben ’abi furu koni èn a ben moi srefisrefi’. A ben e „tyari ensrefi na wan reti fasi” sensi a ten di a meki, teleki a bigin du kruktudu (Ese 27:3; 28:12, 15). A kan taki a sari singi na ini Esekièl no abi fu du nomo nanga wán kownu fu Tirus, ma nanga ala den kownu di ben e tiri Tirus. (Luku a profeititori di e taki fu a „kownu fu Babilon” na Yes 14:4-20 di nen no kari.) Efu dati de so, dan a kan taki a sari singi disi e sori taki fosi, den tiriman fu Tirus ben abi wan bun matifasi nanga Kownu David èn Kownu Salomo. Tirus ben gi furu sani srefi fu bow a tempel fu Yehovah na tapu Moria-bergi. Sobun, na a bigin Tirus no ben e libi ogri nanga Israel, a pipel fu Yehovah (1Kw 5:1-18; 9:10, 11, 14; 2Kr 2:3-16). Bakaten, den kownu fu Tirus no ben e tyari densrefi na wan „reti fasi” moro. Dati meki den profeiti fu Gado, soleki Yoèl nanga Amos èn sosrefi Esekièl, krutu den.​—Yl 3:4-8; Am 1:9, 10.

14-20 AUGUSTUS

GUDU NA INI GADO WORTU | ESEKIÈL 32-34

„A bigi frantwortu fu a waktiman”

(Esekièl 33:7) We, manpikin fu libisma, mi meki yu tron wan waktiman gi den Israelsma. Yu musu arki den sani di mi e taigi yu èn yu musu warskow den gi mi.

it-2-O 1227 ¶4

Waktiman

Na wan agersi fasi. Na agersi fasi Yehovah ben poti profeiti leki waktiman gi en pipel Israel (Yer 6:17). Son leisi den profeiti disi ben e taki fu waktiman na agersi fasi tu (Yes 21:6, 8; 52:8; 62:6; Ho 9:8). Den agersi waktiman disi ben abi a frantwortu fu warskow den ogrisma gi a strafu di den ben o kisi. Efu den no ben du dati, dan den srefi ben o abi brudu-paiman. Ma efu den sma no ben wani arki a warskow, dan den ben o lasi den libi (Ese 3:17-21; 33:1-9). Wan profeiti di no ben e du en wroko bun, ben wisiwasi moro wan breni waktiman noso wan dagu di no man meki babari.​—Yes 56:10.