Yona
1 Yehovah taigi Yona,+ a manpikin fu Amitai: 2 „Opo go na a bigi foto Ninefei+ èn taigi den sma drape taki mi si ala den ogri di den e du.”+
3 Ma Yona lowe go na Tarsis+ fu kibri gi Yehovah.+ Te fu kaba a doro na Yope+ pe a si wan sipi di ben o go na Tarsis. Dan a pai wan moni fu go na ini a sipi. Na so a teki pasi go na Tarsis nanga den tra sma na ini a sipi, bika a ben wani kibri gi Yehovah.
4 Ne Yehovah meki wan bigi winti wai na a se+ èn a se kon krasi srefisrefi.+ Pikinmoro a sipi sungu. 5 Den botoman bigin frede, èn ibriwan fu den ben e bari suku yepi na a gado fu en.+ Ne den teki den sani di ben de na ini a sipi èn den trowe den go na ini a se fu meki a sipi kon moro lekti.+ Disiten Yona go didon te na inisei fu a sipi, èn a fadon na ini wan dipi sribi.+ 6 Baka wan pisi ten a kapten fu a sipi kon na en èn a taki: „Fa yu kan sribi now? Opo! Bari kari a gado fu yu!+ Kande a tru Gado o sari wi èn wi no o dede.”+
7 Ne den taigi makandra: „Meki wi iti lòt+ fu kon sabi suma tyari a rampu disi kon na wi tapu.”+ Di den iti lòt, den kon si te fu kaba taki na Yona tyari rampu kon na den tapu.+ 8 Ne den taigi en: „Grantangi, taigi wi, suma meki a rampu disi miti wi?+ Sortu wroko yu e du? Pe yu komoto? Fu sortu kondre yu de? Fu sortu pipel yu de?”
9 Ne a taigi den: „Mi na wan Hebrew man.+ Mi e anbegi Yehovah,+ a Gado fu hemel,+ a sma di meki a se nanga grontapu.”+
10 Dan Yona fruteri den man taki a e lowe gi Yehovah. Ne den man bigin frede srefisrefi èn den aksi en: „Fu san ede yu du a sani disi?”+ 11 Disiten a se ben kon krasi moro nanga moro. Dati meki den man aksi Yona: „San wi musu du nanga yu fu meki a se kon tiri baka?”+ 12 A taigi den: „Opo mi trowe go na ini a se, dan a se o kon tiri baka. Bika mi sabi taki na fu mi ede a bigi rampu disi e miti unu.”+ 13 Toku den man ben e meki muiti fu tyari a sipi go na syoro. Ma den no ben man du dati, fu di a se ben kon krasi moro nanga moro.+
14 Ne den bari kari Yehovah. Den taki:+ „Ke Yehovah, na yu e meki ala den sani disi pasa,+ ma grantangi, no meki wi dede fu a man disi ede! No meki wi kisi brudu-paiman,+ Yehovah!” 15 Baka dati den opo Yona èn den trowe en go na ini a se. Safrisafri a se kon tiri baka.+ 16 Ne den man kisi bigi lespeki gi Yehovah.+ Dati meki den tyari wan srakti-ofrandi gi Yehovah+ èn den meki sweri.+
17 Dan Yehovah seni wan bun bigi fisi fu swari Yona.+ Na so Yona tan dri dei nanga dri neti na ini a bere fu a fisi.+