Deuteronomium

16 Memre taki un musu hori a Paskafesa gi Yehovah un Gado+ na ini a mun Abib,+ bika na ini a mun Abib Yehovah un Gado puru unu na ini Egepte na neti.+ 2 Na a presi di Yehovah o sori unu, sobun a presi di musu tyari en nen,+ na drape un musu srakti den kaw nanga skapu+ di unu musu tyari leki Paska-ofrandi gi Yehovah un Gado.+ 3 Te unu e nyan na ofrandi, dan un no musu nyan nowan sani di abi srudeki na ini. Seibi dei langa un musu nyan brede sondro srudeki+ fu memre taki unu ben pina na ini Egepte èn taki unu ben gowe libi Egepte esi-esi.+ Un heri libi langa un musu du disi fu memre a dei di unu komoto na a kondre Egepte.+ 4 Seibi dei langa nowan srudeki no musu de fu si na den presi pe unu e tan.+ A fosi dei te unu o srakti a meti na mofoneti, un no musu meki a meti tan heri neti teleki mamanten.+ 5 Un no musu srakti a Paska-ofrandi na ini wan fu den foto di Yehovah un Gado gi unu. 6 Na a presi di Yehovah o sori unu, sobun a presi di musu tyari en nen,+ na drape un musu srakti a Paska-ofrandi na mofoneti te son e dongo.+ Un musu srakti en na a srefi yuru di unu ben e komoto na Egepte. 7 Un musu losi a meti èn nyan+ en na a presi di Yehovah un Gado o sori unu.+ A tra mamanten un musu drai go baka na un tenti. 8 Siksi dei langa un musu nyan brede sondro srudeki. Na a di fu seibi dei un musu hori wan spesrutu konmakandra gi Yehovah un Gado.+ Un no musu du nowan wroko na a dei dati.

9 Dan un musu teri seibi wiki. A dei te unu o bigin koti aleisi na den gron, un musu bigin teri den seibi wiki disi.+ 10 Baka dati un musu hori a Wikifesa gi Yehovah un Gado.+ Yehovah un Gado o gi unu furu blesi. Fu dati ede un musu tyari ala san unu firi fu tyari leki ofrandi gi en na a fesa dati.+ 11 Na a presi di Yehovah o sori unu, sobun a presi di musu tyari en nen,+ un musu prisiri. Na fesi Yehovah un Gado un musu prisiri,+ makandra nanga un manpikin, un umapikin, den man nanga den uma di unu abi leki srafu, den Leifisma nanga den trakondre sma di e tan na ini un foto,+ den pikin di no abi papa,+ nanga den uma di den masra dede.+ 12 Un no musu frigiti taki unu ben de srafu na ini Egepte.+ Un musu gi yesi na ala den sani di mi e taigi unu.+

13 Te unu koti na aleisi na den gron èn te unu kaba meki oli nanga win, dan un musu hori a Kampufesa+ seibi dei langa. 14 Na a ten fu a fesa un musu prisiri,+ makandra nanga den sma di e tan na ini un foto. Sobun, un musu prisiri nanga un manpikin, un umapikin, den man nanga den uma di unu abi leki srafu, den Leifisma, den trakondre sma di e tan na un mindri, den pikin di no abi papa, nanga den uma di den masra dede. 15 Seibi dei langa un musu hori a fesa+ gi Yehovah un Gado na a presi di Yehovah o sori unu. Un musu prisiri srefisrefi,+ bika Yehovah un Gado o blesi+ unu. A gron o meki furu nyanyan èn ala san unu o du o abi bun bakapisi.

16 Dri leisi wan yari ibri mansma na un mindri musu go na fesi Yehovah un Gado, na a presi di a o sori unu.+ Den musu go drape te unu e hori a fesa fu brede sondro srudeki,+ a Wikifesa,+ nanga a Kampufesa.+ Ibriwan fu den musu tyari wan sani gi Yehovah, sobun, den no musu go na fesi en nanga leigi anu.+ 17 Yehovah un Gado gi unu furu blesi èn fu dati ede ibriwan sma musu gi Gado furu sani tu.+

18 Un musu poti krutuman+ nanga fesiman+ na den portu fu ala den foto di Yehovah un Gado gi den lo fu unu. Na wan reti fasi den musu koti krutu gi a pipel. 19 Un no musu krutu sani na wan kruktu fasi.+ Un no musu teki sei+ te unu e krutu wan afersi. Un no musu teki tyuku, bika tyuku e breni den koniwan+ èn a kan meki wan sma di e du san reti, taki kruktu sani. 20 Ala ten un musu du san reti, iya, un musu krutu sani na wan reti fasi.+ Na so unu o tan na libi èn unu o teki a kondre abra di Yehovah un Gado gi unu.+

21 Na sei na altari di unu o meki gi Yehovah un Gado, un no musu prani nowan bon fu anbegi dati neleki fa sma e anbegi den santa postu.+

22 Un no musu meki santa pilari+ tu, bika Yehovah un Gado no lobi a sani dati kwetikweti.+