Yesaya
56 Disi na san Yehovah taki: „Un pipel, du san bun+ èn du san reti.+ Bika heri esi mi o tyari frulusu kon+ èn mi retidu o kon na krin.+ 2 Koloku fu a sma di e du disi.+ Koloku fu a man di e hori den wèt fu mi,+ di e si Sabat-dei leki wan santa dei+ èn di e sorgu taki a no e du nowan ogri.+ 3 Den trakondre sma di wani dini Yehovah, no musu taki:+ ’A no de fu taki dati Yehovah no o si mi leki wan sma fu en pipel.’+ A man di no man kisi pikin+ no musu taki: ’Mi na wan drei bon.’”
4 Bika Yehovah taki: „Efu wan man di no man kisi pikin, e hori Sabat, a e du san mi feni bun+ èn a e gi yesi na a frubontu fu mi,+ 5 dan mi o gi en wan presi na ini mi oso+ èn mi o memre en nen.+ Sobun, a o kisi wan sani di bun moro manpikin nanga umapikin.+ Fu ala ten mi o memre en nen+ èn noiti mi o frigiti en.+
6 Na so a de tu nanga den trakondre sma di kon na Yehovah, fu di den wani dini Yehovah+ èn fu di den lobi a nen fu en.+ Sobun, den wani tron futuboi fu en, den e si Sabat-dei leki wan santa dei èn den e gi yesi na a frubontu fu mi.+ 7 Mi o tyari den go na mi santa bergi tu+ èn mi o meki den prisiri na ini mi oso pe sma e kon begi.+ Mi o teki a heri bron-ofrandi+ nanga den srakti-ofrandi+ di den e tyari fu bron na tapu mi altari.+ Bika sma o kari mi oso wan oso pe ala pipel e kon begi.”+
8 A Moro Hei Masra Yehovah e tyari den Israelsma di panya na ala sei, kon makandra.+ A taki: „Mi ben tyari den Israelsma kon makandra kaba, ma now mi o tyari tra sma kon na den tu.”+
9 Meki ala den meti fu a sabana nanga ala den busimeti kon nyan.+ 10 Den waktiman breni.+ Nowan fu den e si san e pasa.+ Den alamala na dagu di no e bari. Den no man meki nowan babari,+ den bro de na tapu, den e didon na gron èn den lobi fu dyonko.+ 11 Den na gridi dagu+ di no abi nofo noiti.+ Boiti dati, den de skapuman tu di no abi frustan.+ Den alamala e du san den wani èn ibriwan fu den e bedrigi sma na en lontu fu kisi wini.+ Den e taki: 12 „Un man, kon! Meki mi teki win, dan un kon meki wi dringi sopi teleki wi no man moro.+ Tamara wi o du leki tide, iya, wi o du moro srefi.”+