2 Samuel
7 Na so a kon pasa taki Kownu go tan na ini en eigi oso+ èn Yehovah meki taki den feanti di ben de lontu David no kon feti nanga en moro.+ 2 Ne Kownu taigi a profeiti Natan:+ „Luku, mi e tan na ini wan oso fu sedre-udu,+ ma a santa kisi fu a tru Gado de na ini wan tenti.”+ 3 Ne Natan taigi Kownu: „Yu kan du awinsi san de na yu ati,+ bika Yehovah de nanga yu.”
4 Ma a neti dati Yehovah taigi+ Natan: 5 „Go taigi mi futuboi David: ’Disi na san Yehovah taki: „Fu san ede yu denki taki yu musu bow wan oso fu mi tan na ini?+ 6 Sensi di mi puru den Israelsma na ini Egepte teleki tide,+ noiti mi tan na ini wan oso. Ma mi ben e tan na ini wan tenti+ noso na ini wan tabernakel+ te mi ben e go+ fu a wan presi na a trawan. 7 A heri pisi ten dati mi ben e waka nanga den Israelsma.+ Oiti yu yere taki mi aksi wan fu den lo fu Israel+ di mi ben poti fu tiri mi pipel Israel: ’Fu san ede unu no bow wan oso fu sedre-udu gi mi?’”’ 8 Sobun, disi na san yu musu taigi mi futuboi David: ’Disi na san Yehovah di e tiri den legre, taki: „Misrefi puru yu na den weigron pe yu ben e luku skapu+ èn mi poti yu leki tiriman+ fu mi pipel Israel. 9 Awinsi pe yu e go, mi o de nanga yu+ èn mi o kiri ala yu feanti gi yu.+ Mi o meki yu kisi biginen+ èn yu o tron wan fu den pôpi sma fu grontapu. 10 Mi o gi mi pipel Israel den eigi presi,+ so taki den kan tan drape+ ala ten. Den o tan libi drape èn noiti moro den libi o kon bruya. Den sma di e du kruktudu no o du mi pipel ogri moro, leki fa den ben gwenti du+ 11 na a ten di mi ben poti krutuman+ fu tiri mi pipel Israel. Mi o meki taki nowan feanti fu yu kon feti nanga yu moro.+
Yehovah taigi yu taki Yehovah ben o meki yu nanga yu bakapikin tron kownu.+ 12 Na a kaba fu yu libi,+ te a ten doro taki yu o dede,+ dan mi o poti wan bakapikin fu yu fu tiri leki kownu. Mi o meki taki a kownukondre fu en tan.+ 13 Na en o bow wan oso pe sma o kari mi nen+ èn mi o meki a kownukondre fu en tan fu ala ten.+ 14 Misrefi o tron en papa+ èn en o tron mi manpikin.+ Te a du wan sani di no bun, dan mi o strafu en, fu di mi o fon en nanga wan tiki+ neleki fa libisma e du èn mi o wipi en neleki fa den bakapikin fu Adam gwenti du. 15 Noiti mi no o tapu fu sori en bun-ati, soleki fa mi ben du nanga Saul di mi puru leki kownu+ fu kan poti yu na en presi. 16 Den bakapikin fu yu o tan tiri leki kownu èn fu ala ten a kownukondre fu yu o tan. A tirimakti fu yu o de fu ala ten.”’”+
17 Disi na den sani di Natan taigi David. Ala den sani di Natan si na ini a fisyun, a fruteri David.+
18 Ne Kownu David kon na inisei èn a saka sidon na fesi Yehovah. A taki: „Moro Hei Masra Yehovah, suma na mi+ èn suma na mi famiri taki yu du someni sani gi mi? 19 Efu dati no sari ete, Moro Hei Masra Yehovah, dan now yu e fruteri yu futuboi tu san o pasa nanga a famiri fu en, srefi na ini a ten di de farawe ete. Moro Hei Masra Yehovah,+ disi na a wèt gi ala libisma.+ 20 San moro mi kan taigi yu? Moro Hei Masra Yehovah, yusrefi sabi yu futuboi bun.+ 21 Yu du ala den bigi sani disi soleki fa yu taki+ èn soleki fa yusrefi wani+ yu meki yu futuboi kon sabi dati.+ 22 Na fu dati ede yu bigi trutru,+ Moro Hei Masra Yehovah. Nowan tra sma de leki yu+ èn wi yere fu someni gado, ma nowan tra Gado no de boiti yu.+ 23 Sortu pipel na grontapu de leki yu pipel Israel?+ Na a pipel disi Gado bai kon fri fu tron en pipel,+ fu meki en nen+ kisi glori èn fu du bigi sani di e meki sma kisi bigi lespeki gi yu.+ Na yu yagi den tra pipel nanga den gado fu den puru na ini a kondre fu den, so taki den sma di yu bai kon fri+ fu Egepte, ben kan abi wan presi fu tan. 24 Yu teki Israel+ leki yu pipel fu ala ten èn yu, Yehovah, tron a Gado fu den.+
25 Dati meki mi e begi yu Yehovah mi Gado, tan du den sani di yu pramisi fu du gi yu futuboi èn gi a famiri fu en fu ala ten. Du soleki fa yu taki.+ 26 Meki yu nen kisi bigi glori fu ala ten.+ Meki sma taki: ’Yehovah di e tiri den legre, na Gado na ini Israel.’+ Meki den bakapikin fu yu futuboi David tan ala ten na yu fesi.+ 27 Na yu, Yehovah di e tiri den legre, a Gado fu Israel, taigi yu futuboi: ’Mi o meki yu nanga den bakapikin fu yu tiri leki kownu.’+ Na fu dati ede yu futuboi teki deki-ati fu begi a begi disi.+ 28 We now, Moro Hei Masra Yehovah, yu na a tru Gado. Meki ala den sani di yu taki pasa trutru,+ bika na yu pramisi yu futuboi den bun sani disi.+ 29 We, mi Masra, blesi+ den bakapikin fu mi, so taki den kan tiri leki kownu fu ala ten.+ Moro Hei Masra Yehovah, na yu pramisi fu du ala den sani disi. Meki den bakapikin fu mi kisi blesi fu ala ten,+ fu di na yu blesi den.”