1 Petrus
4 We, efu Krestes pina di a ben de wan libisma,+ dan un musu abi a srefi denki+ di a ben abi, so taki dati kan gi unu krakti. A sma di pina leki libisma, no e sondu moro,+ 2 so taki na ini a pisi ten di a de na libi ete, a no o libi moro fu du san a sondu skin wani,+ ma fu du a wani fu Gado.+ 3 Na ini a ten+ di pasa, unu libi langa nofo leki fa grontapusma wani.+ Unu ben e du ogri sondro fu syen,+ unu ben abi tranga lostu, unu ben e dringi win pasa marki,+ unu ben e hori bradyari fesa, unu ben e strei dringi sopi èn unu ben e anbegi kruktugado, aladi Gado no feni dati bun kwetikweti.+ 4 Fu di unu no e waka moro nanga den fu go libi a srefi fisti yayolibi,+ meki den e fruwondru èn den e taki ogri fu unu.+ 5 Ma den sma disi o gi frantwortu na a sma+ di de srekasreka fu krutu den wan di de na libi èn den wan di dede kaba.+ 6 Fu taki en leti, na fu dati ede sma ben preiki a bun nyunsu gi den dedewan*+ sosrefi, so taki den ben kan kon na libi fu di Gado yeye e tiri den,+ aladi libisma e krutu den soleki fa libisma e si sani.+
7 Ma a kaba fu ala sani kon krosibei.+ Fu dati ede un musu de nanga krin frustan+ èn ala ten un musu de srekasreka fu begi.+ 8 A moro prenspari sani, na taki un musu lobi makandra nanga un heri ati,+ bika lobi e tapu bun furu sondu.+ 9 Gi makandra wan switikon sondro fu krutukrutu.+ 10 Neleki fa ibriwan fu unu kisi a koni fu man du wan spesrutu sani, na so un musu gebroiki a koni dati fu dini makandra leki bun futuboi* di Gado sori bun-ati na difrenti fasi.+ 11 Efu wan sma e taki wan sani, dan meki a taki fu den santa boskopu+ fu Gado. Efu wan sma e dini trawan,+ dan meki a frutrow tapu a krakti di Gado e gi.+ Na so fasi Yesus Krestes kan meki taki Gado kisi glori na ala fasi.+ Glori+ nanga makti na fu en fu têgo, iya, fu ala ten. Amen.
12 Un lobiwan, no fruwondru te hebi* tesi e miti unu,+ neleki a de wan sani di unu no ben fruwakti. 13 Na presi fu dati, un musu tan prisiri,+ fu di unu e pina tu neleki fa Krestes ben pina.+ Na so unu kan breiti srefisrefi èn unu kan prisiri pasa marki te a glori fu en o kon de fu si.+ 14 Efu sma e kosi unu fu Krestes nen ede,+ dan unu de koloku,+ fu di disi e sori taki unu abi a yeye fu Gado nanga a glori fu en.+
15 No meki nowan fu unu pina+ leki wan kiriman, wan fufuruman, wan ogriman, noso wan sma di e bumui+ nanga tra sma tori. 16 Ma efu wan sma e pina+ fu di a de wan Kresten, dan meki a no firi syen.+ Meki a tan gi Gado glori fu di a e libi leki wan Kresten, 17 bika a reti ten doro taki Gado o koti krutu èn a o bigin na a oso fu en fosi.+ We, efu a e bigin na wi fosi,+ dan san o pasa nanga den wan di no wani gi yesi na a bun nyunsu fu Gado?+ 18 „Efu wan reti-ati sma musu meki furu muiti fu Gado frulusu en,+ dan fa sani o waka nanga wan ogri sma èn nanga wan sondari?”+ 19 Fu dati ede meki den wan di e pina fu di den e du san Gado wani, tan poti a libi fu den na ini na anu fu wi Mekiman di wi kan frutrow, aladi den e tan du bun.+