2 Tesalonikasma

1 Mi, Paulus, di de nanga Selfanus èn Timoteyus,+ e skrifi a gemeente fu den Tesalonikasma di de wán nanga Gado wi Tata èn nanga Masra Yesus Krestes:

2 Meki Gado a Tata nanga Masra Yesus Krestes sori unu bun-ati èn meki a freide fu den de nanga unu.+

3 Wi musu fu taki Gado tangi gi unu ala ten,+ mi brada. A fiti fu du disi, fu di a bribi fu unu e gro moro nanga moro+ èn fu di a lobi di ibriwan fu unu abi gi makandra, e kon tranga moro nanga moro.+ 4 Sobun, wi e prèise+ unu na den tra gemeente fu Gado, fu di unu e horidoro èn fu di unu no lasi a bribi fu unu awinsi sma e frufolgu unu, noso e pina unu.+ 5 Disi e sori taki Gado e koti krutu na wan reti fasi.+ A e meki tu taki unu warti fu go na ini a Kownukondre fu Gado.+ Na fu a Kownukondre ede unu e pina.+

6 Sobun, te Gado e pina den sma baka di e pina unu, dan a e du san reti.+ 7 Ma unu di den e pina, o kisi yepi fu Gado makandra nanga wi, te Masra Yesus o sori ensrefi+ komoto na hemel makandra nanga den tranga engel+ fu en 8 na ini wan bigi faya. Na a ten dati, a o puru atibron+ na tapu den sma di no sabi Gado+ èn na tapu den sma di no e gi yesi+ na a bun nyunsu di e taki fu wi Masra Yesus.+ 9 A strafu+ di den sma disi o kisi, na taki den o kisi pori fu têgo,+ so taki den no o de moro na fesi Masra èn taki den no o si a bigi krakti fu en.+ 10 Disi o pasa na a ten te a o kon fu kisi glori makandra nanga den santawan fu en+ èn te ala den sma di abi bribi o fruwondru fu Masra. Fu di unu ben bribi den sani di wi ben taigi unu, meki unu o de na mindri den sma disi.

11 Fu dati ede wi e tan begi gi unu taki a Gado fu wi kan feni taki unu warti fu a gi unu wan kari.+ Meki a du ala den bun di a wani du nanga a krakti fu en èn meki a sorgu taki den sani di unu e du fu sori a bribi fu unu, abi bun bakapisi. 12 Na so fasi unu kan meki taki a nen fu wi Masra Yesus kisi glori+ èn taki unu kan kisi glori fu en ede,+ fu di a Gado fu wi nanga Masra Yesus Krestes sori unu bun-ati.+