Yeremia
25 Na ini a di fu fo yari di Kownu Yoyakim,+ a manpikin fu Yosia, ben e tiri Yuda, Kownu Nebukadresar ben e tiri Babilon wán yari kaba. Na a ten dati Yeremia kisi wan boskopu gi ala sma fu Yuda. 2 Ne a profeiti Yeremia tyari a boskopu gi ala sma fu Yuda nanga ala sma di ben e tan na ini Yerusalem. A taki:
3 „Sensi a di fu tinadri yari di Kownu Yosia,+ a manpikin fu Amon, ben e tiri Yuda, teleki now, tutenti na dri yari pasa. Na ini a heri pisi ten dati Yehovah gi mi boskopu èn mi tan warskow unu. Mi ben opo fruku fu taki nanga unu, ma unu no ben wani arki.+ 4 Ala den futuboi fu en di ben wroko leki profeiti, Yehovah seni gi unu. A ben opo fruku fu seni den gi unu, ma unu no arki+ èn unu no poti prakseri.+ 5 Den ben taki: ’Grantangi, un kenki den ogri fasi fu unu èn tapu nanga den ogri di unu e du.+ Dan unu o tan libi langa na ini a kondre di Yehovah gi unu nanga den afo fu unu sensi ten.+ 6 Un no musu anbegi tra gado. No dini den èn no boigi gi den. Un no musu meki afkodrei-popki fu meki mi ati bron, noso mi o tyari rampu kon na unu tapu.’+
7 Yehovah taki: ’Ma unu no arki mi. Unu tan meki afkodrei-popki fu meki mi ati bron. Dati meki rampu o kon na unu tapu.’+
8 Fu dati ede Yehovah di e tiri den legre taki: ’„Fu di unu no arki mi, 9 meki mi o seni ala den lo fu noordsei gi unu”,+ na so Yehovah taki. „Iya, mi o seni mi futuboi Kownu Nebukadresar fu Babilon+ fu kon feti nanga a kondre disi,+ nanga den sma di e tan na ini a kondre, èn nanga ala den pipel na ini a birti.+ Mi o figi den alamala puru. Sma o luku nanga opo mofo èn den o froiti+ te den si fa den presi dati tron brokopresi. Na so den o tan fu ala ten.+ 10 Mi o sorgu taki nowan prisiri babari o de fu yere. Iya, nowan sma o yere a sten fu wan sma di e prisiri,+ a sten fu wan trowmasra, noso a sten fu wan trowmisi.+ Sma no o yere den anumiri+ èn nowan lampu o leti.+ 11 A heri kondre o tron wan brokopresi èn ala sma o fruwondru fu dati. Seibitenti yari+ langa den pipel disi o dini a kownu fu Babilon.”’
12 Yehovah taki: ’Te den seibitenti yari pasa,+ mi o aksi a kownu fu Babilon nanga en pipel frantwortu fu den ogri di den du.+ Iya, mi o strafu a heri kondre fu den Kaldeyasma,+ èn mi o meki a tron wan brokopresi fu ala ten.+ 13 Mi o du ala den sani disi nanga a kondre soleki fa mi taki, soleki fa a skrifi na ini a buku disi, èn soleki fa Yeremia ben taigi ala den pipel na fesi.+ 14 Bika furu pipel nanga bigi kownu+ ben meki mi pipel tron srafu fu den.+ Dati meki mi o strafu den fu den sani di den du.’”+
15 Yehovah, a Gado fu Israel, taigi mi: „Mi atibron de leki wan kan win. Yu musu teki a kan na mi anu, dan yu go na ala den pipel pe mi o seni yu go. Meki den dringi fu a kan dati.+ 16 Te den dringi, den o slenger go-kon. Den o du leki lawman, fu di mi o seni wan feti-owru na den mindri.”+
17 Ne mi teki a kan na Yehovah anu, dan mi go na ala den pipel pe Yehovah seni mi go èn mi meki den dringi.+ 18 Sobun, mi go na Yerusalem, den foto fu Yuda, èn den kownu nanga granman fu Yuda. Den musu dringi, bika Gado bosroiti fu pori den. Sma o froiti fu di den o fruwondru fu si san pasa nanga den+ èn den o gebroiki den nen fu fluku trawan, soleki fa unu o si heri esi.+ 19 Dan mi go na Farao, sobun, a kownu fu Egepte, èn na den futuboi, den granman, nanga a heri pipel fu en.+ 20 Mi go tu na ala den trakondre sma, ala den kownu fu a kondre Us,+ ala den kownu fu a kondre fu den Filisteasma,+ Askelon,+ Gasa,+ Ekron,+ den sma di tan abra na Asdod,+ 21 Edom,+ Moab,+ den Amonsma,+ 22 ala den kownu fu Tirus,+ ala den kownu fu Sidon,+ den kownu fu a tabiki na a se, 23 Dedan,+ Teima,+ Bus, ala den sma di koti den wiwiri na den sei-ede,+ 24 ala den kownu fu den Arabiri,+ ala den kownu fu den difrenti pipel di e tan na ini a sabana, 25 ala den kownu fu Simri, ala den kownu fu Elam,+ ala den kownu fu den Mediasma,+ 26 nanga ala den kownu fu noordsei di de krosibei èn di de farawe. Mi go na ibriwan fu den èn na ala tra kownukondre fu grontapu, dan mi meki den dringi fu a kan. Bakaten a kownu fu Seisak+ srefi o dringi tu.
27 „Taigi den: ’Yehovah di e tiri den legre, a Gado fu Israel, taki: „Dringi teleki unu drungu, dan unu brâk èn fadon na gron. Unu no o man opo moro,+ bika mi o seni wan feti-owru na un mindri.”’+ 28 Efu den no wani teki a kan na yu anu fu dringi, dan yu musu taigi den: ’Disi na san Yehovah di e tiri den legre taki: „Unu o dringi nomonomo.+ 29 Luku! Efu mi bigin tyari rampu kon na tapu a foto di e tyari mi nen,+ dan unu denki taki unu o man wai pasi gi strafu?”’+
Yehovah di e tiri den legre taki: ’Mi no o libi unu sondro fu strafu unu. Mi o seni wan feti-owru gi ala den sma na grontapu.’
30 Yu musu taigi den ala den sani disi di o pasa. Yu musu taigi den: ’Yehovah o bari komoto fu wan hei presi,+ iya, en sten o de fu yere na en santa tanpresi.+ Na en tanpresi a babari fu en o de fu yere. Te a wini ala den sma na grontapu, a o singi leki den sma di e masi droifi.’+
31 Yehovah taki: ’Wan babari o de fu yere te na den moro farawe presi fu grontapu, bika mi, Yehovah, o tyari den pipel go na fesi krutu.+ Na mi o krutu ala sma+ èn mi o meki feti-owru kiri den ogri sma.’+
32 Yehovah di e tiri den legre taki: ’Luku! Wan rampu o miti a wan pipel baka a trawan.+ Fu den moro farawe presi fu grontapu wan bigi winti o wai kon.+ 33 Den dedeskin fu den sma di Yehovah kiri na a dei dati o panya fu a wan sei fu grontapu te na a tra sei.+ Sma no o krei gi den, èn den no o tyari den go beri,+ ma den o libi den fu tron mèst na tapu a gron.’+
34 Bari, un skapuman, iya, bari krei!+ Lolo na gron,+ un bigiman fu a pipel,+ bika a ten doro fu den srakti unu èn den o yagi unu go na ala sei.+ Unu o fadon broko èn panya leki wan diri prapi!+ 35 Den skapuman no abi nowan presi fu lon go èn den bigiman fu a pipel no abi nowan fasi fu lowe gowe.+ 36 Arki! Den skapuman e bari èn den bigiman fu a pipel e bari krei, bika Yehovah e pori a weigron fu den. 37 Nanga bigi atibron Yehovah pori den presi pe sma ben libi so switi.+ Nowan sma de drape moro. 38 Leki wan yongu lew+ a komoto fu en tanpresi. Di a kon nanga wan ogri feti-owru fu puru atibron na den tapu, a pori a kondre so te, taki sma skreki srefisrefi fu dati.”+