Wan psalm fu David.
103 Mi ati, yu musu prèise Yehovah.+
Iya, ala sani na ini mi musu prèise en santa nen.+
2 Mi ati, prèise Yehovah
Èn no frigiti ala den sani di a du gi yu.+
3 A e gi yu pardon fu ala yu sondu.+
A e fri yu fu ala yu pina.+
4 A e puru yu na ini grebi-olo, so taki yu kan libi baka.+
A e sori yu bun-ati èn a abi sari-ati nanga yu.+
5 Yu heri libi a e du soso bun gi yu.+
A e meki yu kon yongu baka, neleki fa a de nanga wan aka.+
6 Yehovah e du san reti+
Èn a e koti krutu na wan reti fasi gi iniwan sma di trawan e bedrigi.+
7 A ben meki Moses kon sabi den pasi fu en.+
Iya, a sori den Israelsma san a man du.+
8 Yehovah na wan Gado di abi sari-ati nanga switifasi.+
En ati no e bron esi èn a abi bun-ati pasa marki.+
9 A no o tan suku fowtu na wi+
Èn a no o hori wi na ati fu têgo tu.+
10 A no gi wi ala strafu di wi ben musu kisi gi den sondu fu wi.+
A no meki wi pai gi ala den fowtu di wi meki,+
11 Bika neleki fa yu no man marki o fara hemel de fu grontapu,+
Na so yu no man marki a bun-ati di Gado e sori den sma di e anbegi en.+
12 So fara leki son-opo de fu sondongo,+
Na so fara fu wi a poti den sondu fu wi.+
13 Neleki fa wan papa abi sari-ati nanga den manpikin fu en,+
Na so Yehovah abi sari-ati nanga den sma di e anbegi en,+
14 Bika Gado sabi heri bun fa wi meki.+
A e hori na prakseri taki na fu doti wi meki.+
15 Libisma e libi syatu, neleki fa grun grasi e libi syatu.+
A de leki wan bromki fu a sabana di e opo kon gi wan syatu pisi ten nomo.+
16 Wan pikin winti nomo abi fu wai en, dan a no de moro+
Èn sma no man feni a presi moro pe a ben e gro.+
17 Ma ala ten, iya, fu têgo Yehovah e sori bun-ati+
Gi den sma di e anbegi en.+
A e du san reti gi den bakapikin fu den sma disi,+
18 Iya, gi den wan di e hori a frubontu fu en+
Èn gi den wan di e du san a taki, fu di den no frigiti den wèt fu en.+
19 Yehovah seti en kownusturu steifi na ini hemel fu ala ten.+
A de kownu fu ala sani di de.+
20 Un alamala di de engel fu Gado,+ un prèise Yehovah, iya, unu di tranga srefisrefi èn di e du san a taki,+
Te unu e gi yesi na en.+
21 Ala un legre fu Gado, un prèise Yehovah,+
Iya, unu di e dini en èn di e du a wani fu en.+
22 Un sani di Gado meki, un prèise Yehovah+
Na ala presi di a e tiri.+
Mi ati, yu musu prèise Yehovah.+