Psalm

81 Un pipel, un bari fu prisiri gi a Gado di e gi wi krakti,+

Iya, un bari fu prisiri gi a Gado fu Yakob.+

 2 Meki poku.+ Prei tyengretyengre.+

Iya, prei harpu tu di e meki sma firi prisiri. Prei den tra pokusani sosrefi di gersi harpu.+

 3 Bro a tutu na a dei fu a nyun mun,+

Na a dei fu a furu mun te wi o hori a fesa fu wi,+

 4 Bika a sani disi de wan wèt gi Israel,+

Wan krutubosroiti fu a Gado fu Yakob

 5 Di a gi Yosef fu memre en san a musu du+

Na a ten di a pasa na ini a kondre Egepte.+

Drape wi ben e yere wan tongo di wi no ben sabi.+

 6 Gado taki: „Mi puru wan lai na en skowru srefi.+

En anu no ben abi fu syow baskita moro.+

 7 Di yu ben de na nowtu, yu kari mi èn mi kon yepi yu.+

Mi piki yu komoto fu wan kibripe pe dondru ben e bari.+

Mi ben ondrosuku yu na den watra na Meriba.+ Sela.

 8 Mi pipel, mi e begi yu, arki mi, dan mi o warskow yu.+

Israel, na arki yu musu arki mi nomo.+

 9 Yu no musu anbegi nowan tra gado.+

Yu no musu boigi gi wan gado fu den trakondre sma.+

10 Mi, Yehovah, na a Gado fu yu.+

Mi na a sma di e tyari yu komoto na ini a kondre Egepte.+

Bradi yu mofo opo, meki mi furu en nanga nyanyan.+

11 Toku mi pipel no arki mi sten.+

Israel no ben wani gi yesi na mi kwetikweti.+

12 Dati meki mi libi den meki den gowe, fu di den ben tranga-ede.+

Den go du san densrefi ben feni bun.+

13 Mi winsi nomo taki mi pipel ben sa arki mi+

Èn taki Israel ben sa du nomo san mi taigi den!+

14 Dan a no ben o de noti gi mi fu wini den feanti fu den.+

Dan mi ben o feti nanga den wan di e gens den.+

15 Den wan di no lobi Yehovah kwetikweti, o beifi te den e waka kon miti yu+

Èn den o tan pina fu ala ten.

16 Gado o gi a pipel fu en a moro bun aleisi fu nyan+

Èn a o gi den furu oni+ di komoto na ini wan bigi ston.”